ഗിബ്സിന് സെഞ്ച്വറി; ദക്ഷിണാഫ്രിക്ക മൂന്നിന് 327

ബ്ലുംഫൊണ്ടെയ്ന്‍: ആദ്യടെസ്റിലെ ഒന്നാം ഇന്നിംഗ്സില്‍ 379 റണ്‍സെടുത്ത ഇന്ത്യക്കെതിരെ ദക്ഷിണാഫ്രിക്ക തിരിച്ചടിക്കുന്നു. രണ്ടാം ദിവസം കളി അവസാനിക്കുമ്പോള്‍ മൂന്ന് വിക്കറ്റിന് 327 റണ്‍സെടുത്ത ദക്ഷിണാഫ്രിക്ക മികച്ച നിലയിലാണ്.

സെഞ്ച്വറി നേടിയ ഹര്‍ഷേല ഗിബ്സും (105) ഗാരി കേസ്റനും (73) ദക്ഷിണാഫ്രിക്കയ്ക്ക് മികച്ച തുടക്കമാണ് നല്‍കിയത്. 189 റണ്‍സാണ് ഇരുവരും ചേര്‍ന്ന് നേടിയത്.

ഇരുവരുടെയും വിക്കറ്റുകള്‍ അടുത്തടുത്ത ഓവറുകളില്‍ വീണെങ്കിലും തുടര്‍ന്നെത്തിയ മക്കന്‍സിയും (68) ജാക്വസ് കാലിസും (49 നോട്ടൗട്ട്) അടിപതറാതെ ബാറ്റ് ചെയ്തപ്പോള്‍ ദക്ഷിണാഫ്രിക്കയ്ക്ക് മികച്ച സ്കോറിലേക്ക് കുതിക്കുകയാണെന്ന് വ്യക്തമായി.

നേരത്തെ ഇന്ത്യയുടെ അവശേഷിക്കുന്ന മൂന്ന് വിക്കറ്റുകള്‍ ഏഴ് റണ്‍സ് കൂടി ചേര്‍ക്കുന്നതിനിടെ വീണു. ദക്ഷിണാഫ്രിക്കന്‍ ക്യാപ്റ്റന്‍ ഷോണ്‍ പൊള്ളോക്ക് നാല് വിക്കറ്റ് വീഴ്ത്തി.