77 വള്ളങ്ങള്, പുന്നമടക്കായല് ഒരുങ്ങി; നെഹ്റു ട്രോഫി വള്ളംകളിയുടെ ഒരുക്കങ്ങള് പൂര്ത്തിയായി
ആലപ്പുഴ: അറുപത്തിയെട്ടാമത് നെഹ്റു ട്രോഫി വള്ളംകളിയുടെ ഒരുക്കങ്ങള് പൂര്ത്തിയായി. സെപ്റ്റംബര് നാലിന് ഉച്ചകഴിഞ്ഞ് രണ്ടിന് ബഹു. മുഖ്യമന്ത്രി പിണറായി വിജയന് വള്ളംകളി ഉദ്ഘാടനം ചെയ്യും. നെഹ്റു പ്രതിമയില് പുഷ്പാര്ച്ചന നടത്തിയ ശേഷം അദ്ദേഹം പതാക ഉയര്ത്തും.
ഉദ്ഘാടന സമ്മേളനത്തില് ടൂറിസം പൊതുമരാത്ത് വകുപ്പ് മന്ത്രി പി.എ. മുഹമ്മദ് റിയാസ്, ധനകാര്യമന്ത്രി കെ.എന്. ബാലഗോപാല്, റവന്യൂ മന്ത്രി കെ. രാജന്, കൃഷിമന്ത്രി പി. പ്രസാദ്, ജലവിഭവ വകുപ്പ് മന്ത്രി റോഷി അഗസ്റ്റിന് എന്നിവരും ജില്ലയിലെ എം.പിമാര് എം.എല്.എമാര് തുടങ്ങിയവരും പങ്കെടുക്കും.
ഒന്പത് വിഭാഗങ്ങളിലായി 77 വള്ളങ്ങളാണ് ഇക്കുറി നെഹ്റു ട്രോഫിയില് മാറ്റുരയ്ക്കുന്നത്. ചുണ്ടന് വള്ളങ്ങളുടെ വിഭാഗത്തില് 20 വള്ളങ്ങളുണ്ട്. ചുരുളന് -3, ഇരുട്ടുകുത്തി എ ഗ്രേഡ് -5, ഇരുട്ടുകുത്തി ബി ഗ്രേഡ് -16, ഇരുട്ടുകുത്തി സി ഗ്രേഡ് -13, വെപ്പ് എ ഗ്രേഡ് -9, വെപ്പ് ബി ഗ്രേഡ് -9, തെക്കനോടി(തറ) -3, തെക്കനോടി(കെട്ട്)- 3 എന്നിങ്ങനെയാണ് മറ്റു വിഭാഗങ്ങളില് മത്സരിക്കുന്ന വള്ളങ്ങളുടെ എണ്ണം.
രാവിലെ 11ന് മത്സരങ്ങള്ക്ക് തുടക്കമാകും. ചെറുവള്ളങ്ങളുടെ ഹീറ്റ്സാണ് ആദ്യം. ഉച്ചകഴിഞ്ഞ് രണ്ടിന് നടക്കുന്ന ഉദ്ഘാടന സമ്മേളനത്തിനു ശേഷമാകും ചുണ്ടന് വള്ളങ്ങളുടെ ഹീറ്റ്സ് മത്സരങ്ങള് ആരംഭിക്കുക. വൈകുന്നേരം നാലു മുതല് അഞ്ചു വരെയാണ് ഫൈനല് മത്സരങ്ങള്.
ചുണ്ടന് വള്ളങ്ങളുടെ മത്സരത്തില് അഞ്ചു ഹീറ്റ്സുകളാണുള്ളത്. ഓരോ ഹീറ്റ്സിലും നാലു വള്ളങ്ങള് വീതം മത്സരിക്കും. മികച്ച സമയം കുറിച്ച് ആദ്യമെത്തുന്ന നാലു വള്ളങ്ങളാണ് നെഹ്റു ട്രോഫിക്കുവേണ്ടിയുള്ള ഫൈനല് പോരാട്ടത്തിനായി ഇറങ്ങുക.
മികച്ച സമയം കുറിക്കുന്ന ഒന്പത് ചുണ്ടന് വള്ളങ്ങള് അടുത്ത വര്ഷത്തെ ചാമ്പ്യന്സ് ബോട്ട് ലീഗില് പങ്കെടുക്കുന്നതിന് യോഗ്യത നേടും. ഇത്തവണ ആദ്യമായി ചെറുവള്ളങ്ങളുടെ എല്ലാ വിഭാഗങ്ങളിലും ഫിനിഷ് ചെയ്യുന്ന സമയം പരിഗണിച്ചാണ് ജേതാക്കളെ തീരുമാനിക്കുന്നത്.
ഇന്ഫ്രാസ്ട്രക്ചര് കമ്മിറ്റിയുടെ നേതൃത്വത്തില് നെഹ്റു പവലിയന്റെയും താത്കാലിക ഗാലറികളുടെയും നിര്മ്മാണം പൂര്ത്തീകരണ ഘട്ടത്തിലാണ്. യന്ത്രവത്കൃത സ്റ്റാര്ട്ടിംഗ് സംവിധാനവും ഫോട്ടോ ഫിനിഷിംഗ് സംവിധാനവും സജ്ജമാണ്.
വള്ളംകളി കാണാനെത്തുന്നവര്ക്കായി കൂടുതല് ബോട്ടുകളും ബസുകളും ഏര്പ്പെടുത്തിയിട്ടുണ്ട്. അയല് ജില്ലകളിലെ കെ.എസ്.ആര്.ടി.സി ഡിപ്പോകളില്നിന്ന് രാവിലെ ആലപ്പുഴയിലേക്കും വൈകുന്നേരം തിരികെയും പ്രത്യേക സര്വീസുകളുണ്ടാകും.
മികച്ച ആരോഗ്യത്തിന് ഒരു ദിവസം എത്ര ചുവടു നടക്കണം? അറിയണം ഇക്കാര്യങ്ങള്
പാസുള്ളവര്ക്കു മാത്രമാണ് വള്ളംകളി കാണുന്നതിനായി ഗാലറികളിലേക്ക് പ്രവേശനം അനുവദിക്കുക. ഇതിനായി ഫിനിഷിംഗ് പോയിന്റിലേക്കുള്ള റോഡില് പ്രത്യേക ബാരിക്കേഡ് ഉണ്ടാകും. സി ഡിറ്റ് തയ്യാറാക്കിയ ഹോളോഗ്രാം പതിച്ച ടിക്കറ്റുകളാണ് ഏര്പ്പെടുത്തിയിരിക്കുന്നത്.
പാസില്ലാതെ കയറുന്നവര്ക്കും വ്യാജ പാസുകളുമായി എത്തുന്നവര്ക്കും പാസില്ലാതെ ബോട്ടിലും മറ്റും ആളുകളെ എത്തിക്കുന്നവര്ക്കുമെതിരെ കര്ശന നടപടി സ്വീകരിക്കും. വള്ളംകളി കഴിഞ്ഞ് നെഹ്റു പവലിയനില്നിന്ന് തിരികെ പോകുന്നവര്ക്കായി ജലഗതാഗത വകുപ്പിന്റെ യാത്രാ ബോട്ടുകള് ഏര്പ്പെടുത്തിയിട്ടുണ്ട്.
വള്ളംകളിയുടെ പ്രചാരണത്തിനായി എന്.ടി.ബി.ആര് സൊസൈറ്റിയും സബ് കമ്മിറ്റികളും വിവിധ വകുപ്പുകളും ഏജന്സികളും വിപുലമായ പരിപാടികള് സംഘടിപ്പിച്ചിരുന്നു. പൊതുജനങ്ങള്ക്കും വിദ്യാര്ഥികള്ക്കുമായി നടത്തിയ മത്സരങ്ങളില് വന് പങ്കാളിത്തമുണ്ടായി. നെഹ്റു ട്രോഫിയുടെ മാതൃകയും സഞ്ചരിക്കുന്ന ഫോട്ടോ പ്രദര്ശനവും ഉള്പ്പെടുന്ന ട്രോഫി ടൂറിന് വിവിധ കേന്ദ്രങ്ങളില് വള്ളംകളി ക്ലബ്ബുകളുടെയും വിദ്യാഭ്യാസ സ്ഥാപനങ്ങളുടെയും നേതൃത്വത്തില് ആവേശകരമായ സ്വീകരണം നല്കി.
Click it and Unblock the Notifications
Sign in with Google