ബെംഗളൂരുവിലെ സൈക്കിൾ യാത്രക്കാർക്ക് സന്തോഷിക്കാം; എംഎആർ റോഡിൽ 10.3 കിമീ വരുന്ന ട്രാക്ക് വരുന്നു!
ബെംഗളൂരു: നഗരത്തിലെ സൈക്കിൾ യാത്രക്കാർക്ക് വലിയ ആശ്വാസമാകുന്ന പദ്ധതിയുമായി അധികൃതർ. നഗരത്തിൽ ഇതുവരെ ഉണ്ടായതിൽ ഏറ്റവും ദൈർഘ്യമേറിയ പ്രത്യേക സൈക്കിൾ ട്രാക്കുകളിൽ ഒന്നായ 10.3 കിലോമീറ്റർ നീളമുള്ള സൈക്കിൾ പാത ഒരുക്കുകയാണ് ബംഗളൂരു ഡെവലപ്മെന്റ് അതോറിറ്റി. മഗഡി റോഡിനെയും മൈസൂരു റോഡിനെയും ബന്ധിപ്പിക്കുന്ന 11 കിലോമീറ്റർ നീളമുള്ള മേജർ ആർട്ടീരിയൽ റോഡ് (എംഎആർ) പദ്ധതിയുടെ ഭാഗമായാണ് ഈ സൗകര്യം ഒരുക്കുന്നത്.
സാധാരണ വാഹനഗതാഗതത്തിൽ നിന്ന് വേർതിരിച്ച് സർവീസ് റോഡിനോട് ചേർന്നാണ് സൈക്കിൾ ട്രാക്ക് നിർമ്മിച്ചിരിക്കുന്നത്. പുതിയ റോഡ് പദ്ധതിയുടെ ഭൂരിഭാഗം ഭാഗങ്ങളിലും സൈക്കിൾ യാത്രക്കാർക്ക് സുരക്ഷിതമായി സഞ്ചരിക്കാനാവുന്ന പ്രത്യേക പാത ലഭ്യമാകും. ജൂൺ 27-ന് നടക്കുന്ന കെംപെഗൗഡ ജയന്തി ആഘോഷങ്ങളുടെ ഭാഗമായി ഈ റോഡ് പൊതുജനങ്ങൾക്ക് തുറന്ന് നൽകാനാണ് പദ്ധതി.
നഗരത്തിലെ സൈക്കിൾ യാത്രാ സൗകര്യങ്ങൾ കഴിഞ്ഞ കുറച്ച് വർഷങ്ങളായി ചുരുങ്ങിക്കൊണ്ടിരിക്കുന്ന സാഹചര്യത്തിലാണ് പുതിയ പദ്ധതി ശ്രദ്ധ നേടുന്നത്. നേരത്തെ സിൽക്ക് ബോർഡിനും കെആർ പുരത്തിനും ഇടയിലുള്ള ഔട്ടർ റിങ് റോഡിലും നഗരമധ്യത്തിലെ ചില ഭാഗങ്ങളിലും സൈക്കിൾ ട്രാക്കുകൾ ഒരുക്കിയിരുന്നുവെങ്കിലും നമ്മ മെട്രോയുടെ കൂടുതൽ നിർമാണം പുരോഗമിച്ചതോടെ അവയിൽ പലതും ഇല്ലാതായി.
ബിഡിഎ ചെയർമാൻ എൻഎ ഹാരിസിന്റെയും കമ്മീഷണർ പി മണിവണ്ണന്റെയും നേതൃത്വത്തിൽ പദ്ധതി വേഗത്തിൽ മുന്നോട്ടുകൊണ്ടുപോയതായി അധികൃതർ അറിയിച്ചു. അണ്ടർപാസ് ഭാഗം ഒഴികെയുള്ള മുഴുവൻ റോഡിലും സൈക്കിൾ പാത സജ്ജമാണെന്നും അവർ വ്യക്തമാക്കി. റോഡ് അടയാളങ്ങൾ, ലെയ്ൻ മാർക്കിംഗ്, അണ്ടർപാസ് പെയിന്റിംഗ് തുടങ്ങിയ അവസാനഘട്ട ജോലികൾ പുരോഗമിക്കുകയാണ്.
ടോൾ ഇല്ലാതെ മഗഡി റോഡിൽ നിന്ന് മൈസൂരു റോഡിലേക്ക്
വർഷങ്ങളായുള്ള കാലതാമസങ്ങൾക്ക് ശേഷം വേഗം നേടിയെടുത്ത ബെംഗളൂരുവിലെ പ്രധാന അടിസ്ഥാനസൗകര്യ പദ്ധതികളിലൊന്നാണ് മേജർ ആർട്ടീരിയൽ റോഡ്. ചള്ളഘട്ടയ്ക്കു സമീപമുള്ള തിരക്കേറിയ റെയിൽവേ പാതയ്ക്ക് കീഴിലുള്ള അണ്ടർപാസ് ഉൾപ്പെടെ നിർണായക ഘടകങ്ങൾ പൂർത്തിയാക്കിയതോടെയാണ് പദ്ധതിയുടെ അന്തിമഘട്ടത്തിലേക്ക് കടന്നത്.
ആറ് ലെയ്ൻ പ്രധാന റോഡും നാല് ലെയ്ൻ സർവീസ് റോഡുകളും ഉൾപ്പെടുന്ന 10 ലെയ്ൻ പാതയാണ് ഇത്. മഗഡി റോഡിലെ കടബഗേരെയെയും മൈസൂരു റോഡിലെ ചള്ളഘട്ടയെയും ബന്ധിപ്പിക്കുന്ന ഈ പാത, നാടപ്രഭു കെംപെഗൗഡ ലേഔട്ടിലെ ഒൻപത് ബ്ലോക്കുകൾക്ക് നേരിട്ടുള്ള കണക്റ്റിവിറ്റിയും നൽകും.
നൈസ് റോഡിലെ ടോൾ നൽകാതെ തന്നെ വാഹനയാത്രക്കാർക്ക് മഗഡി റോഡിനും മൈസൂരു റോഡിനും ഇടയിൽ സഞ്ചരിക്കാൻ പുതിയ മാർഗം ലഭിക്കും.
പദ്ധതിയുടെ ഭാഗമായി മൂന്ന് വലിയ അണ്ടർപാസുകൾ, 64 ചെറിയ പാലങ്ങൾ, 250 മീറ്റർ നീളമുള്ള ടണൽ റോഡ് എന്നിവയും നിർമ്മിച്ചിട്ടുണ്ട്. പുതിയ റോഡ് മണിക്കൂറിൽ പരമാവധി 80 കിലോമീറ്റർ വേഗതയിൽ യാത്ര ചെയ്യാൻ കഴിയുന്ന തരത്തിലാണ് രൂപകൽപ്പന ചെയ്തിരിക്കുന്നത്. ഇതോടെ മഗഡി റോഡിനും മൈസൂരു റോഡിനും ഇടയിലുള്ള യാത്രാസമയം ഗണ്യമായി കുറയുമെന്നാണ് അധികൃതരുടെ പ്രതീക്ഷ.
ഭാവിയിൽ ബെംഗളൂരു-മൈസൂരു ആക്സസ് കൺട്രോൾഡ് ഹൈവേയുമായി ഈ റോഡിനെ ബന്ധിപ്പിക്കുന്നതിനായി ക്ലോവർലീഫ് ഇന്റർചേഞ്ചും നിർമ്മിക്കുമെന്ന് അധികൃതർ അറിയിച്ചു. പെരിഫറൽ റിങ് റോഡിന്റെ രണ്ടാം ഘട്ട പദ്ധതി നടപ്പിലാകുമ്പോഴായിരിക്കും ഈ വികസനം. അതുവരെ ചള്ളഘട്ടയിൽ ട്രാഫിക് സിഗ്നലുകൾ സ്ഥാപിച്ച് വാഹനഗതാഗതം നിയന്ത്രിക്കുമെന്നും ട്രാഫിക് പോലീസുമായി സഹകരിച്ചാണ് ക്രമീകരണങ്ങൾ നടപ്പാക്കുകയെന്നും അധികൃതർ വ്യക്തമാക്കി.
Click it and Unblock the Notifications
Sign in with Google