ഒരിക്കൽ മുകേഷ് അംബാനിയേക്കാളും സമ്പന്നൻ, പിന്നീട് കടക്കെണിയിൽ; അനിലിന്റെ തിരിച്ചുവരവ് ഇങ്ങനെ

Updated: Tuesday, July 2, 2024, 16:27 [IST]

ഇന്ത്യയിലെ അതിസമ്പന്നന്മാരുടെ ചരിത്രമെടുത്താൽ അവരിൽ വിജയിച്ചവരുടെ പേരാണ് നാം കൂടുതലായി കാണുക. ജീവിതത്തിലും ബിസിനസിലെ ഒരുപോലെ പരാജയപ്പെട്ടവർ ഒട്ടനവധിയുണ്ട് നമുക്ക് മുൻപിൽ. എന്നാൽ അക്കൂട്ടത്തിൽ ലോക സമ്പന്ന പട്ടികയിലെ മുൻനിരയിൽ നിന്ന് കടക്കെണിയിലേക്ക് വീണുപോയ ചുരുക്കം ചിലരുടെ പേരേ ഉണ്ടാവൂ, അതിൽ ഒരാളാണ് അനിൽ അംബാനി.

ഇന്ന് ഇന്ത്യയിലെ ഏറ്റവും വലിയ സമ്പന്നനായ മുകേഷ് അംബാനിയുടെ സഹോദരനും പ്രമുഖ വ്യവസായി ധീരുഭായ് അംബാനിയുടെ മകനുമായ അംബാനിക്ക് ഇങ്ങനെയൊരു പരാജയവും തകർച്ചയും ആരും സ്വപ്‌നം കണ്ടിരുന്നില്ല. എന്നാൽ മുകേഷ് അംബാനിയേക്കാളും സമ്പന്നനായി അനിൽ വിലസിയിരുന്ന ഒരു കാലം ഉണ്ടായിരുന്നു എന്ന് പറഞ്ഞാൽ ചിലരെങ്കിലും ചിരിച്ചു തള്ളിയേക്കും, പക്ഷേ അതാണ് സത്യം.

പലർക്കും അറിയാത്ത അംബാനിമാരുടെ കഥ കൂടിയാണിത്. റിലയൻസ് സ്ഥാപകൻ ധീരുഭായ് അംബാനിയുടെ പെട്ടെന്നുള്ള വിയോഗം മുകേഷും അനിലും തമ്മിലുള്ള ഭിന്നതയ്ക്ക് കാണാമാവുകയായിരുന്നു. ഇതോടെ അന്ന് 15 ബില്യൺ യുഎസ് ഡോളറിന്റെ റിലയൻസ് സാമ്രാജ്യം രണ്ട് സഹോദരന്മാർക്കിടയിൽ ഭിന്നിക്കപ്പെട്ടു.

എന്നാൽ പ്രശ്‌നങ്ങൾക്ക് ഇടയിലും അനിൽ അംബാനി വളർന്നു കൊണ്ടിരുന്നു. അന്ന് മുകേഷ് അംബാനിയുടെ കമ്പനിയുടേതിനേക്കാൾ ദ്രുതഗതിയിൽ ആയിരുന്നു അനിൽ അംബാനിയുടെ കമ്പനിയുടെ വളർച്ച. 2008 ആയപ്പോഴേക്കും, അതായത് ധീരുഭായ് അംബാനിയുടെ മരണത്തിന് ആറ് വർഷത്തിന് ശേഷം, അനിൽ അംബാനി ആഗോള തലത്തിൽ ഏറ്റവും വലിയ ആറാമത്തെ സമ്പന്നനായി മാറിയിരുന്നു എന്നതാണ് ഞെട്ടിപ്പിക്കുന്ന ഒരു സത്യം.

അന്ന് ഏതാണ്ട് 42 ബില്യൺ യുഎസ് ഡോളറിന്റെ ആസ്‌തി ഉണ്ടായിരുന്നു അനിൽ അംബാനിക്ക്. റിലയൻസ് പവറിന്റെ ലിസ്‌റ്റിങാഗണ് ഈ കുതിച്ചുചാട്ടത്തിന് കാരണമായത്. അത് അക്കാലത്ത് ഇന്ത്യയിലെ ഏറ്റവും വലിയ പ്രാരംഭ പബ്ലിക് ഓഫറായി ചരിത്രം സൃഷ്‌ടിക്കുകയും ചെയ്‌തിരുന്നു. എന്നാൽ ഈ വളർച്ചയ്ക്ക് അധികം ആയുസ് ഉണ്ടായിരുന്നില്ല.

അനിലിന്റെ പെട്ടെന്നുണ്ടായ ഉയർച്ച ഒരുപാടൊന്നും നീണ്ടുനിന്നില്ല. പിന്നാലെ നിരവധി വിവാദങ്ങളും മോശം നിക്ഷേപ തിരഞ്ഞെടുപ്പുകളും അദ്ദേഹത്തിന്റെ അനിവാര്യമായ പതനത്തിലേക്ക് നയിക്കുകയായിരുന്നു. ഒടുവിൽ പാപ്പരത്തം പ്രഖ്യാപിക്കുന്നതിലേക്കും അഭിഭാഷകർക്ക് നൽകാൻ സ്വന്തം കടുംബത്തിന്റെ ആഭരണങ്ങൾ വിൽക്കേണ്ടി വരികയും ചെയ്യുന്ന സാഹചര്യവുമുണ്ടായി.

പക്ഷേ അതൊക്കെയും ഇപ്പോൾ പഴങ്കഥകളാണ്. അനിലിന്റെ ആസ്‌തി 42 ബില്യൺ ഡോളറിൽ നിന്ന് 1.7 ബില്യൺ ഡോളറായി കുത്തനെ ഇടിഞ്ഞുവന്നത് യാഥാർഥ്യം തന്നെയാണ്. എങ്കിലും ഇപ്പോൾ തന്റെ മക്കളുടെ കരുത്തിൽ തിരിച്ചുവരികയാണ് അനിൽ അംബാനി എന്ന അതികായൻ. ഈ വെല്ലുവിളികൾക്ക് ഇടയിലും തളരാൻ അവർ തയ്യാറായിരുന്നില്ല.

അനിലിന്റെ മക്കളായ ജയ് അൻമോൽ അംബാനിയും അൻഷുൽ അംബാനിയും തങ്ങളുടെ പിതാവിന്റെ ബിസിനസ് സാമ്രാജ്യം പുനരുജ്ജീവിപ്പിക്കാൻ കാര്യമായ ശ്രമങ്ങൾ നടത്തുകയാണ് ഇപ്പോൾ. ഇതിന്റെ ഭാഗമായി റിലയൻസ് ക്യാപിറ്റൽ പ്രവർത്തന വിജയം നേടുകയും റിലയൻസ് ഇൻഫ്രാസ്ട്രക്ചർ അതിന്റെ കടഭാരം ലഘൂകരിക്കുകയും ചെയ്‌തിട്ടുണ്ട്‌. ഇനിയും മെച്ചപ്പെട്ട നിലയിലേക്ക് കമ്പനിയെ വളർത്താനുള്ള ശ്രമത്തിലാണ് അച്ഛനും മക്കളും.