ബെംഗളൂരു ബിസിനസ് കോറിഡോർ; ആ സന്തോഷ വാർത്ത എത്തി, നടപടികൾ വേഗത്തിലാക്കാൻ നിർദ്ദേശം
ബെംഗളൂരു: ബെംഗളുരുവിന്റെ വികസനത്തിലെ പ്രധാന പദ്ധതിയായി കണക്കാക്കപ്പെടുന്ന പെരിഫറൽ റിംഗ് റോഡ് അഥവാ ബെംഗളൂരു ബിസിനസ് കോറിഡോർ പദ്ധതിക്ക് വർഷങ്ങൾക്ക് ശേഷം കാര്യമായ പുരോഗതി കൈവന്നിരിക്കുകയാണ്. ബിബിസി ചെയർമാനായ എൽകെ അതീഖ്, ഭൂമി ഏറ്റെടുക്കലുമായി ബന്ധപ്പെട്ട നഷ്ടപരിഹാര വിതരണം വേഗത്തിലാക്കാനും ബാക്കി നിൽക്കുന്ന ഭരണാനുമതികളും നടപടിക്രമങ്ങളും ഉടൻ പൂർത്തിയാക്കാനും ഉദ്യോഗസ്ഥരോട് നിർദേശിച്ചു.
നിർമ്മാണ പ്രവർത്തനങ്ങൾ വൈകാതെ ആരംഭിക്കുകയാണ് ഇതിന്റെ ലക്ഷ്യമെന്ന് അദ്ദേഹം വ്യക്തമാക്കി. 73 കിലോമീറ്റർ നീളമുള്ള ഈ എക്സ്പ്രസ് വേ പദ്ധതി തുമകൂരു റോഡിൽ നിന്ന് ഹൊസൂർ റോഡ് വരെ നഗരത്തിന്റെ വടക്കൻ, കിഴക്കൻ മേഖലകളെ ബന്ധിപ്പിക്കുന്ന തരത്തിലാണ് രൂപകൽപ്പന ചെയ്തിരിക്കുന്നത്. ഏകദേശം 27,000 കോടി ചെലവിൽ നടപ്പാക്കുന്ന പദ്ധതിയുടെ പ്രധാന ലക്ഷ്യം ഔട്ടർ റിംഗ് റോഡിലെയും നഗരമധ്യത്തിലെയും ഗതാഗത കുരുക്ക് കുറയ്ക്കുകയാണ്.
പദ്ധതിയുടെ ആദ്യ പാക്കേജായ മടവാര-ബല്ലാരി റോഡ് (ഏകദേശം 20 കിലോമീറ്റർ) ഭാഗത്തിന്റെ ടെൻഡർ നടപടികൾ പൂർത്തിയായിരുന്നു. പരിസ്ഥിതി അനുമതി ലഭിച്ചതിന് പിന്നാലെ കരാറുകാരുടെ ബിഡ് സമർപ്പണം കഴിയുകയും ചെയ്തിരുന്നു. ആദ്യ പാക്കേജിന്റെ നിർമ്മാണത്തിനായി ബെംഗളൂരു ആസ്ഥാനമായ ശങ്കരനാരായണ കൺസ്ട്രക്ഷൻസ് (എസ്എൻസി) കമ്പനിക്ക് ലെറ്റർ ഓഫ് ആക്സപ്റ്റൻസ് ഔദ്യോഗികമായി നൽകിയിരുന്നു.
പദ്ധതിയുടെ ഏറ്റവും വലിയ വെല്ലുവിളിയായ ഭൂമിയേറ്റെടുക്കൽ നടപടികളിലും ഇപ്പോൾ വേഗത കൈവന്നിട്ടുണ്ട്. 2,500 ഏക്കറിലധികം ഭൂമി ഏറ്റെടുക്കേണ്ട ഈ പദ്ധതിയിൽ കർഷകരുമായുള്ള നഷ്ടപരിഹാര തർക്കങ്ങളും നിയമപോരാട്ടങ്ങളും വർഷങ്ങളായി പുരോഗതിയെ തടഞ്ഞിരുന്നു. പണം, ട്രാൻസ്ഫറബിൾ ഡെവലപ്മെന്റ് റൈറ്റ്സ്, വികസന ഭൂമി എന്നിവ ഉൾപ്പെടുന്ന വിവിധ നഷ്ടപരിഹാര മാതൃകകളാണ് സർക്കാർ മുന്നോട്ടുവെച്ചിട്ടുള്ളത്. എങ്കിലും ചില ഭൂവുടമകൾ ഇപ്പോഴും പ്രതിഷേധം തുടരുകയാണ്.
പദ്ധതി പൂർത്തിയായാൽ തുമകൂരു റോഡ്, ബല്ലാരി റോഡ്, ഹെണ്ണൂർ റോഡ്, ഓൾഡ് മദ്രാസ് റോഡ്, വൈറ്റ്ഫീൽഡ്, സർജാപുര റോഡ്, ഹൊസൂർ റോഡ് തുടങ്ങിയ പ്രധാന ഗതാഗത ഇടനാഴികൾ നേരിട്ട് ബന്ധിപ്പിക്കപ്പെടും. ഇതോടെ വിമാനത്താവളത്തിലേക്കുള്ള യാത്രാസമയം കുറയുകയും നഗരത്തിനകത്തുകൂടി കടന്നുപോകുന്ന ചരക്ക് വാഹനങ്ങളുടെ എണ്ണം ഗണ്യമായി കുറയുകയും ചെയ്യും. ഇതിലൂടെ നിലവിലെ ഔട്ടർ റിംഗ് റോഡിലെ തിരക്ക് 30 മുതൽ 40 ശതമാനം വരെ കുറയുമെന്നാണ് പ്രതീക്ഷ.
പദ്ധതിയുടെ ഭാഗമായി നിരവധി ഫ്ലൈഓവറുകൾ, ഇന്റർചേഞ്ചുകൾ, അണ്ടർപാസുകൾ, സർവീസ് റോഡുകൾ എന്നിവയും നിർമ്മിക്കും. എട്ട് വരി പ്രധാന പാതയും ഇരുവശങ്ങളിലും സർവീസ് റോഡുകളും ഉൾപ്പെടുന്ന ഈ കോറിഡോർ ബെംഗളൂരുവിന്റെ ഭാവി വികസനത്തിന് നിർണായകമായ അടിസ്ഥാനസൗകര്യ പദ്ധതികളിലൊന്നായാണ് കണക്കാക്കപ്പെടുന്നത്. നഗരത്തിന്റെ വടക്കൻ, കിഴക്കൻ മേഖലകളിൽ പുതിയ വ്യവസായ, ഐടി, റിയൽ എസ്റ്റേറ്റ് നിക്ഷേപങ്ങൾക്ക് ഇത് വലിയ ഉത്തേജനം നൽകുമെന്നാണ് വിലയിരുത്തൽ.
ഏകദേശം രണ്ട് പതിറ്റാണ്ട് നീണ്ട കാത്തിരിപ്പിന് ശേഷമാണ് പദ്ധതിക്ക് ഇപ്പോൾ വേഗം കൈവന്നിരിക്കുന്നത്. നിർമാണം ആരംഭിക്കുന്നതോടെ ബെംഗളൂരുവിന്റെ ഗതാഗത ഭൂപടത്തിൽ ഏറ്റവും വലിയ മാറ്റം കൊണ്ടുവരുന്ന പദ്ധതിയായി ബിസിനസ് കോറിഡോർ മാറുമെന്നാണ് പ്രതീക്ഷ. എങ്കിലും ഭൂമിയേറ്റെടുക്കൽ പോലെയുള്ള തടസങ്ങൾ ഇപ്പോഴും പദ്ധതിയുടെ വേഗതയ്ക്ക് വിലങ്ങു തടിയാവുന്നുണ്ട്. ഇവ എത്രയും പെട്ടെന്ന് പരിഹരിച്ച് നടപടികൾ ഊർജിതമാക്കാനാണ് ബിഡിഎയുടെ ശ്രമം.
Click it and Unblock the Notifications
Sign in with Google