ഫ്യൂച്ചർ ഗ്രൂപ്പിനെതിരായ ആമസോണിന്റെ ഹർജി തള്ളി; ആമസോണിന് പിഴയായി 200 കോടി രൂപയും വിധിച്ചു

ഡൽഹി: ഫ്യൂച്ചർ റീട്ടെയിൽ ലിമിറ്റഡിനെതിരെ ഓൺലൈൻ വ്യാപാര ഭീമൻമാരായ ആമസോൺ നൽകിയ ഹർജി നാഷണൽ കമ്പനി ലോ ട്രൈബ്യൂണൽ (എൻസിഎൽടി) തള്ളി. ഫ്യൂച്ചർ കൂപ്പണുകളുമായുള്ള ഇ- കൊമേഴ്‌സ് മേജർ ഡീലിനുള്ള അംഗീകാരം താൽക്കാലികമായി നിർത്തിവയ്ക്കാനുള്ള കോമ്പറ്റീഷൻ കമ്മീഷൻ ഓഫ് ഇന്ത്യയുടെ (സിസിഐ) തീരുമാനത്തെ ചോദ്യം ചെയ്തുകൊണ്ടായിരുന്നു ആമസോൺ ഹർജി ഫയൽ ചെയ്തത്. ആമസോണിനെതിരെ 200 കോടി രൂപ പിഴ ചുമത്തിയതായും ട്രൈബ്യൂണൽ അറിയിച്ചു.

ജസ്റ്റിസ് എം വേണുഗോപാൽ, അശോക് കുമാർ മിശ്ര എന്നിവരടങ്ങുന്ന രണ്ടംഗ ബെഞ്ചാണ് വിധി അറിയിച്ചിരിക്കുന്നത്. സിസിഐയുടെ കണ്ടെത്തലുകളെ ബെഞ്ച് ശരിവെക്കുകയും ചെയ്തു. പിഴ ചുമത്തിയ 202 കോടി രൂപ 45 ദിവസത്തിനകം അടയ്ക്കണമെന്നും ആമസോണിനോട് ബെഞ്ച് നിർദേശിച്ചു. ഈ അപ്പീൽ ട്രൈബ്യൂണൽ സിസിഐയുമായി പൂർണ യോജിപ്പിലാണെന്നും രണ്ടംഗ ബെഞ്ച് പറഞ്ഞു. കഴിഞ്ഞ വർഷം ഡിസംബറിൽ സിസിഐ 2019-ൽ നൽകിയ മുൻ അനുമതി റദ്ദാക്കുകയും ഫ്യൂച്ചർ കൂപ്പൺസ് പ്രൈവറ്റ് ലിമിറ്റഡിന്റെ (എഫ്‌സിപിഎൽ) 49 ശതമാനം ഓഹരികൾ ഏറ്റെടുക്കാനുള്ള ആമസോണിന്റെ തീരുമാനം താൽക്കാലികമായി നിർത്തിവയ്ക്കുകയും ചെയ്തിരുന്നു.

ഇടപാടിന് ക്ലിയറൻസ് തേടുന്നതിനിടെ ആമസോൺ വിവരങ്ങൾ മറച്ചുവെച്ചതിനാലാണ് മുൻകാല അനുമതി താൽക്കാലികമായി നിർത്താൻ കാരണമെന്ന് ഫെയർ ട്രേഡ് റെഗുലേറ്റർ പറഞ്ഞു. ഫ്യൂച്ചർ റീട്ടെയിൽ ലിമിറ്റഡിന്റെ (എഫ്ആർഎൽ) പ്രൊമോട്ടറാണ് എഫ്‌സിപിഎൽ. 2020 ഓഗസ്റ്റിൽ പ്രഖ്യാപിച്ച 24,713 കോടി രൂപയുടെ ഇടപാടിന്റെ ഭാഗമായി റിലയൻസ് റീട്ടെയിലിലേക്ക് മാറ്റേണ്ടിയിരുന്ന റീട്ടെയിൽ, മൊത്തവ്യാപാരം, ലോജിസ്റ്റിക്സ്, വെയർഹൗസിംഗ് വിഭാഗങ്ങളിൽ പ്രവർത്തിക്കുന്ന 19 ഗ്രൂപ്പ് കമ്പനികളുടെ ഭാഗമായിരുന്നു എഫ്ആർഎൽ. എന്നാൽ ഫ്യൂച്ചർ ഗ്രൂപ്പിന്റെ ചില കരാർ പ്രശ്നങ്ങളെ തുടർന്ന് ഏപ്രിലിൽ മുകേഷ് അംബാനിയുടെ നേതൃത്വത്തിലുള്ള റിലയൻസ് ഇൻഡസ്ട്രീസ് ലിമിറ്റഡ് ഈ ഇടപാട് പിൻവലിച്ചിരുന്നു.

ആമസോൺ സമർപ്പിച്ച ഹർജിയിൽ ഈ വർഷം ഏപ്രിലിൽ ആണ് എൻസിഎൽഎടി വാദം പൂർത്തിയാക്കിയത്. കേസിൽ എല്ലാ കക്ഷികളും ബന്ധപ്പെട്ട രേഖകളും പ്രസ്താവനകളും രജിസ്ട്രിക്ക് മുമ്പാകെ സമർപ്പിച്ചിരുന്നു. തിങ്കളാഴ്ച, ആമസോണിന്റെ ഹർജി കൂടാതെ, കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്‌സും (സിഎഐടി) ഓൾ ഇന്ത്യ കൺസ്യൂമർ പ്രൊഡക്ട്സ് ഡിസ്ട്രിബ്യൂട്ടേഴ്‌സ് ഫെഡറേഷനും (എഐസിപിഡിഎഫ്) സമർപ്പിച്ച രണ്ട് ഹർജികളിലുള്ള ഉത്തരവും അപ്പീൽ ട്രൈബ്യൂണൽ പ്രസ്താവിച്ചിരുന്നു.

English summary

Amazon's appeal against Future Group rejected; Amazon was also fined Rs 200 crore