ബെംഗളൂരുവിലെ ആദ്യ ഡബിൾ ഡക്കർ ഫ്ലൈഓവർ പരീക്ഷണാടിസ്ഥാനത്തിൽ തുറന്നു; സിഎസ്ബിയിൽ തിരക്ക് കുറയും!
ബെംഗളൂരു: നഗരത്തിലെ സെൻട്രൽ സിൽക്ക് ബോർഡ് (സിഎസ്ബി) ജംഗ്ഷനിലെ ആദ്യ ഡബിൾ ഡെക്കർ മേൽപ്പാലത്തിന്റെ താഴത്തെ തട്ട് പരീക്ഷണാടിസ്ഥാനത്തിൽ തുറന്നു. 5.1 കിലോമീറ്റർ ദൈർഘ്യമുള്ള ഈ പാത രാഗിഗുഡ്ഡയിൽ നിന്ന് സിഎസ്ബിയിലേക്ക് ഗതാഗതം സാധ്യമാക്കുന്നു. ഇതുവഴി തിരക്കേറിയ ഈ ജംഗ്ഷനിലെ തിരക്ക് 30 ശതമാനം കുറയ്ക്കുമെന്നാണ് അധികൃതർ പ്രതീക്ഷിക്കുന്നത്. പുതിയ മേൽപ്പാലത്തിലൂടെ ഒരുവിധം എല്ലാ വാഹനങ്ങൾക്കും സഞ്ചരിക്കാൻ ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് അനുമതി നൽകി.
"നിർമ്മാണ സാമഗ്രികളും ഭാരമുള്ളവയുമൊഴികെ എല്ലാ വാഹനങ്ങൾക്കും പരീക്ഷണാടിസ്ഥാനത്തിൽ മേൽപ്പാലം തുറന്നിട്ടുണ്ട്." എന്നാണ് ട്രാഫിക് ഉദ്യോഗസ്ഥൻ അറിയിച്ചത്. രാഗിഗുഡ്ഡ, ബിടിഎം ലേഔട്ട് എന്നിവിടങ്ങളിൽ നിന്ന് കെആർ പുരം, ഇലക്ട്രോണിക്സ് സിറ്റി എന്നിവിടങ്ങളിലേക്ക് പോകുന്നവർക്കാണ് ഈ പാത പ്രധാനമായും പ്രയോജനം ചെയ്യുന്നത്. ബന്നാർഘട്ട റോഡിൽ നിന്ന് വരുന്നവർക്കും ഇതുവഴി തിരക്കേറിയ സിഎസ്ബി സിഗ്നൽ ഒഴിവാക്കാം. തിരക്കേറിയ സമയങ്ങളിൽ ഏകദേശം 15 മുതൽ 20 മിനിറ്റ് വരെ യാത്രാസമയം ലാഭിക്കാൻ ഇത് സഹായിക്കും.
സിഎസ്ബിയിൽ നിന്ന് രാഗിഗുഡ്ഡ ഭാഗത്തേക്ക് പോകുന്ന വാഹനങ്ങൾക്ക് നിലവിൽ മേൽപ്പാലം ഉപയോഗിക്കാനാവില്ല. എച്ച്എസ്ആർ ലേഔട്ടിനെ ബിടിഎം ലേഔട്ടുമായി ബന്ധിപ്പിക്കുന്ന റാമ്പുകളുടെ നിർമ്മാണം പൂർത്തിയായിട്ടില്ല. അതുകൂടി കഴിഞ്ഞാൽ ഈ പാതയിലെ ഇരുദിശാ ഗതാഗതം പൂർണമാകും. ഈ ഡബിൾ ഡെക്കർ ഘടനയിൽ റോഡ് മേൽപ്പാലവും അതിന് മുകളിലൂടെ മെട്രോ ലൈനും ചേരുന്നു. ഏകദേശം 450 കോടി രൂപയാണ് പദ്ധതിയുടെ ആകെ ചെലവ്.
പൂർണമായി പ്രവർത്തനക്ഷമമാകുമ്പോൾ, റോഡ് യാത്രക്കാർക്കും നമ്മ മെട്രോ യാത്രക്കാർക്കും ഇത് ഒരുപോലെ ഉപകാരപ്രദമാകും. മേൽപ്പാലത്തിൽ പുതിയ ദിശാബോർഡുകൾ സ്ഥാപിച്ചിട്ടുണ്ട്. ഡ്രൈവർമാർ മണിക്കൂറിൽ 40 കിലോമീറ്റർ വേഗത പരിധി പാലിക്കണമെന്ന് ഇവയിൽ വ്യക്തമാക്കുന്നു. പരീക്ഷണ കാലയളവിലെ ഗതാഗത രീതികൾ പോലീസ് നിരീക്ഷിക്കും. സുരക്ഷാ പ്രശ്നങ്ങളുണ്ടെങ്കിൽ രാത്രികാല ഗതാഗതം പിന്നീട് നിയന്ത്രിക്കാൻ സാധ്യതയുണ്ട്. സിഎസ്ബി ജംഗ്ഷനിൽ സുഗമമായ ഗതാഗതം അധികൃതർ പ്രതീക്ഷിക്കുന്നുണ്ടെങ്കിലും മറ്റ് മേഖലകളിൽ തിരക്ക് കൂടാനും സാധ്യതയുണ്ട്.
കൂടുതൽ വാഹനങ്ങൾ റാമ്പുകളും താഴെയുള്ള റോഡുകളും ഉപയോഗിച്ച് തുടങ്ങുമ്പോൾ തിരക്ക് എച്ച്എസ്ആർ ലേഔട്ട് ഭാഗത്തേക്ക് മാറാൻ സാധ്യതയുണ്ടെന്നാണ് ട്രാഫിക് ഉദ്യോഗസ്ഥർ പറയുന്ന. ഉപമുഖ്യമന്ത്രി ഡികെ ശിവകുമാർ പുതിയ റോഡിലൂടെ യാത്ര ചെയ്യുകയും ഔദ്യോഗിക ഉദ്ഘാടനം പിന്നീട് നടത്തുമെന്ന് അറിയിക്കുകയും ചെയ്തിട്ടുണ്ട്.
പുതിയ മെട്രോ ലൈനുകൾ വരാനിരിക്കുന്ന ബംഗളൂരുവിലെ മറ്റ് പ്രദേശങ്ങളിലും ഡബിൾ ഡെക്കർ മേൽപ്പാലങ്ങളുടെ സാധ്യത പഠിക്കുമെന്ന് ഡികെ ശിവകുമാർ പറഞ്ഞു. നിലവിലെ സിഎസ്ബി പാത ഉപയോഗിക്കുന്ന യാത്രക്കാർക്ക് പുതിയ സംവിധാനം യാത്രാനുഭവം മെച്ചപ്പെടുത്തുന്നുണ്ടോ എന്ന് വിലയിരുത്താവുന്നതാണ്. യാത്ര പുറപ്പെടുന്നതിന് മുമ്പ്, ഡ്രൈവർമാർ പാതയുടെ ദിശ ഉറപ്പാക്കി 40 കിലോമീറ്റർ വേഗത പരിധി പാലിക്കുക.
ഭാരമുള്ള നിർമ്മാണ വാഹനങ്ങൾ മേൽപ്പാലത്തിൽ ഒഴിവാക്കുകയും എച്ച്എസ്ആർ ലേഔട്ടിന് സമീപം ട്രാഫിക് രീതികളിൽ വരാനിടയുള്ള മാറ്റങ്ങൾക്ക് തയ്യാറാകുകയും ചെയ്യുക എന്നതാണ് ഇപ്പോഴത്തെ തീരുമാനം. ദീർഘകാല നിയമങ്ങൾ തീരുമാനിക്കും മുൻപ് അധികൃതർ ഇവിടെ വാഹനങ്ങളുടെ ഉപയോഗം നിരീക്ഷിക്കുന്നത് തുടരും.
Click it and Unblock the Notifications
Sign in with Google