അദാനി എയർപോർട്ട് ഹോൾഡിംഗ്സിന് വൻ നേട്ടം; 'പ്രിക്സ് വെർസെയിൽസ്' 2026 പട്ടികയിൽ 2 വിമാനത്താവളങ്ങൾ
ന്യൂഡൽഹി: ആഗോള തലത്തിൽ തന്നെ സുപ്രധാന നേട്ടവുമായി അദാനി എയർപോർട്ട് ഹോൾഡിംഗ്സ് ലിമിറ്റഡ് (എഎഎച്ച്എൽ). കമ്പനിക്ക് കീഴിലുള്ള നവി മുംബൈ ഇന്റർനാഷണൽ എയർപോർട്ടും ഗുവാഹത്തിയിലെ ലോകപ്രിയ ഗോപിനാഥ് ബോർഡോളോയ് ഇന്റർനാഷണൽ എയർപോർട്ടിന്റെ ടെർമിനൽ രണ്ടും 'പ്രിക്സ് വെർസെയിൽസ്' 2026-ലെ ലോകത്തിലെ ഏറ്റവും മനോഹരമായ വിമാനത്താവളങ്ങളുടെ പട്ടികയിൽ ഇടം നേടിയതോടെയാണ് ഇത്.
സുസ്ഥിരത, സംസ്കാരം, മികച്ച യാത്രാനുഭവം എന്നിവ സമന്വയിപ്പിച്ച ശിൽപകലയുടെ മികവിനാണ് ഈ അംഗീകാരം. ആധുനിക വിമാനത്താവള രൂപകൽപ്പനയിൽ ഇന്ത്യയുടെ വളരുന്ന ആഗോള നേതൃത്വത്തെയും ഇത് അടിവരയിടുന്നു. ഇന്ത്യയുടെ വിമാനയാന അടിസ്ഥാനസൗകര്യ മേഖലയ്ക്ക് ലഭിക്കുന്ന വലിയ അന്താരാഷ്ട്ര അംഗീകാരം കൂടിയാണിത്. ഈ മേഖലയിൽ നൽകി വരുന്ന വാർഷിക പുരസ്കാരമാണ് പ്രിക്സ് വെർസെയിൽസ്.
സാമ്പത്തിക വളർച്ചയ്ക്കും വിനോദസഞ്ചാര വികസനത്തിനും പ്രാദേശിക പുരോഗതിക്കും സഹായകമായ അടുത്ത തലമുറ വിമാനത്താവളങ്ങൾ വികസിപ്പിക്കാനുള്ള അദാനി എയർപോർട്ട് ഹോൾഡിംഗ്സ് ലിമിറ്റഡിന്റെ പ്രതിബദ്ധതയ്ക്ക് ലഭിച്ച അംഗീകാരമാണ് ഈ പുരസ്കാരമെന്നാണ് കമ്പനി വ്യക്തമാക്കിയത്. 2015 മുതൽ പാരീസിലെ യുനെസ്കോ ആസ്ഥാനത്ത് പ്രതിവർഷം സമ്മാനിക്കുന്ന പ്രിക്സ് വെർസെയിൽസ് പുരസ്കാരങ്ങൾ ലോകമെമ്പാടുമുള്ള മികച്ച സമകാലിക ശിൽപകലാ സൃഷ്ടികളെ ആദരിക്കുന്നവയാണ്.
വ്യോമയാന വിഭാഗത്തിൽ പ്രവർത്തനക്ഷമത, സൗന്ദര്യം, സുസ്ഥിരത എന്നിവ സമന്വയിപ്പിക്കുന്ന പുതിയ വിമാനത്താവളങ്ങൾക്കും ടെർമിനലുകൾക്കുമാണ് ഈ അംഗീകാരം നൽകുന്നത്. ആധുനിക വിമാനത്താവളങ്ങൾ വെറും യാത്രാ കേന്ദ്രങ്ങൾ മാത്രമല്ല, യാത്രക്കാർക്ക് കൂടുതൽ സമ്പന്നവും ആകർഷകവുമായ അനുഭവം സമ്മാനിക്കുന്ന പ്രതീകാത്മക കേന്ദ്രങ്ങളായി മാറിക്കൊണ്ടിരിക്കുകയാണെന്ന് അവാർഡ് കമ്മിറ്റി വിലയിരുത്തി.
താമരപ്പൂവിൽ നിന്ന് പ്രചോദനം ഉൾക്കൊണ്ട നവി മുംബൈ വിമാനത്താവളം
നവി മുംബൈ ഇന്റർനാഷണൽ എയർപോർട്ടിന്റെ ടെർമിനൽ 1-ന് താമരപ്പൂവിൽ നിന്ന് പ്രചോദനം ഉൾക്കൊണ്ട പ്രത്യേക ശിൽപകല, ഭാവിമുഖമായ രൂപകൽപ്പന, സാങ്കേതികവിദ്യ, കല, പ്രവർത്തനക്ഷമത എന്നിവയുടെ മികച്ച സംയോജനം എന്നിവയ്ക്കാണ് അംഗീകാരം ലഭിച്ചത്. ഇന്ത്യയുടെ ആഗോള സാമ്പത്തിക ശക്തിയിലേക്കുള്ള മുന്നേറ്റത്തെ പ്രതിഫലിപ്പിക്കുന്ന ആധുനിക കവാടമായി ഈ വിമാനത്താവളം രൂപകൽപ്പന ചെയ്തിട്ടുണ്ടെന്നും യാത്രക്കാർക്ക് ലോകോത്തര അനുഭവം നൽകുകയെന്നതാണ് ലക്ഷ്യമെന്നും കമ്മിറ്റി വിലയിരുത്തി.
വടക്കുകിഴക്കൻ ഇന്ത്യയുടെ ജൈവവൈവിധ്യം അടയാളപ്പെടുത്തിയ ഗുവാഹത്തി ടെർമിനൽ 2
ഗുവാഹത്തിയിലെ ലോകപ്രിയ ഗോപിനാഥ് ബോർഡോളോയ് ഇന്റർനാഷണൽ എയർപോർട്ടിന്റെ ടെർമിനൽ 2-ന് "ബാംബൂ ഓർക്കിഡ്" എന്ന ആശയത്തിൽ നിന്ന് പ്രചോദനം ഉൾക്കൊണ്ട ശിൽപകലയുടെ മികവിനാണ് അംഗീകാരം ലഭിച്ചത്. വടക്കുകിഴക്കൻ ഇന്ത്യയുടെ സമ്പന്നമായ ജൈവവൈവിധ്യത്തിന്റെ പ്രതീകമായാണ് ഈ രൂപകൽപ്പന.
സുസ്ഥിരതയും പ്രവർത്തനക്ഷമതയും ഒരുമിപ്പിക്കുന്ന ഈ ടെർമിനലിൽ പ്രകൃതിയുമായി യാത്രക്കാരെ ബന്ധിപ്പിക്കുന്ന ബയോഫിലിക് ഡിസൈൻ ഘടകങ്ങളും ഉൾപ്പെടുത്തിയിട്ടുണ്ട്. ഇതിലൂടെ വടക്കുകിഴക്കൻ ഇന്ത്യയുടെ പ്രകൃതി പൈതൃകവും സാംസ്കാരിക പാരമ്പര്യവും ഇവിടെ എത്തുന്നവർക്ക് അനുഭവിക്കാൻ അവസരം ലഭിക്കുന്നു.
2026-ലെ പ്രിക്സ് വെർസെയിൽസ് പട്ടികയിൽ ഉൾപ്പെട്ട മറ്റ് വിമാനത്താവളങ്ങളും ടെർമിനലുകളും:
ഗ്വാങ്ഷൗ, ചൈന
ഫ്രാങ്ക്ഫർട്ട് ആം മൈൻ, ജർമനി
കണ്ടാൽ സ്റ്റുവെങ്, കംബോഡിയ
പിറ്റ്സ്ബർഗ്, അമേരിക്ക
സാൻ ഡിയാഗോ, അമേരിക്ക
പരിസ്ഥിതി ഉത്തരവാദിത്തവും സാംസ്കാരിക ആവിഷ്കാരവും തമ്മിൽ സന്തുലിതാവസ്ഥ പുലർത്തുന്ന "ഇന്റലിജന്റ് സസ്റ്റൈനബിലിറ്റി" എന്ന ആശയത്തെയാണ് പ്രിക്സ് വെർസെയിൽസ് പുരസ്കാരങ്ങൾ പ്രോത്സാഹിപ്പിക്കുന്നത്.
ഈ വർഷം ഷോർട്ട്ലിസ്റ്റിൽ ഉൾപ്പെട്ട വിമാനത്താവളങ്ങളിൽ നിന്ന് മൂന്ന് വിമാനത്താവളങ്ങളോ ടെർമിനലുകളോ ഈ വർഷാവസാനം പ്രിക്സ് വെർസെയിൽസ്, ഇന്റീരിയർ, എക്സ്റ്റീരിയർ വിഭാഗങ്ങളിലെ പരമോന്നത ബഹുമതികൾ നേടും.
ഈ പുതിയ അംഗീകാരം അദാനി എയർപോർട്ട് ഹോൾഡിംഗ്സിനെ വിമാനത്താവള രൂപകൽപ്പനയിലെ ആഗോള മുൻനിര സ്ഥാപനങ്ങളിലൊന്നായി ഉയർത്തുന്നതോടൊപ്പം, ഭാവിയിലെ വിമാനയാന അടിസ്ഥാനസൗകര്യ വികസനത്തിൽ ഇന്ത്യയുടെ വർധിച്ചുവരുന്ന സ്വാധീനത്തെയും വ്യക്തമാക്കുന്നു.
Click it and Unblock the Notifications
Sign in with Google