കപ്രിയാറ്റി, സെറീന ക്വാര്‍ട്ടറില്‍

പാരീസ്: അമേരിക്കന്‍ കളിക്കാരായ നാലാം സീഡ് ജെന്നിഫര്‍ കപ്രിയാറ്റി, ആറാം സീഡ് സെറീന വില്യംസ് എന്നിവര്‍ ഫ്രഞ്ച് ഓപ്പണ്‍ വനിതാവിഭാഗം സിംഗിള്‍സിന്റെ ക്വാര്‍ട്ടര്‍ ഫൈനലില്‍ കടന്നു.

ജൂണ്‍ മൂന്ന് ഞായറാഴ്ച നടന്ന പ്രീക്വാര്‍ട്ടറില്‍ നാട്ടുകാരിയും 16ാം സീഡുമായ മെഹ്ഗന്‍ ഷോഗ്നെസിയെയാണ് കപ്രിയാറ്റി തോല്പിച്ചത്. സ്കോര്‍: 7-5, 6-1. റഷ്യയുടെ സീഡ് ചെയ്യപ്പെടാത്ത താരം നദേജ്ദ പെട്രോവയെ 6-3, 6-1 എന്ന നേരിട്ടുള്ള സെറ്റുകള്‍ക്ക് തകര്‍ത്താണ് സെറീനയുടെ ക്വാര്‍ട്ടര്‍ പ്രവേശം. സെറീനയുടെ സഹോദരി വീനസ് വില്യംസ് ഒന്നാം റൗണ്ടില്‍ തന്നെ പുറത്തായിരുന്നു. കപ്രിയാറ്റിയും സെറീനയും തമ്മിലാണ് ക്വാര്‍ട്ടര്‍ ഫൈനല്‍.

വനിതാവിഭാഗത്തിലെ മറ്റൊരു ക്വാര്‍ട്ടര്‍ ഫൈനലില്‍ 12ാം സീഡ് കിം ക്ലിജ്സ്റേഴ്സും ഹംഗറിയുടെ പെട്രാ മാന്‍ഡുലയും തമ്മില്‍ ഏറ്റുമുട്ടും. സ്ലോവാക്യയുടെ ഹെന്‍റിയേറ്റ നാഗ്യോവയെ 6-4, 4-6, 6-3 എന്ന സ്കോറിന് തോല്പിച്ചാണ് ക്ലിജ്സ്റേഴ്സ് ക്വാര്‍ട്ടറിലെത്തിയത്. ഇറ്റലിയുടെ റീത ഗ്രാന്‍ഡെയ്ക്കെതിരെയായിരുന്നു പെട്രാ മാന്‍ഡുലയുടെ ജയം. സ്കോര്‍: 6-2, 6-2.

ഒന്നാം സീഡ് മാര്‍ട്ടിന ഹിംഗിസും ഇറ്റലിയുടെ ഫ്രാന്‍സെസ്ക ഷിയാവോണും തമ്മിലാണ് ഒന്നാം ക്വാര്‍ട്ടര്‍ ഫൈനല്‍. നാലാം ക്വാര്‍ട്ടര്‍ ഫൈനലില്‍ റഷ്യയുടെ ലിനാ ക്രസ്നോറുസ്കയും ബെല്‍ജിയത്തിന്റെ ജസ്റിന്‍ ഹെനിനും ഏറ്റുമുട്ടും.

ഫെരേരോ ക്വാര്‍ട്ടറില്‍

നാലാം സീഡ് സ്പെയിനിന്റെ ജുവാന്‍ കാര്‍ലോസ് ഫെരേരോ പുരുഷവിഭാഗം സിംഗിള്‍സിന്റെ ക്വാര്‍ട്ടറില്‍ കടന്നു. 14ാം സീഡ് സ്വീഡന്റെ തോമസ് എന്‍ക്വിസ്റിനെ 6-2, 6-4, 6-2 എന്ന സ്കോറിനാണ് ഫെരേരോ തോല്പിച്ചത്.

ഇപ്പോഴത്തെ ചാമ്പ്യനും ഒന്നാം സീഡുമായ ബ്രസീലിന്റെ ഗസ്റാവോ കേര്‍ട്ടണും ഏഴാം സീഡ് റഷ്യയുടെ യെവ്ജനി കാഫെല്‍നിക്കഫും നേരത്തെ ക്വാര്‍ട്ടറില്‍ കടന്നിരുന്നു.