വിംബിള്‍ഡണ്‍: ഡാവന്‍പോര്‍ട്ട് സെമിയില്‍

ലണ്ടന്‍: 1999ലെ ചാമ്പ്യനും മൂന്നാം സീഡുമായ അമേരിക്കയുടെ ലിന്‍ഡ്സ് ഡാവന്‍പോര്‍ട്ട് വിംബിള്‍ഡണ്‍ ടെന്നീസ് ചാമ്പ്യന്‍ഷിപ്പിന്റെ വനിതാവിഭാഗം സെമി ഫൈനില്‍ കടന്നു.

ജൂലായ് മൂന്ന് ചൊവാഴ്ച നടന്ന ക്വാര്‍ട്ടര്‍ ഫൈനലില്‍ ഏഴാം സീഡ് ബെല്‍ജിയത്തിന്റെ കിം ക്ലൈസ്റേഴ്സിനെ 6-1, 6-3 എന്ന സ്കോറിനാണ് ഡാവന്‍പോര്‍ട്ട് തോല്പിച്ചത്.

ഇതോടെ വനിതാവിഭാഗം സെമിഫൈനല്‍ നിര പൂര്‍ണമായി. നിലവിലെ ചാമ്പ്യനും രണ്ടാം സീഡുമായ അമേരിക്കയുടെ വീനസ് വില്യംസുമായാണ് ഡാവന്‍പോര്‍ട്ട് സെമിയില്‍ മത്സരിക്കുക. നാലാം സീഡ് അമേരിക്കയുടെ ജെന്നിഫര്‍ കപ്രിയാറ്റിയും എട്ടാം സീഡ് ബെല്‍ജിയത്തിന്റെ ജസ്റിന്‍ ഹെനിനും മറ്റൊരു സെമിഫൈനലില്‍ ഏറ്റുമുട്ടും.

ജൂലായ് നാല് ബുധനാഴ്ച പുരുഷവിഭാഗം ക്വാര്‍ട്ടര്‍ഫൈനല്‍ മത്സരങ്ങള്‍ നടക്കും. സെന്റര്‍കോര്‍ട്ടില്‍ നാലാം സീഡ് മരാത് സഫിനും ക്രൊയേഷ്യയുടെ ഗൊരാന്‍ ഇവാനിസെവിച്ചും ആദ്യമത്സരത്തില്‍ ഏറ്റുമുട്ടും. പീറ്റ് സാംപ്രാസിനെ അട്ടിമറിച്ച 15ാം സീഡ് റോജര്‍ ഫെഡററും ആറാം സീഡ് ബ്രിട്ടന്റെ ടിം ഹെന്‍മാനുമാണ് സെന്റര്‍കോര്‍ട്ടിലെ രണ്ടാം മത്സരത്തില്‍ ഏറ്റുമുട്ടുക.

ഒന്നാം കോര്‍ട്ടില്‍ മൂന്നാം സീഡും കഴിഞ്ഞ തവണത്തെ റണ്ണറപ്പുമായ ആസ്ത്രേലിയയുടെ പാട്രിക് റാഫ്റ്റര്‍ 10ാം സീഡ് സ്വീഡന്റെ തോമസ് എന്‍ക്വിസ്റുമായി ഏറ്റുമുട്ടും. രണ്ടാമത്തെ മത്സരത്തില്‍ രണ്ടാം സീഡും 1992ലെ ചാമ്പ്യനുമായ ആന്ദ്രെ അഗാസിയും 24ാം സീഡ് നിക്കോളാസ് എസ്ക്യൂഡും ഏറ്റുമുട്ടും.