പാപ്പരായ അംബാനിയുടെ കുതിപ്പിന് പിന്നിലെ കരങ്ങൾ; ആരാണ് ജയ് അൻമോൽ അംബാനി? ആസ്‌തി 20,000 കോടി

അംബാനി എന്ന പേര് കേൾക്കുമ്പോൾ നമ്മുടെ മനസിൽ ആദ്യം ഓടിയെത്തുക മുകേഷ് അംബാനി എന്ന അതികായന്റെ രൂപം തന്നെയാവും. കഴിഞ്ഞ രണ്ട് പതിറ്റാണ്ടുകളായി ഇന്ത്യൻ സമൂഹത്തിന് മുന്നിൽ സമ്പത്തിന്റെ ഒരു പ്രതിരൂപം പോലെ അദ്ദേഹം നിറഞ്ഞു നിൽക്കുകയാണ്. എന്നാൽ അദ്ദേഹത്തിന്റെ സഹോദരനായ അനിൽ അംബാനിയെ കുറിച്ച് ഇപ്പോഴത്തെ തലമുറയ്ക്ക് അറിയില്ലെങ്കിലും അറിവുള്ളവർ ഒരിക്കലും അദ്ദേഹത്തെ തിരസ്‌കരിക്കില്ല.

ഒരുകാലത്ത് ലോക സമ്പന്ന പട്ടികയിൽ ആദ്യ സ്ഥാനങ്ങളിൽ തന്നെ ഇടം പിടിച്ചിരുന്ന, ആസ്‌തിയിൽ മുകേഷ് അംബാനിക്കും മുകളിൽ വിരാജിച്ചിരുന്ന ഒരു അനിൽ ഉണ്ടായിരുന്നു. ഇന്നതൊക്കെ ചരിത്രം മാത്രമാണ്. ഇടക്കാലത്ത് കടക്കെണിയിൽ മുങ്ങി പാപ്പരത്തത്തിന്റെ വക്കിലെത്തിയ ആൾ കൂടിയാണ് അദ്ദേഹം. എന്നാൽ അനിൽ അംബാനിയുടെ മടങ്ങിവരവ് തന്നെയാണ് അടുത്ത കാലത്തെ പ്രധാന വാർത്തകളിൽ ഒന്ന്.

പക്ഷേ ഈ തകർച്ചയുടെ പടുകുഴിയിൽ നിന്നും അനിൽ അംബാനിയുടെ മടങ്ങിവരവിന് ചുക്കാൻ പിടിച്ച ഒരാളുണ്ട്. അങ്ങനെ പൊതു മധ്യത്തിൽ ഒന്നും തന്നെ അധികം പ്രത്യക്ഷപ്പെടാത്ത, എന്നാൽ തന്റെ കർമ്മ മേഖലയിൽ മറ്റാർക്കും പിന്നിൽ അല്ലാത്ത ജയ് അൻമോൽ അംബാനി എന്ന യുവ ബിസിനസുകാരനാണ് അത്. അനിൽ അംബാനിയുടെ ഇപ്പോഴത്തെ തിരിച്ചുവരവിന് പിന്നിലെ പ്രധാന ശക്തി അൻമോൽ തന്നെയാണ്.

ജയ് അൻമോൽ അംബാനി

ഏകദേശം 20,000 കോടി രൂപയോളം ആസ്‌തിയുള്ള അദ്ദേഹത്തിന്റെ കഥ പലപ്പോഴും നിശ്ചയദാർഢ്യത്തിന്റെയും കഠിനാധ്വാനത്തിന്റെയും കൂടിയാണ്. അനിൽ അംബാനിയുടെ മൂത്ത മകനായ ജയ് അൻമോൽ അംബാനി പിതാവിന്റെ സമ്പത്തിൻ്റെ പുനരുജ്ജീവനത്തിലെ ഒരു നിർണായക ചാലകമായി പ്രവർത്തിച്ചു എന്ന് പറയുന്നതാവും ശരി.

2006-ൽ റിലയൻസ് ഇൻഡസ്ട്രീസ് ലിമിറ്റഡിന്റെ വേർപിരിയലിനെത്തുടർന്ന്, വലിയ സമ്പത്തും വിജയവുമായി ദീർഘകാലമായി മുന്നോട്ട് പോയിരുന്ന അനിൽ അംബാനിക്ക് കാര്യമായ തിരിച്ചടികൾ നേരിട്ടതോടെയായിരുന്നു അവരുടെ പതനം തുടങ്ങിയത്. ഒടുവിൽ 2020ലെ പാപ്പരത്ത പ്രഖ്യാപനം വരെ അത് നീണ്ടു.

എന്നാൽ അനിലിന്റെ മക്കളായ ജയ് അൻമോൽ, ജയ് അൻഷുൽ എന്നിവർ വിട്ടുകൊടുക്കാൻ ഒരുക്കമായിരുന്നില്ല. ചുമതല ഏറ്റെടുത്ത ശേഷം റിലയൻസ് ക്യാപിറ്റലിന്റെ ഓഹരി വില 40 ശതമാനം വർധിപ്പിച്ചുകൊണ്ട് പ്രമുഖ ജാപ്പനീസ് സ്ഥാപനമായ നിപ്പോണിൽ നിന്ന് അദ്ദേഹം ഗണ്യമായ നിക്ഷേപം നേടിയതോടെയാണ് അനിൽ അംബാനിയുടെ തിരിച്ചുവരവ് തുടങ്ങിയത്.

മുംബൈയിലെ കത്തീഡ്രലിലും ജോൺ കോണൺ സ്‌കൂളിലും വിദ്യാഭ്യാസം നേടിയ ജയ് അൻമോൽ പിന്നീട് യുകെയിലെ സെവെനോക്‌സ് സ്‌കൂളിൽ നിന്ന് വാർവിക്ക് ബിസിനസ് സ്‌കൂളിൽ സയൻസ് ബിരുദം നേടി. റിലയൻസ് ക്യാപിറ്റലിൽ തുടങ്ങിയ അദ്ദേഹത്തിന്റെ കരിയറിന് അൻമോലിന്റെ അക്കാദമിക് പശ്ചാത്തലം കാര്യമായ പിന്തുണ നൽകി.

കരിയർ പോലെ തന്നെ ജീവിത ശൈലിയും അത്യാവശ്യം ആഡംബര പൂർണമായി ജീവിച്ചു തീർക്കുന്ന വ്യക്തിയാണ് അൻമോൽ. ബാന്ദ്രയിൽ സ്ഥിതി ചെയ്യുന്ന അബോഡിലെ 17 നിലകളുള്ള ആഡംബര വസതിയിലാണ് അദ്ദേഹം താമസിക്കുന്നത്. ഏകദേശം 5,000 കോടി രൂപ വിലമതിക്കുന്ന ഈ സമ്പന്നമായ വസതിയിൽ ഹെലിപാഡും കൂറ്റൻ നീന്തൽക്കുളവും ഉൾപ്പെടെ അത്യാധുനിക സൗകര്യങ്ങളുണ്ട് എന്നാണ് റിപ്പോർട്ട്.

റോൾസ് റോയ്‌സ് ഫാൻ്റം, ലംബോർഗിനി ഗല്ലാർഡോ തുടങ്ങിയ ഉയർന്ന മോഡലുകൾ ഉൾപ്പെടെ അദ്ദേഹത്തിന്റെ കാർ കളക്ഷനും പേരുകേട്ടതാണ്. വ്യവസായിയും സാമൂഹിക പ്രവർത്തകയുമായ കൃഷ ഷായെയാണ് അദ്ദേഹം വിവാഹം കഴിച്ചത്.