ബാംഗ്ലൂര്‍-എറണാകുളം റൂട്ടില്‍ 8 പ്രത്യേക തീവണ്ടി

ബാംഗ്ലൂര്‍: ഓണത്തിരക്ക്‌ കണക്കിലെടുത്ത്‌ ബാംഗ്ലൂര്‍-എറണാകുളം റൂട്ടില്‍ 8 പ്രത്യേക തീവണ്ടികള്‍ ഓടിക്കുമെന്ന്‌ റെയില്‍വേ അറിയിച്ചു.

ഇതില്‍ നാലെണ്ണം ബാംഗ്ലൂര്‍ സെന്‍ട്രലില്‍നിന്ന്‌ എറണാകുളം ജങ്‌ഷനിലേയ്‌ക്കും നാലെണ്ണം തിരിച്ചും സര്‍വീസ്‌ നടത്തുമെന്ന് റെയില്‍വേ പുറത്തിറക്കിയ വാര്‍ത്താക്കുറിപ്പില്‍ പറയുന്നു.

ആഗസ്‌ത്‌ 28, സപ്‌തംബര്‍ ഒന്ന്‌, നാല്‌, എട്ട്‌ തീയതികളിലാണ്‌ ബാംഗ്ലൂര്‍ സെന്‍ട്രലില്‍നിന്ന്‌ എറണാകുളത്തേയ്‌ക്ക്‌ പ്രത്യേക തീവണ്ടി ഓടിക്കുക.

നമ്പര്‍ 0642 തീവണ്ടി സപ്‌തംബര്‍ ഒന്ന്‌, എട്ട്‌ തീയതികളില്‍ വൈകീട്ട്‌ 5.15ന്‌ ബാംഗ്ലൂര്‍ സെന്‍ട്രല്‍ സ്റ്റേഡിയത്തില്‍നിന്ന്‌ പുറപ്പെട്ട്‌ അടുത്ത ദിവസം പുലര്‍ച്ചെ 4.20ന്‌ എറണാകളും ജങ്‌ഷനില്‍ (സൗത്ത്‌ സ്റ്റേഷന്‍) എത്തിച്ചേരും.

ഈ തീവണ്ടി ആഗസ്‌ത്‌ 31, സപ്‌തംബര്‍ ഏഴ്‌ തീയതികളില്‍ വൈകീട്ട്‌ 6.40ന്‌ എറണാകുളം ജങ്‌ഷനില്‍നിന്ന്‌ പുറപ്പെട്ട്‌ അടുത്തദിവസം രാവിലെ 8.40ന്‌ ബാംഗ്ലൂര്‍ സെന്‍ട്രലിലെത്തും.

0644‍ാം നമ്പര്‍ പ്രത്യേക തീവണ്ടി ആഗസ്‌ത്‌ 28, സപ്‌തംബര്‍ നാല്‌ എന്നീ ദിവസങ്ങളിലാണ്‌ ബാംഗ്ലൂര്‍ സെന്‍ട്രലില്‍നിന്ന്‌ എറണാകുളം ജങ്‌ഷനിലേയ്‌ക്ക്‌ സര്‍വീസ്‌ നടത്തുക. വൈകീട്ട്‌ 6.50ന്‌ പുറപ്പെടുന്ന തീവണ്ടി അടുത്ത ദിവസം രാവിലെ 6.30ന്‌ എറണാകുളത്തെത്തും.

ഇതേ വണ്ടി ആഗസ്‌ത്‌ 27, സപ്‌തംബര്‍ മൂന്ന്‌ എന്നീ ദിവസങ്ങളില്‍ രാത്രി 9.15ന്‌ എറണാകുളം ജങ്‌ഷനില്‍നിന്ന്‌ പുറപ്പെട്ട്‌ അടുത്ത ദിവസം രാവിലെ പത്തിന്‌ ബാംഗ്ലൂര്‍ സെന്‍ട്രലില്‍ യാത്ര അവസാനിപ്പിക്കും.

ഈ പ്രത്യേക തീവണ്ടികളെല്ലാം കന്‍േറാണ്‍മെന്റ്‌, കെ.ആര്‍.പുര, വൈറ്റ്‌ ഫീല്‍ഡ്‌, ബങ്കാരപ്പെട്ട്‌, കുപ്പം, തിരുപ്പത്തൂര്‍, സേലം, ഈറോഡ്‌, തിരുപ്പൂര്‍, പൊതനൂര്‍, പാലക്കാട്‌, തൃശ്ശൂര്‍, ആലുവ റൂട്ടിലാണ്‌ ഓടുക.