മംഗാലാപുരത്ത് വിമാനത്തിന് തീപിടിച്ച് 159 മരണം

മംഗലാപുരം: മംഗലാപുരം ബജ്‌പെ അന്താരാഷ്ട്ര വിമാനത്താവളത്തില്‍ വിമാനത്തിന് തീപിടിച്ച് 160 ഓളം പേര്‍ മരിച്ചതായി റിപ്പോര്‍ട്ട്. 163 യാത്രക്കാരും ആറ് ജോലിക്കാരുമാണ് വിമാനത്തിലുണ്ടായിരുന്നു. 36 മൃതദേഹങ്ങള്‍ ഇതുവരെ കണ്ടെടുത്തിട്ടുണ്ട്. ഒരു കുട്ടിയടക്കം ഏഴുപേരെ രക്ഷപ്പെടുത്തിയെങ്കിലും കുട്ടി പിന്നീട് മരിച്ചു.

ദുബായില്‍ നിന്നും വന്ന എയര്‍ ഇന്ത്യാ എക്‌സ്പ്രസ് വിമാനം രാവിലെ 6.10 ഓടെ റണ്‍വെയില്‍ ഇറങ്ങുന്നതിനിടെയാണ് അപകടം. ലാന്‍ഡിങ്ങിനിടെ റണ്‍വെയില്‍ നിന്ന് വിമാനംതെന്നി നീങ്ങിയതാണ് അപകടകാരണമെന്നാണ് പ്രാഥമിക നിഗമനം. യാത്രക്കാരില്‍ ഒട്ടേറെ മലയാളികളുണ്ടെന്നാണ് കരുതുന്നത്. ബോയിങ് 737 800 ഐ.എക്‌സ് 892 വിമാനമാണ് അപകടത്തില്‍പ്പെട്ടത്.

മംഗലാപുരം പട്ടണത്തില്‍ നിന്നും 20 കിലോമീറ്റര്‍ അകലെ ബാജ്‌പെ എന്ന സ്ഥലത്താണ് വിമാനത്താവളം സ്ഥിതി ചെയ്യുന്നത്. പട്ടണത്തില്‍ നിന്നും അകലെയായതുകൊണ്ട് രക്ഷാപ്രവര്‍ത്തകര്‍ക്ക് സംഭവസ്ഥലത്ത് എത്താന്‍ താമസം നേരിട്ടതായാണ് റിപ്പോര്‍ട്ട്. കേരളത്തില്‍ നിന്നടക്കമുള്ള രക്ഷാപ്രവര്‍ത്തകരും അഗ്നിശമനസേനാപ്രവര്‍ത്തകരും സംഭവസ്ഥലത്തേക്ക് തിരിച്ചിട്ടുണ്ട്.

2006 മുതലാണ് ഇവിടെ നിന്നും ഗള്‍ഫ് രാജ്യങ്ങളിലേക്ക് വിമാന സര്‍വീസുകള്‍ ആരംഭിച്ചത്. ഇപ്പോള്‍ ഗള്‍ഫ് രാജ്യങ്ങളിലേക്ക് പോകുന്ന കാസര്‍കോഡ്, കണ്ണൂര്‍ ജില്ലക്കാരാണ് മംഗലാപുരം വിമാനത്താവളത്തിലെ പ്രധാന യാത്രക്കാര്‍. ദുബായ്ക്ക് പുറമെ അബുദാബി, മസ്‌ക്കറ്റ്, ദോഹ, ബഹ്‌റിന്‍, കുവൈറ്റ്, ഷാര്‍ജ എന്നിവിടങ്ങളിലേക്കും സര്‍വീസുകളുണ്ട്.

അപകടത്തെക്കുറിച്ചുള്ള വിവരങ്ങള്‍ നല്‍കാന്‍ എയര്‍ഇന്ത്യ ദില്ലി വിമാനത്താവളത്തില്‍ ഹെല്‍പ്പ് ലൈന്‍ സെന്റര്‍ തുറന്നു. ഹെല്‍പ്പ് ലൈന്‍ നമ്പറുകള്‍: 011 2565 6196, 011 2560 3101. മംഗലാപുരം വിമാനത്താവളത്തിലെ ഹെല്‍പ്പ് ലൈന്‍ നമ്പര്‍: 0824 2220422