കൊല്ലം, തിരുവനന്തപുരം ജില്ലകളില്‍ വിഭാഗീയത നടന്നു

തിരുവനന്തപുരം: സിപിഎമ്മിന്റെ കോട്ടയം സംസ്ഥാന സമ്മേളനത്തിന്‌ മുന്നോടിയായി നടന്ന തിരുവനന്തപുരം, കൊല്ലം ജില്ലകളിലെ സംഘടന തിരഞ്ഞെടുപ്പുമായി ബന്ധപ്പെട്ട്‌ വിഭാഗീയത നടന്നതായി റിപ്പോര്‍ട്ട്‌.

സിപിഎം കേന്ദ്ര കമ്മിറ്റിയംഗം പി. കരുണാകരന്‍ എംപി അധ്യക്ഷനും കേന്ദ്ര കമ്മിറ്റിയംഗം എം.സി ജോസഫൈന്‍, സംസ്ഥാന സെക്രട്ടേറിയറ്റയംഗം എം.വി ഗോവിന്ദന്‍ എന്നിവര്‍ അംഗങ്ങളായ മൂന്നംഗ സമിതിയാണ്‌ ഇത്‌ സംബന്ധിച്ച്‌ റിപ്പോര്‍ട്ട്‌ സമര്‍പ്പിച്ചത്‌. വെള്ളിയാഴ്‌ച ആരംഭിച്ച സിപിഎം സെക്രട്ടേറിയറ്റ്‌ യോഗം റിപ്പോര്‍ട്ട്‌ ചര്‍ച്ച ചെയ്‌തുവെങ്കിലും തീരുമാനമൊന്നും എടുത്തില്ല.

യോഗത്തില്‍ പങ്കെടുക്കുന്ന സിപിഎം ജനറല്‍ സെക്രട്ടറി പ്രകാശ്‌ കാരാട്ട്‌ അടക്കമുള്ള പിബി അംഗങ്ങളുടെ അഭിപ്രായങ്ങള്‍ കൂടി കണക്കിലെടുത്തായിരിക്കും സംസ്ഥാന സെക്രട്ടേറിയറ്റ്‌ ഇക്കാര്യത്തില്‍ തീരുമാനമെടുക്കുക. തിരുവനന്തപുരത്ത്‌ വിഎസ്‌ വിഭാഗത്തെയും കൊല്ലത്ത്‌ ഔദ്യോഗിക വിഭാഗത്തെയും വെട്ടിനിരത്തിയെന്നാണ്‌ ആരോപണമുയര്‍ന്നിരുന്നത്‌.

ലോക്‌സഭാ തിരഞ്ഞെടുപ്പിന്‌ പാര്‍ട്ടിയെ സജ്ജമാക്കുന്നതിനുള്ള ഒരുക്കങ്ങള്‍ക്ക്‌ രൂപം നല്‌കുകയെന്ന പ്രധാന അജണ്ട കൂടി സംസ്ഥാന കമ്മിറ്റിയ്‌ക്ക്‌ മുമ്പിലുണ്ട്‌. ഷൊര്‍ണ്ണൂര്‍ ഉപതിരഞ്ഞെടുപ്പിലെ തോല്‌വി വെള്ളിയാഴ്‌ച ചര്‍ച്ചയ്‌ക്കെടുത്തിരുന്നില്ല. ശനിയാഴ്‌ച ഇക്കാര്യവും ചര്‍ച്ചയ്‌ക്ക്‌ വരുമെന്നാണ്‌ കരുതപ്പെടുന്നത്‌.

സി പി എം വാര്‍ത്തകള്‍