500 ദശലക്ഷം ടൺ കാർഗോ എന്ന സുപ്രധാന നാഴികക്കല്ല് പിന്നിട്ട് അദാനി പോർട്‌സ്; ഇത് വളർച്ചയുടെ പ്രതിഫലനം

ഇന്ത്യയിലെ പ്രമുഖ തുറമുഖ വികസന കമ്പനിയായ അദാനി പോർട്‌സ് ആൻഡ് സ്പെഷ്യൽ ഇക്കണോമിക് സോൺ ലിമിറ്റഡ് (എപിഎസ്ഇസഡ്) കാർഗോ കൈകാര്യം ചെയ്യുന്നതിൽ 500 ദശലക്ഷം ടൺ എന്ന ചരിത്രപരമായ ഒരു നാഴികക്കല്ല് പിന്നിട്ടു. ഇത് രാജ്യത്തിന്റെ ലോജിസ്‌റ്റിക്‌സ് ശൃംഖലയുടെ വേഗത്തിലുള്ള വളർച്ചയുടെ പ്രതിഫലനമാണ്. ഇന്ത്യയുടെ അടിസ്ഥാന സൗകര്യ വികസന ശ്രമങ്ങൾക്ക് ഈ നേട്ടം ആത്മവിശ്വാസം നൽകുന്നു.

ഇന്ത്യയിലെ ഏറ്റവും വലിയ സംയോജിത ഗതാഗത യൂട്ടിലിറ്റിയായ എപിഎസ്ഇസഡ്, 1998-ൽ ഒറ്റ തുറമുഖ സംരംഭമായി തുടങ്ങി ഇന്ന് ഇന്ത്യയിലും അന്താരാഷ്ട്ര തലത്തിലുമായി 19 തുറമുഖങ്ങളുടെയും ടെർമിനലുകളുടെയും വലിയൊരു ശൃംഖലയായി വളർന്നുകഴിഞ്ഞു. 2030ഓടെ ഒരു ബില്യൺ ടൺ ചരക്ക് കൈകാര്യം ചെയ്യാനാണ് എപിഎസ്ഇസഡ് ലക്ഷ്യമിടുന്നത്.

ഈ നേട്ടം കേവലമൊരു സംഖ്യാപരമായ കണക്കിനപ്പുറം, ദേശീയ മത്സരശേഷിയും സാമ്പത്തിക ആത്മവിശ്വാസവും രൂപപ്പെടുത്തുന്നതിൽ തുറമുഖങ്ങൾക്കുള്ള പങ്ക് ഊന്നിപ്പറയുന്നുവെന്ന് ചെയർമാൻ ഗൗതം അദാനി അറിയിച്ചു. കമ്പനിയുടെ വളർച്ചയ്ക്ക് വഴിയൊരുക്കിയ ഉപഭോക്താക്കൾ, പങ്കാളികൾ, ജീവനക്കാർ, സർക്കാർ എന്നിവയ്ക്ക് അദ്ദേഹം നന്ദി പറഞ്ഞു.

എപിഎസ്ഇസഡ്ന്റെ വികസനം കാലക്രമേണ അതിവേഗത്തിലായി. ആദ്യ 100 ദശലക്ഷം ടൺ കാർഗോ കൈകാര്യം ചെയ്യാൻ 16 വർഷമെടുത്തപ്പോൾ, തുടർന്നുള്ള വർഷങ്ങൾ വളരെ കുറഞ്ഞ സമയം കൊണ്ടാണ് നടന്നത്. ഇത് കമ്പനിയുടെ കാര്യക്ഷമത, വ്യാപ്‌തി, പ്രവർത്തന ശേഷി എന്നിവയിലെ മെച്ചപ്പെടൽ വ്യക്തമാക്കുന്നു.

ഇന്ത്യൻ തീരത്തിലെ 15 തുറമുഖങ്ങളും പ്രധാന ആഗോള വ്യാപാര പാതകളിലുള്ള നാല് അന്താരാഷ്ട്ര തുറമുഖങ്ങളും ഉൾപ്പെടുന്ന വിപുലമായ സംയോജിത ലോജിസ്‌റ്റിക്‌സ് ശൃംഖലയാണ് എപിഎസ്ഇസഡ്ൻ്റേത്. ഇത് ഇന്ത്യയുടെ ഉൾനാടൻ പ്രദേശങ്ങളുടെ ഏകദേശം 95 ശതമാനവുമായി ബന്ധപ്പെട്ട് പ്രവർത്തിക്കുന്നു എന്നതാണ് മറ്റൊരു പ്രത്യേകത.

മൾട്ടിമോഡൽ ലോജിസ്‌റ്റിക്‌സ് പാർക്കുകൾ, റെയിൽ പ്രവർത്തനങ്ങൾ, ട്രക്കിംഗ് ഫ്ളീറ്റുകൾ, വെയർഹൗസിംഗ് സൗകര്യങ്ങൾ, കാർഷിക സംഭരണശാലകൾ എന്നിവയും കമ്പനിയുടെ വലിയ സമുദ്ര കപ്പൽപ്പടയും ഈ ലോജിസ്‌റ്റിക്‌സ് ഘടനയുടെ ഭാഗമാണ്.

നിലവിൽ പ്രതിവർഷം 633 ദശലക്ഷം ടൺ കാർഗോ കൈകാര്യം ചെയ്യുന്ന എപിഎസ്ഇസഡ്, ഇന്ത്യയുടെ മൊത്തം തുറമുഖ ട്രാഫിക്കിന്റെ ഏകദേശം 28 ശതമാനം വഹിക്കുന്നു. ആഗോള വ്യാപാര മത്സരശേഷി വർധിപ്പിക്കുന്നതിൽ സംയോജിത ലോജിസ്‌റ്റിക്‌സ് പ്ലാറ്റ്‌ഫോമുകളുടെ പ്രാധാന്യം ഈ നേട്ടം എടുത്തു കാണിക്കുന്നതായി വ്യവസായ നിരീക്ഷകർ ചൂണ്ടിക്കാട്ടുന്നു.

English summary

Adani Ports crosses 500 million tonnes of cargo milestone; a reflection of growth.