ബെംഗളൂരു-പൂനെ യാത്ര വെറും 6 മണിക്കൂറിൽ..! എക്‌സ്പ്രസ് വേയുടെ നടപടികൾ പുരോഗമിക്കുന്നു, പ്രത്യേകതകൾ അറിയാം

ബെംഗളൂരു: പൂനെയിൽ നിന്ന് ബെംഗളൂരുവിലേക്ക് റോഡ് മാർഗം യാത്ര ചെയ്യുന്ന ലക്ഷക്കണക്കിന് ആളുകൾക്ക് വലിയ ആശ്വാസമാകുന്ന വമ്പൻ അടിസ്ഥാനസൗകര്യ പദ്ധതിയുമായി കേന്ദ്ര സർക്കാർ മുന്നോട്ട് പോവുകയാണ്. നിലവിൽ ദേശീയപാത 48 വഴിയുള്ള യാത്രയിൽ നേരിടുന്ന ഗതാഗതക്കുരുക്കുകളും ദൈർഘ്യമേറിയ യാത്രാസമയവും കുറയ്ക്കുന്നതിനായി പുതിയ പൂനെ-ബെംഗളൂരു ഗ്രീൻഫീൽഡ് എക്‌സ്പ്രസ് വേ നിർമിക്കാൻ പദ്ധതിയിടുന്നു.

പദ്ധതി യാഥാർഥ്യമായാൽ നിലവിലെ 14 മുതൽ 15 മണിക്കൂർ വരെ വേണ്ടിവരുന്ന യാത്ര വെറും 6 മുതൽ 7 മണിക്കൂറിനുള്ളിൽ പൂർത്തിയാക്കാൻ സാധിക്കും. ഭാരത് മാല പരിയോജനയുടെ രണ്ടാം ഘട്ടത്തിൽ ഉൾപ്പെടുത്തിയിരിക്കുന്ന ഈ അതിവേഗ പാതയ്ക്ക് ഏകദേശം 700 കിലോമീറ്റർ നീളമുണ്ടാകും. പൂനെയും ബെംഗളൂരുവും തമ്മിലുള്ള നിലവിലെ ദൂരം കുറയ്ക്കുന്നതിനൊപ്പം കൂടുതൽ സുരക്ഷിതവും സുഗമവുമായ യാത്രാനുഭവം ഒരുക്കുക എന്നതാണ് പദ്ധതിയുടെ പ്രധാന ലക്ഷ്യം.

എവിടെ നിന്നാരംഭിച്ച് എവിടെ അവസാനിക്കും?

പുതിയ എക്‌സ്പ്രസ് വേ മഹാരാഷ്ട്രയിലെ പുണെ ജില്ലയിലെ നിർദ്ദിഷ്‌ട റിംഗ് റോഡിലുള്ള കഞ്ചാലെയിൽ നിന്നാണ് ആരംഭിക്കുന്നത്. തുടർന്ന് കർണാടകയിലെ ബെംഗളൂരു റൂറൽ ജില്ലയിലെ മുത്തുഗദഹള്ളിവരെ പാത നീളും. ബെംഗളൂരു സാറ്റലൈറ്റ് ടൗൺ റിംഗ് റോഡുമായി നേരിട്ട് ബന്ധിപ്പിക്കുന്ന തരത്തിലാണ് രൂപകൽപ്പന. മുംബൈ-പുണെ എക്‌സ്പ്രസ് വേയുമായുള്ള മികച്ച കണക്റ്റിവിറ്റിയും പദ്ധതിയുടെ പ്രധാന സവിശേഷതകളിലൊന്നാണ്. ഇതിലൂടെ മുംബൈയിൽ നിന്നുള്ള യാത്രക്കാർക്കും ബെംഗളൂരുവിലേക്ക് കൂടുതൽ വേഗത്തിൽ എത്തിച്ചേരാൻ സാധിക്കും.

നഗരഗതാഗതക്കുരുക്കുകൾ ഒഴിവാക്കും

നിലവിലെ ദേശീയപാത 48-ൽ യാത്ര ചെയ്യുന്നവർ നേരിടുന്ന ഏറ്റവും വലിയ പ്രശ്‌നം സത്താറ, സാംഗ്ലി, കോലാപ്പൂർ തുടങ്ങിയ നഗരങ്ങളിലെ ഗതാഗതക്കുരുക്കുകളാണ്. പുതിയ ഗ്രീൻഫീൽഡ് എക്‌സ്പ്രസ് വേ പ്രധാന നഗരങ്ങളുടെ പുറംപ്രദേശങ്ങളിലൂടെയാണ് കടന്നുപോകുന്നത്. ഇതുവഴി ട്രാഫിക് സിഗ്നലുകൾ, നഗര തിരക്ക്, ഭാരമേറിയ ചരക്ക് വാഹനങ്ങളുടെ നീണ്ട നിരകൾ എന്നിവ ഒഴിവാക്കി സ്ഥിരമായ വേഗതയിൽ യാത്ര ചെയ്യാൻ സാധിക്കും. ദീർഘദൂര യാത്ര ചെയ്യുന്ന കാർ യാത്രികർക്കും ബൈക്ക് റൈഡർമാർക്കും ഇത് വലിയ ആശ്വാസമാകും.

പശ്ചിമഘട്ടത്തിലൂടെ തുരങ്കങ്ങളും പാലങ്ങളും

മഹാരാഷ്ട്രയിലെ പുണെ, സത്താറ, സാംഗ്ലി ജില്ലകളിലൂടെയാണ് പാതയുടെ ആദ്യഘട്ടം കടന്നുപോകുന്നത്. പശ്ചിമഘട്ട മലനിരകളുള്ള സത്താറ മേഖലയിലെ വെല്ലുവിളി നിറഞ്ഞ ഭൂപ്രകൃതി മറികടക്കുന്നതിനായി നിരവധി തുരങ്കങ്ങളും വൻ പാലങ്ങളും നിർമ്മിക്കാൻ പദ്ധതിയുണ്ട്. കർണാടകയിലേക്ക് പ്രവേശിക്കുന്ന പാത ബെളഗാവി, ബാഗൽകോട്ട്, ഗദഗ്, കൊപ്പൽ, വിജയനഗര, ദാവൻഗരെ, ചിത്രദുർഗ, തുമകൂരു എന്നീ പ്രധാന ജില്ലകളിലൂടെ കടന്നുപോകും. ഇതിലൂടെ സംസ്ഥാനത്തിന്റെ ഉൾപ്രദേശങ്ങൾക്കും മികച്ച റോഡ് ബന്ധം ലഭിക്കും.

120 കിലോമീറ്റർ വേഗതയിൽ യാത്ര

പൂർണമായും ആക്‌സസ് കൺട്രോൾഡ് സംവിധാനത്തിൽ നിർമ്മിക്കുന്ന ഈ എക്‌സ്പ്രസ് വേയിൽ മണിക്കൂറിൽ 120 കിലോമീറ്റർ വരെ വേഗതയിൽ വാഹനങ്ങൾക്ക് സഞ്ചരിക്കാനാകും. ഇതോടെ നിലവിലെ റൂട്ടിനെ അപേക്ഷിച്ച് ഏകദേശം 95 കിലോമീറ്റർ ദൂരം കുറയുകയും യാത്രാസമയം പകുതിയായി ചുരുങ്ങുകയും ചെയ്യും. ഗതാഗത തടസങ്ങളില്ലാത്തതിനാൽ ചില സാഹചര്യങ്ങളിൽ പൂനെ-ബെംഗളൂരു യാത്ര ആറു മണിക്കൂറിനുള്ളിൽ പോലും പൂർത്തിയാക്കാൻ കഴിയുമെന്നാണ് വിലയിരുത്തൽ.

വ്യോമസേനയ്ക്കായി പ്രത്യേക ലാൻഡിംഗ് സ്ട്രിപ്പ്

പദ്ധതിയുടെ ഏറ്റവും ശ്രദ്ധേയമായ സവിശേഷതകളിലൊന്നാണ് അടിയന്തര സാഹചര്യങ്ങളിൽ ഉപയോഗിക്കാവുന്ന വ്യോമസേനാ ലാൻഡിംഗ് സ്ട്രിപ്പ്. മഹാരാഷ്ട്രയിലെ ദേശീയപാത ശൃംഖലയിൽ ആദ്യമായാണ് ഇത്തരം സംവിധാനം ഒരുക്കുന്നത്. യുദ്ധവിമാനങ്ങൾക്കും മറ്റ് പ്രതിരോധ ആവശ്യങ്ങൾക്കുമായി റൺവേയായി ഉപയോഗിക്കാവുന്ന രീതിയിലാണ് ഇത് വികസിപ്പിക്കുക. ദേശീയ സുരക്ഷാ രംഗത്തും പദ്ധതിക്ക് വലിയ പ്രാധാന്യമുണ്ടെന്നതിന്റെ തെളിവാണ് ഈ സംവിധാനം.

50,000 കോടി രൂപയുടെ വമ്പൻ നിക്ഷേപം

പദ്ധതിയുടെ വിശദമായ പ്രോജക്റ്റ് റിപ്പോർട്ട് പ്രകാരം നിർമാണച്ചെലവ് ഏകദേശം 42,000 കോടി രൂപയാണ് കണക്കാക്കുന്നത്. എന്നാൽ ഭൂമി ഏറ്റെടുക്കൽ ഉൾപ്പെടെയുള്ള അനുബന്ധ ചെലവുകൾ കൂടി കണക്കിലെടുക്കുമ്പോൾ ആകെ ചെലവ് 50,000 കോടി രൂപയോളം എത്താൻ സാധ്യതയുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. കർണാടകയിൽ മാത്രം 5,205 ഹെക്‌ടറിലധികം ഭൂമി പദ്ധതിക്കായി ഏറ്റെടുക്കേണ്ടതുണ്ട്. ഭൂമി ഏറ്റെടുക്കൽ നടപടികൾക്കായി ഉടൻ തന്നെ പൊതുജനാഭിപ്രായ ശേഖരണവും ജനസമ്പർക്ക യോഗങ്ങളും ആരംഭിക്കാനാണ് അധികൃതരുടെ തീരുമാനം.

2028-ൽ തുറക്കാൻ ലക്ഷ്യം

ഭൂമി ഏറ്റെടുക്കൽ നടപടികൾ സമയബന്ധിതമായി പൂർത്തിയാകുകയാണെങ്കിൽ 2026-ൽ തന്നെ നിർമാണ പ്രവർത്തനങ്ങൾ ആരംഭിക്കുമെന്നാണ് പ്രതീക്ഷ. പദ്ധതി നിശ്ചയിച്ച സമയക്രമത്തിൽ തന്നെ മുന്നോട്ട് പോയാൽ 2028-ഓടെ എക്‌സ്പ്രസ് വേ പൊതുജനങ്ങൾക്ക് തുറന്നുകൊടുക്കാൻ സാധിക്കും. പൂനെയും ബെംഗളൂരുവും പോലുള്ള രാജ്യത്തെ പ്രധാന സാമ്പത്തിക കേന്ദ്രങ്ങൾ തമ്മിലുള്ള ബന്ധം കൂടുതൽ ശക്തമാക്കുന്നതിനൊപ്പം ചരക്ക് ഗതാഗതത്തിനും വ്യവസായ വികസനത്തിനും ടൂറിസം മേഖലയ്ക്കും വലിയ ഉത്തേജനം നൽകുന്ന പദ്ധതിയായിരിക്കും ഇത്.