ഇടുക്കി മൂലമറ്റത്ത് ദമ്പതികള്‍ വെട്ടേറ്റ് മരിച്ചു, മകനായി പോലീസ് തിരച്ചില്‍

Updated: Thursday, December 21, 2023, 8:49 [IST]

മൂലമറ്റം: ഇടുക്കി മൂലമലറ്റത്ത് ദമ്പതികള്‍ വെട്ടേറ്റ് മരിച്ചു. ചേറാടി സ്വദേശി കുമാരന്‍ ഭാര്യ തങ്കമ്മ എന്നിവരാണ് കൊല്ലപ്പെട്ടത്. അതേസമയം ഇവരുടെ മകന്‍ അജേഷിന് വേണ്ടി പോലീസ് തിരച്ചില്‍ ആരംഭിച്ചു. ഇന്ന് രാവിലെയോടെയാണ് കുമാരനെ വീട്ടിനുള്ളില്‍ വെട്ടേറ്റ് മരിച്ചനിലയില്‍ കണ്ടെത്തിയത്. സമീപത്തെ കട്ടിലിന് അടിയില്‍ ഭാര്യ തങ്കമ്മയെയും ഗുരുതര പരിക്കുകളോടെ കണ്ടെത്തുകയായിരുന്നു. ഇവരോടൊപ്പമായിരുന്നു മകന്‍ താമസിച്ചിരുന്നത്.

ഇയാളെ ദുരൂഹ സാഹചര്യത്തില്‍ കാണാതായിരിക്കുകയാണ്. ഇയാള്‍ ഒളിവിലാണെന്നാണ് വിവരം. കുമാരനെയും തങ്കമ്മയെയും അന്വേഷിച്ച് ചെന്ന ബന്ധുക്കളാണ് ഇരുവരെയും വെട്ടേറ്റനിലയില്‍ കണ്ടെത്തിയത്. തങ്കമ്മയെ ഗുരുതരാവസ്ഥയില്‍ കട്ടിലിനടിയില്‍ നിന്ന് കണ്ടെത്തിയതിനെ തുടര്‍ന്ന് ബന്ധുക്കള്‍ മൂലമറ്റം പോലീസിനെ വിവരമറിയിക്കുകയായിരുന്നു. തങ്കമ്മയെ തൊടുപുഴ ജില്ലാ ആശുപത്രിയിലെത്തിച്ചു. ഇവിടെ നിന്ന് ഇവരെ കോട്ടയം മെഡിക്കല്‍ കോളേജ് ആശുപത്രിയിലേക്ക് കൊണ്ടുപോകും വഴിയാണ് മരിച്ചത്.

ഇവരുടെ മകന്‍ കുമളിയിലാണ് താമസിക്കുന്നത്. ഇന്നലെ രാത്രി ഇയാള്‍ ചേറാടിയിലെ വീട്ടിലുണ്ടായിരുന്നു. ഇവര്‍ തമ്മില്‍ ചില പ്രശ്‌നങ്ങളുണ്ടായിരുന്നതായി നാട്ടുകാര്‍ പറയുന്നു. കുടുംബ വഴക്കിനെ തുടര്‍ന്ന് അജേഷ് മാതാപിതാക്കളെ വെട്ടിയെന്നാണ് പോലീസിന്റെ നിഗമനം. കൊലപ്പെട്ട ദമ്പതിമാര്‍ തൊഴിലുറപ്പ് പദ്ധതിക്ക് പോകുന്നവരാണ്. മൃതദേഹം പോസ്റ്റുമോര്‍ട്ടം പൂര്‍ത്തിയാക്കി ബന്ധുക്കള്‍ക്ക് വിട്ടുകൊടുക്കും.

ചൊവ്വാഴ്ച്ച രാത്രി റോഡില്‍ വീണ് പരിക്കേറ്റ ഇവരുടെ മകന്‍ അജേഷിനെ അയല്‍വാസികള്‍ മൂലമറ്റത്തെ സ്വകാര്യ ആശുപത്രിയില്‍ എത്തിച്ച് പ്രാഥമിക ചികിത്സ ലഭ്യമാക്കിയിരുന്നു. തിരികെ വീട്ടിലെത്തിക്കുകയും ചെയ്തിരുന്നു. എന്നാല്‍ അതിന് ശേഷം ഇയാളെ കുറിച്ച് യാതൊരു വിവരുമില്ല. അജേഷിന്റെ മൊബൈല്‍ ഫോണും സ്വിച്ച് ഓഫാണ്. ഫോറന്‍സിക് വിഭാഗവും വിരലടയാള വിഭാഗവും നാളെ വീട്ടിലെത്തി പരിശോധന നടത്തും.