ബെംഗളൂരു മെട്രോ യെല്ലോ ലൈൻ മൂലം ട്രാഫിക് ബ്ലോക്ക് കുത്തനെ കുറഞ്ഞു; ഏഴാമത്തെ ട്രെയിൻ കൂടി എത്തി!

ബെംഗളൂരു: നഗര നിവാസികൾക്ക് ശുഭവാർത്തയുമായി ബിഎംആർസിഎൽ. യെല്ലോ ലൈൻ മെട്രോയിൽ തിരക്കേറിയ സമയങ്ങളിൽ യാത്രക്കാർക്ക് ഇനി കുറഞ്ഞ കാത്തിരിപ്പ് മാത്രം മതിയാകും. പീക്ക് സമയങ്ങളിൽ ട്രെയിൻ സർവീസുകൾ ഓരോ പത്ത് മിനിറ്റിലും ലഭ്യമാക്കാൻ തീരുമാനമായതോടെയാണ് ആശ്വാസം. ജനുവരി 15 മുതൽ ഏഴാമത്തെ ട്രെയിൻകൂടി സർവീസിനായി ചേർത്തതായി ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡ് അറിയിച്ചു. ഇത് സർവീസ് ഇടവേളകൾ കുറയ്ക്കാൻ ഉപകരിക്കും.

പുതിയ സമയക്രമം തിങ്കൾ മുതൽ ശനി വരെ ബാധകമാണ്. തിരക്കേറിയ മണിക്കൂറുകളിലെ 13 മിനിറ്റ് ഇടവേള ഇതോടെ 10 മിനിറ്റായി ചുരുങ്ങുമെന്നാണ് അറിയിച്ചിരിക്കുന്നത്. ഞായറാഴ്‌ചകളിൽ, പീക്ക് സമയങ്ങളിൽ 15 മിനിറ്റിനു പകരം 14 മിനിറ്റിൽ ട്രെയിനുകളെത്തും. എന്നാൽ ആർവി റോഡ്, ബൊമ്മസന്ദ്ര ടെർമിനലുകളിലെ ആദ്യത്തെയും അവസാനത്തെയും ട്രെയിൻ സമയങ്ങളിൽ മാറ്റമില്ലെന്നും ബിഎംആർസിഎൽ വ്യക്തമാക്കി.

യെല്ലോ ലൈനിലെ മെട്രോ സർവീസുകൾ ഇതോടെ കൂടുതൽ മെച്ചപ്പെടും. ഒരു പുതിയ ട്രെയിൻ കൂടി ഉൾപ്പെടുത്തിയതോടെ തിരക്കേറിയ സമയങ്ങളിൽ യാത്രാസൗകര്യം വർധിക്കും. 2025 ഡിസംബർ 23-നാണ് ആറാമത്തെ ട്രെയിൻ ഉൾപ്പെടുത്തിയത്, ഇതോടെ പ്രവൃത്തിദിവസങ്ങളിലെ സർവീസ് ഇടവേള 15-ൽ നിന്ന് 13 മിനിറ്റായി. നവംബർ ഒന്നിന് അഞ്ചാമത്തെ ട്രെയിൻ ചേർത്തപ്പോൾ ഇത് 19-ൽ നിന്ന് 15 മിനിറ്റായി കുറച്ചിരുന്നു.

മൂന്ന് ട്രെയിൻ സെറ്റുകളുമായി 2025 ഓഗസ്‌റ്റ് 10-ന് പ്രവർത്തനം തുടങ്ങിയ യെല്ലോ ലൈൻ, കഴിഞ്ഞ വർഷത്തെ പഠനമനുസരിച്ച് ഗതാഗതക്കുരുക്ക് 37 ശതമാനം കുറച്ചതായി കണ്ടെത്തിയിട്ടുണ്ട്. ബംഗളുരുവിലെ ട്രാഫിക് പോലീസാണ് ഈ നിർണായക കണ്ടെത്തൽ നടത്തിയത്. കൂടുതൽ ട്രെയിനുകൾ വരുന്നതോടെ ട്രാഫിക് ബ്ലോക്കിന് ഗണ്യമായ കുറവ് ഉണ്ടാവുമെന്നാണ് വിലയിരുത്തൽ.

അതേസമയം, ഡിജിറ്റൽ ടിക്കറ്റിംഗിന്റെ ഭാഗമായി, ജനുവരി 15 മുതൽ ബെംഗളൂരു മെട്രോ മൊബൈൽ അധിഷ്‌ഠിത അൺലിമിറ്റഡ് യാത്രാ പാസുകളും അവതരിപ്പിച്ചിരുന്നു. നമ്മ മെട്രോ ആപ്പിൽ ഈ ക്യുആർ കോഡ് പാസുകൾ 1, 3, അല്ലെങ്കിൽ 5 ദിവസത്തെ കാലാവധിയിൽ ലഭിക്കും. സ്‌മാർട്ട് കാർഡുകൾക്ക് ആവശ്യമായിരുന്ന 50-യുടെ റീഫണ്ടബിൾ നിക്ഷേപം ഇപ്പോൾ ആവശ്യമില്ല.

യാത്രക്കാർക്ക് ഫോണിലെ ക്യുആർ കോഡ് എൻട്രി, എക്‌സിറ്റ് ഗേറ്റുകളിൽ സ്‌കാൻ ചെയ്‌ത്‌ എളുപ്പത്തിൽ യാത്ര ചെയ്യാം. ഒരു ദിവത്തേക്ക് 250 രൂപയും, മൂന്ന് ദിവസത്തേക്ക് 550 രൂപയും, അഞ്ച് ദിവസത്തേക്ക് 850 രൂപയുമാണ് പാസ് നിരക്കുകൾ. പുതിയ സംവിധാനം സ്‌റ്റേഷനുകളിലെ അനിയന്ത്രിത തിരക്ക് കുറയ്ക്കുമെന്നും ദൈനംദിന യാത്രക്കാർക്ക് മെട്രോ യാത്ര കൂടുതൽ സൗകര്യപ്രദമാക്കുമെന്നും ബിഎംആർസിഎൽ ചൂണ്ടിക്കാട്ടി.

English summary

Bengaluru Traffic congestion has reduced drastically due to Metro Yellow Line; Now Seventh train arrives.