ബോളിവുഡ് ഇതിഹാസം ധർമ്മേന്ദ്ര അന്തരിച്ചു; വിടവാങ്ങിയത് ആരാധകരുടെ സ്വന്തം ഹി-മാൻ

Updated: Monday, November 24, 2025, 14:17 [IST]

മുംബൈ: ബോളിവുഡിന്റെ ഇതിഹാസ താരം ധർമ്മേന്ദ്ര അന്തരിച്ചു. 89-ആം വയസിലാണ് ഹി-മാൻ, ധരം പാജി എന്നിങ്ങനെ ആരാധകർ സ്നേഹത്തോടെ വിളിച്ചിരുന്ന ധർമ്മേന്ദ്രയുടെ വിയോഗം. ഐഎൻഎസ് ആണ് ഈ വാർത്ത പുറത്തുവിട്ടത്. ആറു പതിറ്റാണ്ടിലേറെ നീണ്ട അഭിനയ ജീവിതത്തിലൂടെ ഇന്ത്യൻ സിനിമയിൽ മായാത്ത മുദ്ര പതിപ്പിച്ച ശേഷമാണ് അദ്ദേഹം വിടവാങ്ങുന്നത്.

മുംബൈയിലെ വസതിയിൽ വെച്ചായിരുന്നു ധർമ്മേന്ദ്ര സിംഗ് ഡിയോൾ എന്ന ധർമ്മേന്ദ്രയുടെ അന്ത്യം. അദ്ദേഹത്തിന്റെ ആരോഗ്യനില അടുത്തിടെയായി വഷളായിരുന്നു. അതിനിടെ പലവട്ടം അദ്ദേഹത്തിന്റെ മരണവാർത്ത സോഷ്യൽ മീഡിയയിൽ പ്രചരിക്കുകയും ചെയ്‌തിരുന്നു. ഒക്ടോബർ 31, 2025ന് ബ്രീച്ച് കാൻഡി ആശുപത്രിയിൽ ചികിത്സയ്ക്കായി പ്രവേശിപ്പിച്ച അദ്ദേഹത്തിന്റെ നില നവംബർ 10ഓടെ വഷളായിരുന്നു.

അസുഖബാധിതനായി ചികിത്സയിൽ കഴിയവേ സൽമാൻ ഖാൻ ഉൾപ്പെടെ നിരവധി താരങ്ങൾ അദ്ദേഹത്തെ ആശുപത്രിയിൽ സന്ദർശിച്ചിരുന്നു. ധർമ്മേന്ദ്രയുടെ അന്ത്യകർമ്മങ്ങൾക്കായി ഭാര്യ ഹേമ മാലിനിയും മകൾ ഇഷ ഡിയോളും പവൻ ഹൻസ് ശ്‌മശാന കേന്ദ്രത്തിൽ എത്തിച്ചേർന്നു. കുടുംബാംഗങ്ങളും സുഹൃത്തുക്കളും സഹപ്രവർത്തകരും അന്തിമോപചാരം അർപ്പിക്കാൻ ഇവിടെ ഒത്തുചേർന്നിട്ടുണ്ട്.

ധർമ്മേന്ദ്രയുടെ മുംബൈയിലെ വീട്ടിലേക്ക് ആംബുലൻസ് എത്തിയത് മുതൽ സിനിമാ ലോകത്തും ആരാധകർക്കിടയിലും ആശങ്ക പടരുകയും അദ്ദേഹത്തിന്റെ ആരോഗ്യനിലയുമായി ബന്ധപ്പെട്ട അഭ്യൂഹങ്ങൾ പ്രചരിക്കുകയും ചെയ്‌തിരുന്നു. വീടിന് പുറത്ത് ബാരിക്കേഡുകൾ സ്ഥാപിക്കുകയും ആംബുലൻസ് പിന്നീട് ആശുപത്രിയിലേക്ക് പോവുകയും ചെയ്‌തിരുന്നു.

ആരോഗ്യപരമായ കാരണങ്ങളാൽ ബ്രീച്ച് കാൻഡി ആശുപത്രിയിൽ ചികിത്സയിലായിരുന്ന അദ്ദേഹം ദിവസങ്ങൾക്ക് മുൻപാണ് വീട്ടിൽ തിരിച്ചെത്തിയത്. അദ്ദേഹത്തിന്റെ ആരോഗ്യനില മെച്ചപ്പെടാനായി എല്ലാവരും പ്രാർത്ഥിച്ചിരുന്നെങ്കിലും സ്ഥിതി വഷളാവുകയും മരണം സംഭവിക്കുകയുമായിരുന്നു. കുടുംബാംഗങ്ങൾ എല്ലാവരും അദ്ദേഹത്തിന് ഒപ്പം തന്നെയുണ്ടായിരുന്നു.

ഹൃദയഭേദകമായ വാർത്ത പുറത്തുവന്നതിന് പിന്നാലെ നിരവധി ബോളിവുഡ് താരങ്ങളും അടുത്ത സുഹൃത്തുക്കളും അദ്ദേഹത്തിന്റെ മുംബൈയിലെ വസതിയിൽ അന്തിമോപചാരം അർപ്പിക്കാൻ എത്തിച്ചേർന്നു. വീടിന് പുറത്ത് ആരാധകരും മറ്റുള്ളവരുടെ തടിച്ചുകൂടിയതോടെ അന്തരീക്ഷം ദുഃഖസാന്ദ്രമായി.

1950-കളുടെ അവസാനത്തിൽ സിനിമാ ജീവിതം ആരംഭിച്ച ധർമ്മേന്ദ്ര, ഷോളേ, ഫൂൽ ഔർ പത്തർ, ചുപ്കെ ചുപ്കെ, സത്യകാമ്, സീതാ ഔർ ഗീതാ, യാദോം കി ബാരാത് തുടങ്ങിയ സിനിമകളിലൂടെയാണ് ഇന്ത്യൻ സിനിമയിൽ തന്റേതായ ഇടം നേടിയത്. അദ്ദേഹത്തിന്റെ ആകർഷകമായ വ്യക്തിത്വവും വൈവിധ്യമാർന്ന അഭിനയവും ശക്തമായ വെള്ളിത്തിരയിലെ സാന്നിധ്യവും ആരാധകരുടെ പ്രിയങ്കരനാക്കി മാറ്റിയിരുന്നു.

ആക്ഷൻ, പ്രണയം, കോമഡി, വൈകാരികമായ വേഷങ്ങൾ എന്നിവയിലെല്ലാം അദ്ദേഹം മികവ് പുലർത്തിയതിനാൽ സൂപ്പർതാര പദവി വൈകാതെ തേടിയെത്തി. ധർമ്മേന്ദ്രയുടെ വിയോഗം ഇന്ത്യൻ സിനിമയ്ക്ക് നികത്താനാവാത്ത ഒരു നഷ്‌ടം തന്നെയാണ്. സോഷ്യൽ മീഡിയയിൽ ഉൾപ്പെടെ നിരവധി ആരാധകരാണ് അദ്ദേഹത്തിന് ആദരാഞ്ജലി നേരുന്നത്.