അഗാസിക്ക് ആസ്ത്രേലിയന്‍ ഓപ്പണ്‍

മെല്‍ബണ്‍: ഇപ്പോഴത്തെ ചാമ്പ്യന്‍ അമേരിക്കയുടെ ആന്ദ്രെ അഗാസി ആസ്ത്രേലിയന്‍ ഓപ്പണ്‍ ടെന്നീസ് പുരുഷകിരീടം നിലനിര്‍ത്തി. ജനവരി 28 ഞായറാഴ്ച മെല്‍ബണില്‍ നടന്ന ഫൈനലില്‍ 15ാം സീഡായ ഫ്രഞ്ചുകാരന്‍ ആര്‍നോഡ് ക്ലമെന്റിനെ നേരിട്ടുള്ള സെറ്റുകള്‍ക്ക് തകര്‍ത്താണ് അഗാസി കിരീടം സ്വന്തമാക്കിയത് (സ്കോര്‍: 6-4, 6-2, 6-2).

ആന്ദ്രെ അഗാസിയുടെ മൂന്നാമത്തെ ആസ്ത്രേലിയന്‍ ഓപ്പണ്‍ കിരീടമാണിത്. കഴിഞ്ഞ വര്‍ഷത്തേതിനു പുറമെ 1995ലും അഗാസി ആസ്ത്രേലിയന്‍ ഓപ്പണ്‍ ചാമ്പ്യനായിരുന്നു.

മികച്ച വിജയങ്ങളിലുടെ ഫൈനലിലെത്തിയ ക്ലമെന്റിന് പക്ഷെ ഫൈനല്‍ ഒരു ദുരന്തമായിരുന്നു. ടൂര്‍ണമെന്റില്‍ താന്‍ കാഴ്ചവെച്ച മികച്ച ഫോം അഗാസിയുടെ മുന്നില്‍ പ്രദര്‍ശിപ്പിക്കാന്‍ കഴിയാതെ ക്ലമെന്റ് കുഴങ്ങി. ആദ്യസെറ്റില്‍ മാത്രമാണ് അദ്ദേഹം അല്പമെങ്കിലും പിടിച്ചു നിന്നത്.

ക്ലമെന്റ് രണ്ടു തവണ അഗാസിയുടെ സെര്‍വുകള്‍ ഭേദിച്ചെങ്കിലും ഏഴു തവണ തന്റെ സെര്‍വ് നിലനിര്‍ത്തുന്നതില്‍ പരാജയപ്പെട്ടു. ഒന്നാം സെറ്റില്‍ ഒരു തവണയും രണ്ടും മൂന്നും സെറ്റുകളില്‍ രണ്ടു തവണ വീതവും.