പാകിന്റെ ശക്തിയെ കുറച്ച്‌ കാണേണ്ടെന്ന്‌ സര്‍ദാരി

ഇസ്ലാമബാദ്‌: തങ്ങളുടെ സേനാബലത്തെ ഇന്ത്യ വിലകുറച്ച്‌ കാണേണ്ടതില്ലെന്നും ഇന്ത്യയുടെ ഭാഗത്തുനിന്നുള്ള ഏത്‌ ഭീഷണിയും നേരിടാന്‍ പാകിസ്‌താന്‍ തയ്യാറാണെന്നും പ്രസിഡന്റ്‌ ആസിഫ്‌ അലി സര്‍ദാരി.

അതിര്‍ത്തിയില്‍ ഇന്ത്യന്‍ സൈന്യം പടനീക്കം നടത്തുന്നുണ്ടെന്ന വാര്‍ത്തകള്‍ക്ക്‌ മറുപടിയെന്ന രീതിയിലാണ്‌ സര്‍ദാരിയുടെ ഈ പ്രസ്‌താവന.

ജോയിന്റ്‌ ചീഫ്‌ ഓഫ്‌ സ്റ്റാഫ്‌ കമ്മിറ്റി ചെയര്‍മാന്‍ ജനറല്‍ താരിക്‌ മജീദുമായുള്ള കൂടിക്കാഴ്‌ചയ്‌ക്കുശേഷം മാധ്യമപ്രവര്‍ത്തകരോട്‌ സംസാരിക്കുകയായിരുന്നു സര്‍ദാരി. ഇന്ത്യ ആക്രമിക്കുകയാണെങ്കില്‍ തിരിച്ചടിക്കാന്‍ ഏത്‌ നിമിഷവും തയ്യാറാണെന്ന്‌ ജനറല്‍ താരിക്‌ മജീദ്‌ പ്രസിഡന്റിനെ അറിയിച്ചിട്ടുണ്ട്‌.

അതേസമയം അതിര്‍ത്തിയിലെ സേനാവിന്യാസം ഇരുരാജ്യങ്ങള്‍ക്കും ഗുണം ചെയ്യില്ലെന്ന്‌ പാക്‌ പ്രധാനമന്ത്രി യൂസഫ്‌ റാസ ഗിലാനി അഭിപ്രായപ്പെട്ടു. തങ്ങള്‍ ഉത്തരവാദിത്തത്തോടെയാണ്‌ പ്രതികരിക്കുന്നതെന്നും യുദ്ധം ആഗ്രഹിക്കുന്നില്ലെന്നും അദ്ദേഹം വ്യക്തമാക്കി. എന്നാല്‍ ഇന്ത്യ യുദ്ധത്തിന്‌ സജ്ജമാകുന്നതിനാല്‍ പാക്‌സൈന്യത്തിന്‌ ജാഗ്രത പുലര്‍ത്തേണ്ടതുണ്ടെന്നും അദ്ദേഹം പറഞ്ഞു.