കപ്രിയാറ്റി, വില്യംസ് സഹോദരിമാര്‍ ക്വാര്‍ട്ടറില്‍

ലണ്ടന്‍: വിംബിള്‍ഡണ്‍ ടെന്നീസ് ടൂര്‍ണമെന്റിന്റെ വനിതാവിഭാഗം ക്വാര്‍ട്ടര്‍ നിര വ്യക്തമായി. നിലവിലെ ചാമ്പ്യനായ വീനസ് വില്യംസ് ഒമ്പതാ സീഡ് നതാലിയ തൗസിയത്തിനെ നേരിടുമ്പോള്‍ മൂന്നാം സീഡ് അമേരിക്കയുടെ ലിന്‍ഡ്സെ ഡാവന്‍പോര്‍ട്ട് ഏഴാം സീഡ് ബെല്‍ജിയത്തിന്റെ കിം ക്ലിജ്സ്റേഴ്സിനെ എതിരിടും.

റഷ്യയുടെ നദിയ പെട്രോവയെ 6-2, 6-0ത്തിന് തകര്‍ത്താണ് വീനസ് ക്വാര്‍ട്ടറിലെത്തിയത്. 14ാം സീഡ് യൂഗോസ്ലാവിയയുടെ ജെലേന ജോക്കിച്ചിനെ 7-5, 6-4 എന്ന സ്കോറിന് ഡാവന്‍പോര്‍ട്ട് തോല്പിച്ചു. കിം ക്ലിജ്സ്റേഴ്സ് 17ാം സീഡ് മേഘന്‍ ഷൗനസിയെയും (7-6, 7-6) തൗസിയത്ത് 31ാം സീഡ് തമറിന്‍ തനാസുഗനെയും (6-3, 6-2) തോല്പിച്ചാണ് ക്വാര്‍ട്ടറിലിടം നേടിയത്.

ആസ്ത്രേലിയന്‍ ഓപ്പണ്‍, ഫ്രഞ്ച് ഓപ്പണ്‍ കിരീടങ്ങള്‍ നേടിയെത്തിയ നാലാം സീഡ് ജെന്നിഫര്‍ കപ്രിയാറ്റിയും ക്വാര്‍ട്ടറിലെത്തി. 15ാം സീഡ് സാന്‍ഡ്രിന്‍ ടെസ്റുഡിനെ 6-1, 6-2 എന്ന സ്കോറിനാണ് കപ്രിയാറ്റി തറപറ്റിച്ചത്. അഞ്ചാം സീഡ് അമേരിക്കയുടെ സെറീന വില്യംസാണ് ക്വാര്‍ട്ടറില്‍ കപ്രിയാറ്റിയുടെ എതിരാളി. 12ാം സീഡ് മഗ്ദലനേ മലീവയെ 6-2, 6-1നാണ് സെറീന തോല്പിച്ചത്.

മറ്റൊരു ക്വാര്‍ട്ടറില്‍ ഒമ്പതാം സീഡ് ജസ്റിന്‍ ഹെനിനും 19ാം സീഡ് കൊഞ്ചിറ്റ മാര്‍ട്ടിനെസും ഏറ്റുമുട്ടും. 18ാം സീഡ് ജര്‍മ്മനിയുടെ ആങ്കെ ഹ്യൂബറെ 4-6, 6-2, 6-2 എന്ന സ്കോറിനാണ് ഹെനിന്‍ മറികടന്നത്. റഷ്യയുടെ ലിന ക്രസ്നറോസ്കയെ 6-3, 6-4 എന്ന സ്കോറിന് മാര്‍ട്ടിനെസ് കീഴടക്കി.