2025ൽ ഇതുവരെ യുഎസിൽ നിന്ന് നാടുകടത്തിയത് 388 ഇന്ത്യക്കാരെ; 295 പേരുടെ കാര്യം പരിഗണനയിലെന്നും കേന്ദ്രം

Published: Friday, March 21, 2025, 23:58 [IST]

ന്യൂഡൽഹി: ഈ വർഷം ജനുവരി മുതൽ ആകെ 388 ഇന്ത്യൻ പൗരന്മാരെ യുഎസിൽ നിന്ന് നാടുകടത്തിയതായി കേന്ദ്ര സർക്കാർ. പാർലമെന്റിലെ ചോദ്യത്തിന് നൽകിയ മറുപടിയിലാണ് കേന്ദ്രം ഇക്കാര്യം വ്യക്തമാക്കിയത്. ഇതിൽ 333 പേരെ ഫെബ്രുവരിയിൽ മൂന്ന് വ്യത്യസ്‌ത സൈനിക വിമാനങ്ങളിലായി യുഎസിൽ നിന്ന് നേരിട്ട് നാടുകടത്തിയതായാണ് കേന്ദ്ര സർക്കാർ സഭയിൽ അറിയിച്ചിരിക്കുന്നത്.

ഇതിന് പുറമേ വാണിജ്യ വിമാനങ്ങളിൽ പനാമ വഴി 55 ഇന്ത്യൻ പൗരന്മാരെ കൂടി അമേരിക്ക നാടുകടത്തിയതായി വിദേശകാര്യ സഹമന്ത്രി കീർത്തി വർധൻ സിംഗ് ലോക്‌സഭയിൽ രേഖാമൂലം നൽകിയ മറുപടിയിൽ പറയുന്നു. നേരത്തെ ഫെബ്രുവരിയിൽ ഒന്നിലധികം തവണയായി ഇന്ത്യക്കാരെ യുഎസ് നാട്ടിലേക്ക് അയച്ചിരുന്നു.

ഈ വർഷം യുഎസിൽ നിന്ന് നാടുകടത്തുന്ന വ്യക്തികളുടെ വിശദാംശങ്ങൾ കേന്ദ്ര സർക്കാരിന് ലഭിച്ചിട്ടുണ്ടോ എന്നും അവർക്ക് മതിയായ സൗകര്യങ്ങൾ നൽകാൻ യുഎസ് ഉദ്യോഗസ്ഥരോട് ആവശ്യപ്പെട്ടിട്ടുണ്ടോ എന്നുമായിരുന്നു വിദേശകാര്യ മന്ത്രാലയത്തോട് ഉന്നയിച്ച ചോദ്യം. ഇതിലാണ് ഇപ്പോൾ മറുപടി നൽകിയിരിക്കുന്നത്.

നാടുകടത്തപ്പെട്ട ഇന്ത്യക്കാരോട് കാണിച്ച മോശം പെരുമാറ്റം സംബന്ധിച്ച് പ്രധാനമന്ത്രി നരേന്ദ്ര മോദി പ്രസിഡന്റ് ഡൊണാൾഡ് ട്രംപിനോടും യുഎസ് ഉന്നത ഉദ്യോഗസ്ഥരോടും ആശങ്ക പ്രകടിപ്പിച്ചിട്ടുണ്ടോ എന്നും മന്ത്രാലയത്തോട് ചോദിച്ചിരുന്നു. നേരത്തെ തന്നെ ഇക്കാര്യത്തിൽ രൂക്ഷമായ വിമർശനം ഉയർന്നിരുന്നു.

'യുഎസ് ഇമിഗ്രേഷൻ ആൻഡ് കസ്‌റ്റംസ് എൻഫോഴ്‌സ്‌മെന്റ് അതോറിറ്റികൾ അടുത്തിടെ 295 പേരെ കൂടി കസ്‌റ്റഡിയിൽ എടുത്തിട്ടുണ്ട്, യുഎസിൽ നിന്ന് നാടുകടത്താനുള്ള അന്തിമ ഉത്തരവുകൾ ലഭിച്ചവരാണ് ഇവർ. വിദേശകാര്യ മന്ത്രാലയം, മറ്റ് ബന്ധപ്പെട്ട ഏജൻസികൾക്കൊപ്പം നിലവിൽ ഈ വ്യക്തികളുടെ വിശദാംശങ്ങൾ പരിശോധിച്ചു വരികയാണ്' കീർത്തിവർധൻ സിംഗ് വ്യക്തമാക്കി.

നാടുകടത്തപ്പെട്ടവരോട് മാനുഷികമായ പരിഗണന ആവശ്യപ്പെടുമ്പോഴും, നിയമവിരുദ്ധ കുടിയേറ്റത്തിനെതിരായ ഇന്ത്യയുടെ നിലപാട് സ്ഥിരമാണ്. കുറ്റവാളികൾ, നിയമവിരുദ്ധ കുടിയേറ്റ ശൃംഖലകൾ എന്നിവർക്കെതിരെ ശക്തമായ നടപടി സ്വീകരിച്ചുകൊണ്ട്, നിയമവിരുദ്ധ കുടിയേറ്റവും മനുഷ്യക്കടത്തും ശക്തമായി നേരിടുന്നതിന് അടുത്ത സഹകരണം ആവശ്യമാണെന്ന് ഇരുപക്ഷവും അംഗീകരിച്ചു; വിദേശകാര്യ മന്ത്രാലയം വ്യക്തമാക്കി.

നേരത്തെ ഫെബ്രുവരി 5ന് അമൃത്സർ വിമാനത്താവളത്തിൽ വന്നിറങ്ങിയ യുഎസ് വ്യോമസേനയുടെ സി-17 ഗ്ലോബ് മാസ്‌റ്റർ വിമാനത്തിൽ 104 ഇന്ത്യൻ കുടിയേറ്റക്കാരുടെ സംഘത്തെ അമേരിക്ക നാടുകടത്തിയിരുന്നു.
അനധികൃത കുടിയേറ്റക്കാർക്കെതിരായ നടപടികളുടെ ഭാഗമായി ഡൊണാൾഡ് ട്രംപ് ഭരണകൂടം നാടുകടത്തിയ ആദ്യ ഇന്ത്യൻ കുടിയേറ്റക്കാരുടെ സംഘമായിരുന്നു ഇത്. കൈവിലങ്ങ് ഉൾപ്പെടെ അണിയിച്ചാണ് ഇവരെ കൊണ്ട് വന്നത്. ഇത് വലിയ പ്രതിഷേധത്തിന് ഇടയാക്കിയിരുന്നു.

Published On March 21, 2025