അഗാസി, ഹിംഗിസ് പ്രീക്വാര്‍ട്ടറില്‍

പാരീസ്: മൂന്നാം സീഡ് അമേരിക്കയുടെ ആന്ദ്രെ അഗാസി ഫ്രഞ്ച് ഓപ്പണ്‍ ടെന്നീസിന്റെ പുരുഷവിഭാഗം പ്രീക്വാര്‍ട്ടറില്‍ കടന്നു. വനിതാവിഭാഗത്തില്‍ ഒന്നാം സീഡ് സ്വിറ്റ്സര്‍ലണ്ടിന്റെ മാര്‍ട്ടിന ഹിംഗിസും പ്രീക്വാര്‍ട്ടറില്‍ സ്ഥാനം ഉറപ്പിച്ചു.

ജൂണ്‍ രണ്ട് ശനിയാഴ്ച നടന്ന മത്സരത്തില്‍ ബ്രസീലിന്റെ ഫെര്‍ണാണ്ടോ മാലിഗ്നിയെ 6-3, 2-6, 6-1, 6-3 എന്ന സ്കോറിനാണ് അഗാസി തോല്പിച്ചത്. 10ാം സീഡ് സെബാസ്റ്യന്‍ ഗ്രോസ്ജീനും 13ാം സീഡ് അലകംസ് കൊറെറ്റ്ജയും പ്രീക്വാര്‍ട്ടറില്‍ കടന്നു. ഫ്രാന്‍സിന്റെ ആന്റണി ഡുപിസിനെ 6-4, 2-6, 3-6, 6-4, 6-2 എന്ന സ്കോറിനാണ് ഗ്രോസ്ജീന്‍ മറികടന്നത്. സ്വീഡന്റെ മാഗ്നസ് ലാര്‍സനെ 6-0, 6-3, 6-4 എന്ന സ്കോറിന് നേരിട്ടുള്ള സെറ്റുകള്‍ക്ക് കൊറെറ്റ്ജ തകര്‍ത്തുവിട്ടു.

എന്നാല്‍ രണ്ടാം റഷ്യയുടെ മാരാത് സഫിന് മൂന്നാംറൗണ്ടില്‍ തോല്വി പിണഞ്ഞു. ഫ്രാന്‍സിന്റെ സീഡ് ചെയ്യപ്പെടാത്ത താരം ഫാബ്രീസ് സാന്റോറോ 6-4, 6-4, 4-6, 0-6, 6-1 എന്ന സ്കോറിന് സഫിനെ അട്ടിമറിച്ചു.

ആസ്ത്രേലിയയുടെ റേച്ചല്‍ മക്വിലാനെ നേരിട്ടുള്ള സെറ്റുകള്‍ക്ക് തകര്‍ത്താണ് ഒന്നാം നമ്പര്‍ താരം ഹിംഗിസ് വനിതാവിഭാഗം പ്രീക്വാര്‍ട്ടറിലെത്തിയത്. സ്കോര്‍: 7-5, 6-1. എന്നാല്‍ 10ാം സീഡ് അമാന്‍ഡ കോസ്റര്‍ പ്രീക്വാര്‍ട്ടര്‍ കാണാതെ പുറത്തായി. ഇറ്റലിയുടെ സീഡ് ചെയ്യപ്പെടാത്ത കളിക്കാരി ഫ്രാന്‍സെസ്കാ ഷിയാവോന്‍ 7-5, 6-4 എന്ന സ്കോറിന് കോസ്ററെ അട്ടിമറിച്ചു.