സന്തോഷ് ട്രോഫി: കര്‍ണാടക-പഞ്ചാബ് മത്സരം സമനില

കൊച്ചി: സന്തോഷ് ട്രോഫി ഫുട്ബോള്‍ ചാമ്പ്യന്‍ഷിപ്പില്‍ നവംബര്‍ 13 ഞായറാഴ്ച രാവിലെ നടന്ന കര്‍ണാടക-പഞ്ചാബ് മത്സരം 2-2 സമനിലയില്‍ അവസാനിച്ചു.

ആദ്യപകുതിയില്‍ പഞ്ചാബ് ഒരു ഗോളിന് മുന്നിലായിരുന്നു. ശനിയാഴ്ച വൈകീട്ട് നടക്കേണ്ട മത്സരം മഴ മൂലം ഞായറാഴ്ച രാവിലത്തേക്ക് മാറ്റുകയായിരുന്നു.

പഞ്ചാബിനു വേണ്ടി 27-ാം മിനുട്ടില്‍ തരണ്‍ജിത്സിംഗും 71-ാം മിനുട്ടില്‍ പകരക്കാരനായി ഇറങ്ങിയ യദ്വിന്ദര്‍സിംഗും ഗോളടിച്ചു. കര്‍ണാടകയുടെ ഗോളുകള്‍ 62-ാം മിനുട്ടില്‍ എസ്.വെങ്കിടേഷിന്റെയും 84-ാം മിനുട്ടില്‍ രാജേന്ദ്ര പ്രസാദിന്റെയും ബൂട്ടുകളില്‍ നിന്ന് പിറന്നു.

കളിയില്‍ മിക്ക സമയത്തും കര്‍ണാടകയാണ് ആധിപത്യം സ്ഥാപിച്ചതെങ്കിലും രണ്ടു വട്ടം ലീഡു നേടിയത് പഞ്ചാബാണ്. എന്നാല്‍ പഞ്ചാബിന്റെ പ്രതിരോധത്തെ തകര്‍ത്ത് ഗോളുകള്‍ തിരിച്ചടിക്കാന്‍ കര്‍ണാടകത്തിനു കഴിഞ്ഞു.