ഇന്ത്യ-പാക് പ്രശ്‌നത്തിന് കാരണം രാഷ്ട്രീയക്കാര്‍ ജനങ്ങള്‍ക്ക് പരസ്പര സ്‌നേഹം മാത്രം: സണ്ണി ഡിയോള്‍

Updated: Friday, July 28, 2023, 8:18 [IST]

മുംബൈ: ഇന്ത്യ-പാകിസ്താന്‍ പ്രശ്‌നത്തില്‍ ബിജെപി എംപിയും നടനുമായ സണ്ണി ഡിയോളിന്റെ പരാമര്‍ശം വൈറല്‍. ഇന്ത്യയിലെയും പാകിസ്താനിലെയും ജനങ്ങള്‍ പരസ്പരം വെറുക്കുന്നില്ല. അവര്‍ പരസ്പരം ഇഷ്ടപ്പെടുന്നവരാണ്. അവര്‍ സ്‌നേഹവും സമാധാനവുമാണ് ആഗ്രഹിക്കുന്നത്. എന്നാല്‍ രാഷ്ട്രീയ പാര്‍ട്ടികളാണ് ഇത് വഷളാക്കുന്നത്. അവരാണ് വിദ്വേഷം വളര്‍ത്തുന്നതെന്നും സണ്ണി ഡിയോള്‍ പറഞ്ഞു.

ഇന്ത്യയിലെയും, പാകിസ്താനിലെയും ജനങ്ങള്‍ പരസ്പരം ഇഷ്ടപ്പെടുന്നവരാണെന്നും സണ്ണി ഡിയോള്‍ പറഞ്ഞു. പുതിയ ചിത്രമായ ഗദര്‍ ടുവിന്റെ പ്രമോഷന്റെ സമയത്തായിരുന്നു സണ്ണിയുടെ പരമര്‍ശം. അതേസമയം പരാമര്‍ശം വിവാദമായിരിക്കുകയാണ്. ബിജെപി പാകിസ്താനുമായി ചര്‍ച്ചയില്ലെന്ന നിലപാടിലാണ്. കേന്ദ്ര സര്‍ക്കാരിന്റെ നിലപാടിന് വിഭിന്നമായ കാര്യമാണ് അദ്ദേഹം പറഞ്ഞിരിക്കുന്നത്.

ഗദ്ദറില്‍ പാകിസ്താനില്‍ നിന്നുള്ള ശത്രുക്കളെ സണ്ണി ഡിയോള്‍ നേരിടുന്നതാണ് ഉള്ളത്. താരാ സിംഗിന്റെയും, സക്കീനയുടെയും പ്രണയത്തെ ആസ്പദമാക്കി എടുത്ത ഗദ്ദര്‍ എന്ന ഇതിഹാസ ചിത്രത്തിന്റെ രണ്ടാം ഭാഗമാണിത്. ഇതില്‍ മകനെ രക്ഷിക്കാനായി പാകിസ്താനിലേക്ക് പോകുന്ന താരാ സിംഗിനെയാണ് സണ്ണി ഡിയോള്‍ അവതരിപ്പിക്കുന്നത്. ഇന്ത്യക്കോ, പാകിസ്താനോ പരസ്പരം പോരടിക്കണമെന്നില്ല. ഇരുരാജ്യങ്ങളിലെയും ജനങ്ങള്‍ യുദ്ധം ആഗ്രഹിക്കാത്തവരാണെന്നും സണ്ണി പറഞ്ഞു.

എല്ലാത്തിലും വലുത് മനുഷ്യത്വമാണ്. ഒരു പ്രശ്‌നവും ഇന്ത്യയോ പാകിസ്താനോ തമ്മില്‍ ഉണ്ടാവാന്‍ പാടില്ല. പരസ്പര സ്‌നേഹമാണ് ഇരുപക്ഷത്ത് നിന്നുമുള്ളത്. വിദ്വേഷം ജനിപ്പിക്കുന്നത് രാഷ്ട്രീയക്കാരാണ്. അവരാണ് ഇതിനെ മുന്നോട്ട് കൊണ്ടുപോകുന്നത്. ഈ സിനിമയിലും അക്കാര്യം നിങ്ങള്‍ക്ക് കാണാന്‍ സാധിക്കും. ഇരുരാജ്യത്തുമുള്ള ജനങ്ങള്‍ക്ക് പരസ്പരം പോരടിക്കുന്നത് കാണാന്‍ ആഗ്രഹമില്ല. നമ്മളെല്ലാം ഒരു രാജ്യത്ത് നിന്നുള്ളവരാണെന്നും സണ്ണി ഡിയോള്‍ പറഞ്ഞു.

അതേസമയം പഞ്ചാബിലെ ഗുര്‍ദാസ്പൂരില്‍ നിന്നുള്ള ബിജെപിയുടെ എംപിയാണ് അദ്ദേഹം. സൂപ്പര്‍ താരം ധര്‍മേന്ദ്രയുടെ മകന്‍ കൂടിയാണ് സണ്ണി ഡിയോള്‍. ഇത്രയും കാലമായിട്ടും ആളുകള്‍ ഗദ്ദറിനെ മറക്കാതിരിക്കുന്നതില്‍ തനിക്ക് പ്രേക്ഷനോട് നന്ദിയുണ്ട്. ഈ ചിത്രത്തിനൊരു രണ്ടാം ഭാഗം എടുക്കുന്നു എന്ന് കേട്ടപ്പോള്‍ ഒരുപാട് ഭയന്നിരുന്നു. കാരണം സമ്പൂര്‍ണമായ ഒരു ചിത്രത്തിന് രണ്ടാം ഭാഗം എങ്ങനെയാണ് ഉണ്ടാക്കാനാവുക.

അനുയോജ്യമായ ഒരു കഥ ലഭിച്ചത് കൊണ്ടാണ് ഇപ്പോള്‍ ചിത്രത്തിന്റെ രണ്ടാം ഭാഗം റിലീസ് ചെയ്യുന്നതെനനും സണ്ണി ഡിയോള്‍ പറഞ്ഞു. ഗദറിലെ കഥാപാത്രങ്ങളുടെ ലാളിത്യമാണ് കഥാപാത്രത്തെ ഇപ്പോഴും ആളുകള്‍ ഓര്‍ത്തിരിക്കാന്‍ കാരണം. കുടുംബത്തെ ഒരുപാട് ഇഷ്ടപ്പെടുന്നയാളാണ് താരാ സിംഗ് എന്നും സണ്ണി പറഞ്ഞു.