പുസ്തക പ്രചാരണം: ജസ്വന്ത് പാക്കിസ്താനിലേക്ക്

ദില്ലി: വിവാദം കൊടുങ്കാറ്റുയര്‍ത്തിയ 'ജിന്ന: ഇന്ത്യ, വിഭജനം സ്വാതന്ത്ര്യം എന്ന പുസ്‌തകത്തിന്റെ പ്രകാശനത്തിനും പ്രചാരണത്തിനുമായി ബിജെപിയില്‍ നിന്നും പുറത്താക്കപ്പെട്ട ജസ്വന്ത്‌ സിങ്‌ പാകിസ്‌താന്‍ സന്ദര്‍ശിച്ചേക്കും.

റംസാന്‍ മാസത്തിന്‌ ശേഷം പാകിസ്‌താന്‍ സന്ദര്‍ശിയ്‌ക്കാനാണ്‌ ജസ്വന്ത്‌ ആലോചിയ്‌ക്കുന്നത്‌. പുസ്‌തകത്തിന്റെ പ്രസാധകരായ രൂപ ആന്‍ഡ്‌ കമ്പനി ആണ്‌ ഇക്കാര്യം അറിയിച്ചത്‌. ഇന്ത്യയിലെ പ്രധാന നഗരങ്ങള്‍ക്ക്‌ പുറമേ വിദേശ രാജ്യങ്ങളിലും പുസ്‌തകത്തിന്റെ പ്രചാരണത്തിനായി വിപുലമായ പദ്ധതി തയാറാക്കിയിട്ടുണ്ട്‌.

പാക്കിസ്‌താനില്‍ റംസാന്‌ ശേഷമായിരിക്കും പുസ്‌തകം പ്രകാശിപ്പിക്കുക. ഇതിനായി ദിവസം നിശ്ചയിക്കാന്‍ പാക്ക്‌ അധികൃതരുമായി സംസാരിച്ചു വരികയാണെന്ന്‌ പ്രസാധകര്‍ അറിയിച്ചു. പാക്കിസ്ഥാന്റെ രാഷ്ട്രപിതാവായ മുഹമ്മദാലി ജിന്നയെ പ്രകീര്‍ത്തിച്ചു കൊണ്ട് 'ജിന്ന: ഇന്ത്യ, വിഭജനം സ്വാതന്ത്ര്യം' എന്ന പുസ്‌തകം രചിച്ചതിനെ തുടര്‍ന്നാണ്‌ ജസ്വന്ത്‌ സിങിനെ ബിജെപി പുറത്താക്കിയത്‌.