ഐഎസ്എസ്ഒയുമായി കൈകോർത്ത് അദാനി ഇന്റർനാഷണൽ സ്കൂൾ; രാജ്യത്തെ കായിക വിദ്യാഭ്യാസ മേഖല കുതിച്ചുയരും
രാജ്യത്തെ അന്താരാഷ്ട്ര വിദ്യാലയങ്ങളിലെ കായിക വിദ്യാഭ്യാസ മേഖലയ്ക്ക് കരുത്തേകാൻ അദാനി ഇന്റർനാഷണൽ സ്കൂളും ഇന്റർനാഷണൽ സ്കൂൾസ് സ്പോർട്സ് ഓർഗനൈസേഷനും (ഐഎസ്എസ്ഒ) തമ്മിൽ കൈകോർക്കുന്നു. വിദ്യാർത്ഥികളായ കായികതാരങ്ങളെ വളർത്തുന്നതിനും ആഗോള കായിക മത്സരങ്ങളിൽ അവരുടെ പങ്കാളിത്തം ഉറപ്പാക്കുന്നതിനുമാണ് ഈ സഹകരണം ലക്ഷ്യമിടുന്നത്.
ഇന്ത്യൻ അന്താരാഷ്ട്ര സ്കൂൾ കായിക രംഗത്തിന് ഈ നീക്കം വലിയ ഊർജ്ജം നൽകുമെന്നാണ് വിലയിരുത്തുന്നത്. അദാനി ഇന്റർനാഷണൽ സ്കൂളിന്റെ പ്രൊമോട്ടറും ഐഎസ്എസ്ഒയുടെ ഉപദേശക സമിതിയിലെ പുതിയ അംഗവുമായ നമ്പ്രത അദാനിയാണ് ഈ സംരംഭത്തിന് നേതൃത്വം നൽകുന്നത്. ഐഎസ്എസ്ഒയുടെ ദീർഘകാല ലക്ഷ്യങ്ങളും കാഴ്ചപ്പാടുകളും രൂപപ്പെടുത്തുന്നതിൽ അവർക്ക് നിർണായക പങ്കുണ്ട്.
2017-ൽ സ്ഥാപിതമായ ഐഎസ്എസ്ഒ ഇന്റർനാഷണൽ ബാക്കലോറിയേറ്റ് (ഐബി), കേംബ്രിഡ്ജ് എഡെക്സൽ, യുഎസ്. ആസ്ഥാനമായുള്ള നാഷണൽ സ്കൂൾ ബോർഡ്സ് അസോസിയേഷൻ (എൻഎസ്ബിഎ) തുടങ്ങിയ ആഗോള അംഗീകൃത ബോർഡുകളുമായി അഫിലിയേറ്റ് ചെയ്ത അന്താരാഷ്ട്ര പാഠ്യപദ്ധതി സ്കൂളുകൾക്കായുള്ള ഇന്ത്യയിലെ ഏക കായിക സംഘടനയാണ്.
430ലധികം സ്കൂളുകളിലും 22 കായിക ഇനങ്ങളിലുമായി പ്രതിവർഷം 300ൽ അധികം ടൂർണമെന്റുകൾ സംഘടിപ്പിച്ച് 22,000ത്തിലധികം വിദ്യാർത്ഥികളിൽ ഐഎസ്എസ്ഒ സ്വാധീനം ചെലുത്തിയിട്ടുണ്ട്. ഇത് സ്കൂൾ തലത്തിലെ കായിക മികവിന് ഒരു മാതൃകയായി മാറുന്നു. അതിനാൽ തന്നെ ഇരു കൂട്ടരുമായുള്ള സഹകരണം കായിക വിദ്യാർത്ഥികൾക്ക് ഏറെ ഗുണം ചെയ്യുമെന്ന് ഉറപ്പാണ്.
മറുവശത്ത് വിദ്യാർത്ഥികളുടെ സമഗ്ര വികസനത്തിൽ ശ്രദ്ധ കേന്ദ്രീകരിക്കുന്ന അദാനി ഇന്റർനാഷണൽ സ്കൂൾ, ഈ സഹകരണത്തിലൂടെ ഐഎസ്എസ്ഒയ്ക്ക് കായിക അടിസ്ഥാന സൗകര്യങ്ങൾ വർധിപ്പിക്കുന്നതിനും കായിക താരങ്ങൾക്ക് മികച്ച പരിശീലനം നൽകുന്നതിനും ആഗോള മത്സരങ്ങളിൽ പങ്കാളിത്തം പ്രോത്സാഹിപ്പിക്കുന്നതിനും ആവശ്യമായ പിന്തുണ നൽകും.
അക്കാദമിക മികവും കായിക വിദ്യാഭ്യാസവും സമന്വയിപ്പിക്കാനുള്ള അദാനി സ്കൂളിന്റെ ശ്രമം, സമഗ്ര വ്യക്തിത്വമുള്ള വിദ്യാർത്ഥി-കായികതാരങ്ങളെ വളർത്തുക എന്ന ഐഎസ്എസ്ഒയുടെ ലക്ഷ്യത്തിന് ശക്തി പകരുന്നു. 'കായികരംഗത്തിലൂടെ യുവജന ശാക്തീകരണം എന്ന ഞങ്ങളുടെ പൊതുവായ കാഴ്ചപ്പാടിന്റെ ഭാഗമായി ശ്രീമതി. നമ്പ്രത അദാനിയെയും അദാനി ഗ്രൂപ്പിനെയും സ്വാഗതം ചെയ്യുന്നതിൽ ഞങ്ങൾ അതീവ സന്തുഷ്ടരാണ്' ഐഎസ്എസ്ഒ ഡയറക്ടർ ആകാംഷ ഥാപക് പറഞ്ഞു.
'വർഷങ്ങളായി, ഐഎസ്എസ്ഒ അന്താരാഷ്ട്ര സ്കൂൾ വിദ്യാർത്ഥികൾക്ക് കായികരംഗത്ത് വളർന്നു വരാൻ ഒരു ഘടനാപരമായ പാത ഒരുക്കിയിട്ടുണ്ട്- അടിസ്ഥാനതലം മുതൽ ദേശീയ, അന്താരാഷ്ട്ര തലങ്ങൾ വരെ. നമ്പ്രത അദാനിയുടെ നേതൃത്വവും ദീർഘവീക്ഷണവും ഞങ്ങൾ സൃഷ്ടിച്ച ഈ സംവിധാനത്തെ കൂടുതൽ ശക്തിപ്പെടുത്തും. കായിക രംഗത്ത് കൂടുതൽ സാധ്യതകൾ ഉണ്ടാക്കാനും ആയിരക്കണക്കിന് യുവ കായികതാരങ്ങളെ പ്രചോദിപ്പിക്കാനും ഞങ്ങൾ ഒരുമിച്ച് ഉറ്റുനോക്കുന്നു' അവർ കൂട്ടിച്ചേർത്തു.
'ഇന്ത്യയുടെ വിദ്യാഭ്യാസ, കായിക മേഖലകളിൽ ഒരു വഴിത്തിരിവിലാണ് നമ്മൾ' അദാനി ഗ്രൂപ്പിന്റെ പ്രതിനിധിയായ നമ്പ്രത അദാനി പ്രസ്താവനയിൽ പറഞ്ഞു. 'ഈ സഹകരണത്തിലൂടെ, ക്ലാസ് മുറികളിലും കായിക രംഗത്തും മികവ് പുലർത്താൻ വിദ്യാർത്ഥികളെ പ്രാപ്തരാക്കുന്ന, എല്ലാവരെയും ഉൾക്കൊള്ളുന്ന, ഭാവിയിലേക്ക് തയ്യാറായ സ്ഥാപനങ്ങൾ കെട്ടിപ്പടുക്കാൻ ഞങ്ങൾ ലക്ഷ്യമിടുന്നു' അവർ പറയുന്നു.
'ഇന്ത്യയിലെ അന്താരാഷ്ട്ര സ്കൂളുകൾക്ക് ഘടനാപരവും ആഗോള നിലവാരത്തിലുള്ളതുമായ ഒരു കായിക സംസ്കാരം സ്ഥാപിക്കുന്നതിന് ഐഎസ്എസ്ഒയെ പിന്തുണയ്ക്കാൻ കഴിയുന്നത് ഒരു വലിയ ബഹുമതിയാണ്' അവർ കൂട്ടിച്ചേർത്തു. സ്കൂൾ ഗെയിംസ് ഫെഡറേഷൻ ഓഫ് ഇന്ത്യ, ഇന്റർനാഷണൽ സ്കൂൾ സ്പോർട്ട് ഫെഡറേഷൻ (ഐഎസ്എഫ്) തുടങ്ങിയ ദേശീയ, അന്തർദേശീയ കായിക സംഘടനകളുമായുള്ള ഐഎസ്എസ്ഒയുടെ ബന്ധം ഇന്ത്യൻ വിദ്യാർത്ഥികളെ ഉയർന്ന തലങ്ങളിൽ മത്സരിക്കാൻ സഹായിച്ചിട്ടുണ്ട്.
അവരുടെ പ്രത്യേക വിഭാഗമായ ഇന്റർനാഷണൽ ബോർഡ് സ്കൂൾ സ്പോർട്സ് ഓർഗനൈസേഷൻ (ഐബിഎസ്ഒ) വഴി, എസ്ജിഎഫ്ഐ നാഷണൽസ്, ഖേലോ ഇന്ത്യ ഗെയിംസ്, സുബ്രതോ കപ്പ്, എഐഎസ്എഫ് ലോക ചാമ്പ്യൻഷിപ്പുകൾ തുടങ്ങിയ മികച്ച മത്സരങ്ങളിലേക്ക് ഐഎസ്എസ്ഒ ആയിരക്കണക്കിന് വിദ്യാർത്ഥികളെ എത്തിച്ചിട്ടുണ്ട്.
അദാനി ഇന്റർനാഷണൽ സ്കൂളും ഐഎസ്എസ്ഒയും തമ്മിലുള്ള ഈ സഹകരണം, സുതാര്യവും പ്രൊഫഷണലായി കൈകാര്യം ചെയ്യുന്നതുമായ മത്സരങ്ങൾക്ക് പുതിയ ഊന്നൽ നൽകുന്നു. ഇത് വിദ്യാർത്ഥികളുടെ കായിക പ്രൊഫൈലിംഗ് ശക്തിപ്പെടുത്തുന്നതിലൂടെ ആഗോള സർവകലാശാലാ പ്രവേശനത്തിനും കൂടുതൽ സഹായകമാകും.
മാത്രമല്ല ഈ സഹകരണം ഐഎസ്എസ്ഒയുടെ വളർച്ചയുടെ അടുത്ത ഘട്ടത്തെ ത്വരിതപ്പെടുത്തുമെന്ന് പ്രതീക്ഷിക്കുന്നു. ഇത് അന്താരാഷ്ട്ര സ്കൂൾ വിദ്യാർത്ഥികളുടെ ഒരു തലമുറയെ പഠനത്തിലും കായികരംഗത്തും മികവ് പുലർത്താനും അവരുടെ സ്വപ്നങ്ങളെ അതിരുകളില്ലാതെ പിന്തുടരാനും പ്രാപ്തരാക്കുകയും ചെയ്യും.
Click it and Unblock the Notifications
Sign in with Google