ഇ-റുപ്പി സാധാരണക്കാർക്ക് വെല്ലുവിളിയോ..? യുപിഐയും കറൻസികളും അപ്രത്യക്ഷമാകുമോ..? അറിയേണ്ടതെല്ലാം

Published: Tuesday, January 16, 2024, 8:58 [IST]

രാജ്യത്ത് കഴിഞ്ഞ കാലങ്ങളിൽ ഏറ്റവുമധികം കേട്ട വാക്കുകളിൽ ഒന്നാണ് ഇ-റുപ്പി അഥവാ ഡിജിറ്റൽ കറൻസി. ഇന്ത്യയുടെ ഔദ്യോഗിക ക്രിപ്‌റ്റോ കറൻസി എന്ന് കൂടി ഇതിനെ വിളിക്കുന്നുണ്ട്. ആശയം അവതരിപ്പിച്ചിട്ട് ഒരു വർഷം പിന്നിട്ടപ്പോഴും ഇപ്പോഴും ഇതിനെ കുറിച്ചുള്ള ആശങ്കകളും, സംശയങ്ങളും നിലനിൽക്കുന്നു എന്നതാണ് യാഥാർഥ്യം.

പരീക്ഷണ പ്രവർത്തനങ്ങളിൽ എല്ലാം തന്നെ മികച്ച പ്രകടനം കാഴ്‌ചവയ്ക്കുന്ന ഇ-റുപ്പി അധികം വൈകാതെ സാധാരണക്കാരുടെ കൈകളിലേക്കും എത്തുമെന്നാണ് ലഭ്യമായ റിപ്പോർട്ട്. എസ്ബിഐ അടക്കമുള്ള ബാങ്കുകൾ ഇതോടകം ഇ-റുപ്പിക്ക് വേണ്ടി ആവശ്യമായ തയ്യാറെടുപ്പുകൾ നടത്തി കൊണ്ടിരിക്കുകയാണ് എന്നതും ശ്രദ്ധിക്കേണ്ടതാണ്.

എങ്കിലും അതിനെ കുറിച്ചുള്ള ഏറ്റവും വലിയ സംശയങ്ങളിൽ ഒന്ന് നിലവിൽ ഉപയോഗിച്ചു വരുന്ന നോട്ടുകളും (കറൻസി), യുപിഐയും അപ്രത്യക്ഷമാകുമോ എന്നത്. കൂടാതെ ഇത് സാധാരണക്കാർക്ക് എങ്ങനെ ഉപയോഗിക്കാൻ കഴിയും എന്ന ചോദ്യവും പല കോണുകളിൽ നിന്നും ഉയരുന്നുണ്ട്. എന്നാൽ ഇതിന് ഉത്തരം കിട്ടണമെങ്കിൽ നാം ആദ്യം തന്നെ അറിയേണ്ടത് എന്താണ് ഡിജിറ്റൽ കറൻസി എന്നും ഇ-റുപ്പി എങ്ങനെയാണ് പ്രവർത്തിക്കുക എന്നുമാണ്.

എന്താണ് ഡിജിറ്റൽ കറൻസി

പൂർണമായും ഇലക്ട്രോണിക് രൂപത്തിൽ ലഭ്യമായ ഏതൊരു കറൻസിയെയും ഡിജിറ്റൽ കറൻസി. കറൻസികളുടെ ഇലക്‌ട്രോണിക് രീതികൾ ഇതിനകം തന്നെ ഒരുപാട് രാജ്യങ്ങളുടെ ധനകാര്യ സംവിധാനങ്ങളിൽ ആധിപത്യം പുലർത്തുന്നു. ഡിജിറ്റൽ കറൻസി വെർച്വൽ മാർഗങ്ങളിലൂടെ മാത്രമായി കൈമാറ്റം ചെയ്യപ്പെടുന്ന ഒന്നാണ് അതിനർത്ഥം നിങ്ങളുടെ കമ്പ്യൂട്ടർ നെറ്റ്‌വർക്കിൽ നിന്ന് ഇത് പുറത്തുപോകില്ല. ക്രിപ്‌റ്റോകറൻസി, സെൻട്രൽ ബാങ്ക് ഡിജിറ്റൽ കറൻസി (സിബിഡിസി), സ്‌റ്റേബിൾകോയിനുകൾ എന്നിവയാണ് ഡിജിറ്റൽ കറൻസിയുടെ മൂന്ന് പ്രധാന വിഭാഗങ്ങൾ.

ഇ-റുപ്പി

സെൻട്രൽ ബാങ്ക് ഡിജിറ്റൽ കറൻസിയാണ് ഇന്ത്യയിൽ ഇ-റുപ്പി എന്നറിയപ്പെടുന്നത്. ക്രിപ്‌റ്റോ കറൻസികൾക്കു സമാനമായി ബ്ലോക്ക്‌ചെയിൽ സാങ്കേതികവിദ്യ ഉപയോഗിക്കുന്നതിനാലാണ് ഇതിനെ ക്രിപ്‌റ്റോ കറൻസിയുടെ കൂട്ടത്തിൽ ഉൾപ്പെടുത്തുന്നത്. ഭാരതീയ റിസർവ് ബാങ്ക് പുറത്തിറക്കുന്നത് കൊണ്ട് തന്നെ ഇത് ഇന്ത്യയുടെ ഔദ്യോഗിക ക്രിപ്‌റ്റോ കറൻസി എന്നും അറിയപ്പെടുന്നു.

നോട്ടുകൾക്കും യുപിഐക്കും വെല്ലുവിളിയോ..?

ഇ-റുപ്പിയുടെ കടന്നുവരവ് നോട്ടുകൾക്കും യുപിഐയ്ക്കും വെല്ലുവിളിയാകുമോ എന്ന സംശയത്തിന് അടിസ്ഥാനമില്ല എന്നതാണ് യാഥാർഥ്യം. സാധാരണ കറൻസികൾക്കുള്ള ഒരു ഡിജിറ്റൽ ബദലാണ് ഇ-റുപ്പി. കറൻസി രഹിത സമ്പദ്‌വ്യവസ്ഥ ലക്ഷ്യമിടുന്ന ഇന്ത്യയുടെ ഏറ്റവും വലിയ നീക്കങ്ങളിൽ ഒന്നാണിതെന്ന് നിസംശയം പറയാം. ഭാവിയിൽ കറൻസികൾ പൂർണമായും ഇല്ലാതായേക്കാം, എന്നാൽ നിലവിൽ അങ്ങനെയൊരു ഭയത്തിന്റെ ആവശ്യമില്ല.

യുപിഐയുടെ കാര്യത്തിലും ഏതാണ്ട് ഇത് തന്നെയാണ് അവസ്ഥ. ഇ-റുപ്പി നിലവിലെ കറൻസിയുടെ ഡിജിറ്റൽ രൂപമാണെന്ന് നേരത്തെ സൂചിപ്പിച്ചല്ലോ. യുപിഐ ആവട്ടെ ഒരു പേമെന്റ് മാർഗമാണ്. അതിനാൽ ഇ-റുപ്പിക്ക് കൂടുതൽ കാര്യങ്ങൾ ചെയ്യാൻ സാധിക്കും. ഇ-റുപ്പി ഒരിക്കലും യുപിഐയ്ക്ക് വെല്ലുവിളിയാകില്ല എന്ന് മാത്രം ഉറപ്പിച്ചുകൊള്ളുക. ആഗോള തലത്തിൽ ഇന്ത്യയുടെ യുപിഐ ശ്രദ്ധ നേടുന്ന സമയമായതിനാൽ തന്നെ യുപിഐയ്ക്ക് ദോഷം വരുന്ന ഒന്നും കേന്ദ്രം ചെയ്യില്ലെന്നും മനസിൽ ഉറപ്പിച്ചോളൂ.

Published On January 16, 2024