അംഗീകരിച്ചത് തന്റെ നിര്‍ദേശങ്ങളെന്ന് ഉമ്മന്‍ചാണ്ടി

തിരുവനന്തപുരം: കോതമംഗലത്തെ നഴ്‌സുമാരുടെ പ്രശ്‌നത്തില്‍ നേരത്തെ ഇടപെട്ടിരുന്നതായി മുഖ്യമന്ത്രി ഉമ്മന്‍ചാണ്ടി പറഞ്ഞു. താന്‍ പറഞ്ഞ നിര്‍ദ്ദേശങ്ങളാണ് ചര്‍ച്ചയില്‍ അംഗീകരിച്ചത്. നഴ്‌സുമാരുടെ സമരത്തെക്കുറിച്ചു പ്രതിപക്ഷ നേതാവുമായും ചര്‍ച്ച നടത്തിയിരുന്നുവെന്നും ഉമ്മന്‍ ചാണ്ടി മാധ്യമപ്രവര്‍ത്തകരോട് പറഞ്ഞു. 115 ദിവസമായി തുടരുന്ന കോതമംഗലത്തെ പ്രശ്‌നത്തില്‍ താന്‍ നേരത്തെ ഇടപെട്ടിരുന്നുവെന്നും ഉമ്മന്‍ ചാണ്ടി വെളിപ്പെടുത്തി.

വ്യാഴാഴ്ച രാവിലെ അഞ്ച് തവണ മാധ്യമപ്രവര്‍ത്തകര്‍ മുഖ്യമന്ത്രിയോട് ചോദിച്ചെങ്കിലും കോതമംഗലത്തെ നഴ്‌സുമാരുടെ സമരത്തെക്കുറിച്ച് പ്രതികരിയ്ക്കാന്‍ അദ്ദേഹം തയാറായിരുന്നില്ല. ഇത് വന്‍ പ്രതിഷേധത്തിനും വഴിവച്ചിരുന്നു.

മുന്‍ ആരോഗ്യ മന്ത്രികൂടിയായ വി.എം. സുധീരനും പ്രശ്‌നം പരിഹരിക്കണമെന്ന് മുഖ്യമന്ത്രിയോട് ആവശ്യപ്പെട്ടിരുന്നു. എന്നിട്ടും മുഖ്യമന്ത്രിയോ തൊഴില്‍ മന്ത്രിയോ വിഷയത്തില്‍ ഇടപെട്ടില്ല. ഇതിനിടെ, ടി.എന്‍. പ്രതാപന്‍ അടക്കമുള്ള കോണ്‍ഗ്രസ് എം.എല്‍.എമാരും മുഖ്യമന്ത്രിയുമായി ബന്ധപ്പെട്ടു. ആശുപത്രിയുടെ ഭരണ സമിതിയുടെ പ്രധാന ചുമതലക്കാരനായ തോമസ് പ്രഥമന്‍ ബാവയുമായി ചര്‍ച്ച നടത്തണമെന്നായിരുന്നു ഇവരുടെ ആവശ്യം. ഇതിനും മുഖ്യമന്ത്രി തയാറായില്ല. ഇത് സമര സമിതിയെ കൂടുതല്‍ പ്രകോപിതരാക്കിയിരുന്നു.

സമരം നടത്തുന്ന നഴ്‌സുമാര്‍ക്ക് പിന്തുണ പ്രഖ്യാപിച്ച് റോഡ് തടഞ്ഞ് സമരം നടത്തുന്നവരെ സന്ദര്‍ശിക്കാനെത്തിയ സര്‍ക്കാര്‍ ചീഫ് വിപ്പ് പിസി ജോര്‍ജിനെ കൂവലോടെയാണ് സമരക്കാര്‍ സ്വീകരിച്ചത്. 'നഴ്‌സുമാരെ പറഞ്ഞുപറ്റിച്ച പി.സി. ജോര്‍ജ് സമരപ്പന്തലില്‍ നിന്ന് പോകണ'മെന്ന് മുദ്രാവാക്യം മുഴങ്ങി. ഏത് മന്ത്രിയെ വേണമെങ്കിലും സമരപ്പന്തലിലെത്തിക്കുമെന്ന പി.സി. ജോര്‍ജിന്റെ പ്രസ്താവനക്കും കൂവലോടെയായിരുന്നു സ്വീകരണം.