ബെംഗളൂരുകാർ കാത്തിരിക്കുന്നു; നമ്മ മെട്രോ പിങ്ക് ലൈനിൽ പരീക്ഷണ ഓട്ടം തുടങ്ങി, മെയ് മുതൽ ഓടുമോ?
ബെംഗളൂരു: നമ്മ മെട്രോയുടെ പിങ്ക് ലൈൻ പ്രോട്ടോടൈപ്പിന്റെ പ്രധാന പാതയിലെ പരീക്ഷണ ഓട്ടങ്ങൾ കലേന അഗ്രഹാരയ്ക്കും തവരേക്കരയ്ക്കും ഇടയിലുള്ള 7.5 കിലോമീറ്റർ എലവേറ്റഡ് പാതയിൽ ആരംഭിച്ചു. കഴിഞ്ഞ ഡിസംബർ 11-ന് ബിഇഎംഎൽ ലിമിറ്റഡ് നൽകിയ ആറ് കോച്ചുകളുള്ള ട്രെയിൻ വെള്ളിയാഴ്ച കന്നിയാത്ര നടത്തിയതോടെയാണ് ഇത്.
ബിഎംആർസിഎൽ, ബിഇഎംഎൽ, അനുബന്ധ സപ്ലയർമാർ എന്നിവയിലെ ഉദ്യോഗസ്ഥരും പങ്കെടുത്തതായി ഒരു മുതിർന്ന മെട്രോ റെയിൽ ഉദ്യോഗസ്ഥൻ അറിയിച്ചു. കലേന അഗ്രഹാര-തവരേക്കര ഇടനാഴിയിലെ റോളിംഗ് സ്റ്റോക്ക് ടൈപ്പ് ടെസ്റ്റ്കൾ ഞായറാഴ്ച ആരംഭിച്ച് ഏപ്രിൽ പകുതിയോടെ പൂർത്തിയാകുമെന്ന് ബിഎംആർസിഎൽ അറിയിച്ചു.
ഒരു പുതിയ ട്രെയിനിന്റെ സുരക്ഷ, പ്രകടനം, നിയമപരമായ പാലനം എന്നിവ വിലയിരുത്തുന്ന പരിശോധനകളാണിത്. നിയമപരമായ അംഗീകാരങ്ങൾ നേടുന്നതിന്, യഥാർത്ഥ സാഹചര്യങ്ങളിൽ ട്രെയിനിന്റെ പ്രകടനവും സിസ്റ്റങ്ങളുടെ സംയോജനവും സമഗ്രമായി വിലയിരുത്തുന്ന ഈ പ്രധാന പാതയിലെ പരിശോധന നിർണായകമാണെന്ന് ബെംഗളൂരു മെട്രോ റെയിൽ ലിമിറ്റഡ് വ്യക്തമാക്കി.
ഈ കാലയളവിൽ ട്രാക്ഷൻ, ബ്രേക്ക് ടെസ്റ്റുകൾ, വിവിധ വേഗതകളിലെ ഓസിലേഷൻ പഠനങ്ങൾ, സിഗ്നലിംഗ്, വൈദ്യുതി, ടെലികമ്മ്യൂണിക്കേഷൻ സംയോജന പരിശോധനകൾ എന്നിവ നടക്കുമെന്നാണ് അറിയിച്ചിരിക്കുന്നത്. പിങ്ക് ലൈനിന്റെ എലവേറ്റഡ് ഇടനാഴി എത്രയും പെട്ടെന്ന് തന്നെ തുറക്കാനാണ് ബിഎംആർസിഎൽ പദ്ധതിയിടുന്നത്.
എപ്പോൾ തുറന്ന് കൊടുക്കും?
ബെംഗളൂരു മെട്രോ പിങ്ക് ലൈനിലെ ട്രെയിനുകളുടെ ബ്രേക്കിംഗ്, ക്രാഷ് സുരക്ഷ, യാത്രാ സ്ഥിരത, വിവിധ വേഗതകളിലെ പ്രകടനം എന്നിവ എഞ്ചിനീയർമാർ നിലവിൽ പരിശോധിച്ചുവരികയാണ്. യാത്രക്കാർക്കായി സർവീസ് ആരംഭിക്കും മുമ്പ് എല്ലാ പ്രശ്നങ്ങളും കണ്ടെത്തി പരിഹരിക്കലാണ് ഈ പരിശോധനകളുടെ ലക്ഷ്യം. ഒരു മെട്രോ ലൈൻ പൊതുജനങ്ങൾക്കായി തുറക്കുന്നതിന് മുമ്പ് മെയിൻലൈൻ ടെസ്റ്റിംഗ് നിർണായകമാണെന്ന് ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡ് അറിയിച്ചു.
കഴിഞ്ഞ ഡിസംബറിൽ ലഭിച്ച, ഭാരത് എർത്ത് മൂവേഴ്സ് ലിമിറ്റഡ് നിർമ്മിച്ച ആറ് കോച്ചുകളുള്ള ട്രെയിനാണ് പരീക്ഷണ ഓട്ടങ്ങളിൽ ഉപയോഗിക്കുന്നത്. ഏപ്രിൽ പകുതിയോടെ ടെസ്റ്റിംഗ് പൂർത്തിയാകുമെന്നും, അതിനുശേഷം ട്രെയിൻ പതിവ് സർവീസിന് തയ്യാറാകുമെന്നും അധികൃതർ പ്രതീക്ഷിക്കുന്നു. 7.5 കിലോമീറ്റർ ദൂരമുള്ള ഈ ഭാഗം മെയ് മാസത്തോടെ പൊതുജനങ്ങൾക്കായി തുറക്കുമെന്നാണ് റിപ്പോർട്ട് ചെയ്യുന്നത്.
തവറേക്കര മുതൽ നാഗവാര വരെ നീളുന്ന ഭൂഗർഭ പാതയാണ് പിങ്ക് ലൈനിന്റെ മറ്റൊരു പ്രധാന ഭാഗം. 12 ഭൂഗർഭ സ്റ്റേഷനുകൾ ഉൾപ്പെടുന്ന ഈ ഭാഗം, ടണലിംഗ്, സ്റ്റേഷൻ നിർമ്മാണം, സിസ്റ്റം സംയോജനം, അന്തിമ സുരക്ഷാ അനുമതി എന്നിവ പൂർത്തിയായാൽ ഈ വർഷാവസാനത്തോടെ തുറക്കാനാണ് അധികൃതർ ലക്ഷ്യമിടുന്നത്.
ട്രയൽ റണ്ണുകളിൽ എഞ്ചിനീയർമാർ ട്രെയിനിന്റെ വളവുകളിലെയും ചരിവുകളിലെയും സ്വഭാവം, ബ്രേക്കിംഗ് കാര്യക്ഷമത, സിഗ്നലിംഗ്, ആശയവിനിമയ സംവിധാനങ്ങളുടെ വിശ്വാസ്യത എന്നിവ സൂക്ഷ്മമായി നിരീക്ഷിക്കുന്നു. അടിയന്തര പ്രതികരണ സംവിധാനങ്ങളും പരിശോധനയിലുണ്ട്. ആവശ്യമായ എല്ലാ സുരക്ഷാ ഓഡിറ്റുകളും പൂർത്തിയാക്കിയാൽ മാത്രമേ യാത്രാ സേവനങ്ങൾ ആരംഭിക്കൂ എന്ന് അധികൃതർ വ്യക്തമാക്കി.
ബെംഗളൂരു മെട്രോ പിങ്ക് ലൈൻ പൂർണമായി പ്രവർത്തനക്ഷമമാകുമ്പോൾ, നഗരത്തിന്റെ തെക്കൻ, വടക്കൻ മേഖലകൾക്കിടയിലുള്ള യാത്രാസമയം ഗണ്യമായി കുറയ്ക്കും. ഈ പാത റോഡുകളിലെ വാഹനത്തിരക്ക് ലഘൂകരിക്കാനും, ആയിരക്കണക്കിന് യാത്രക്കാർക്ക് വേഗതയേറിയതും വിശ്വസനീയവുമായ യാത്രാമാർഗം നൽകാനും ഇത് സഹായിക്കുമെന്നും അധികൃതർ ചൂണ്ടിക്കാട്ടുന്നു.
Click it and Unblock the Notifications
Sign in with Google