ഇന്ത്യ 187ന് പുറത്ത്

ഗാലെ: ശ്രീലങ്കയ്ക്കെതിരായ ഒന്നാം ക്രിക്കറ്റ് ടെസ്റിന്റെ ആദ്യഇന്നിംഗ്സില്‍ ഇന്ത്യയുടെ ബാറ്റിംഗ് 187 റണ്‍സിന് അവസാനിച്ചു. രണ്ടാം ദിവസം 24 റണ്‍സ് കൂടി ചേര്‍ക്കുമ്പോഴേക്കും ഇന്ത്യ അവശേഷിക്കുന്ന അഞ്ച് വിക്കറ്റുകളും അടിയറവ് വെക്കുകയായിരുന്നു.

ക്രീസിലുണ്ടായിരുന്ന സൗരവ് ഗാംഗുലിയ്ക്കും സമീര്‍ ദിഗെയ്കും ശ്രീലങ്കന്‍ ബൗളിംഗിന് മുമ്പില്‍ പിടിച്ചുനില്‍ക്കാനായില്ല. അഞ്ച് റണ്‍സ് കൂടി ചേര്‍ക്കുമ്പോഴേക്കും ഗാംഗുലി ഫെര്‍ണാഡോയുടെ പന്തില്‍ സംഗാക്കരെ പിടിച്ച് പുറത്തായി. 15 റണ്‍സ് ആയിരുന്നു ഗാംഗുലിയുടെ സംഭാവന.

ഒമ്പത് റണ്‍സോടെ ദിഗെയും ഫെര്‍ണാഡോയ്ക്ക് മുന്നില്‍ അടിയറവ് പറഞ്ഞു. മൂന്ന് പന്ത് നേരിടുമ്പോഴേക്കും മുറിവേറ്റ ശ്രീനാഥ് പിന്നീട് ബാറ്റ് ചെയ്തില്ല. ഹര്‍ബജന്‍സിംഗ് നാല് റണ്‍സോടെയും വെങ്കിടേഷ് പ്രസാദ് റണ്ണൊന്നുമെടുക്കാതെയും പുറത്തായി.

അഞ്ച് വിക്കറ്റ് വീഴ്ത്തിയ ഫെര്‍ണാഡോയാണ് ഇന്ത്യയുടെ അന്തകനായത്. മുത്തയ്യ മുരളീധരന്‍ മൂന്ന് വിക്കറ്റെടുത്തു.

അവസാനം റിപ്പോര്‍ട്ട് കിട്ടുമ്പോള്‍ ശ്രീലങ്ക വിക്കറ്റൊന്നും നഷ്ടപ്പെടാതെ 44 റണ്‍സെടുത്തിട്ടുണ്ട്.