ആര്‍എസ്എസിന് പുതിയ ജനറല്‍ സെക്രട്ടറി, സുരേഷ് ഭയ്യാജിക്ക് പകരം ദത്താത്രേയ ഹൊസബലെ

ബെംഗളൂരു: ആര്‍എസ്എസിന് പുതിയ ജനറല്‍ സെക്രട്ടറി. ദത്താത്രേയ ഹൊസബലെയാണ് പുതിയ ജനറല്‍ സെക്രട്ടറി. കര്‍ണാടക സ്വദേശിയായ ഹൊസബലെയെ മികച്ച നേതൃമികവിന്റെ അടിസ്ഥാനത്തിലാണ് ജനറല്‍ സെക്രട്ടറിയാവുന്നത്. ആര്‍എസ്എസിന്റെ സഹ കാര്യവാഹകായിരുന്നു അദ്ദേഹം. ഇത് ജോയിന്റ് ജനറല്‍ സെക്രട്ടറി പദവിയായിരുന്നു. ഇവിടെ നിന്നാണ് അദ്ദേഹം ജനറല്‍ സെക്രട്ടറി പദവിയിലേക്ക് എത്തുന്നത്. അഖില ഭാരതീയ പ്രതിനിധി സഭയില്‍ നടന്ന വാര്‍ഷിക യോഗത്തിലാണ് അദ്ദേഹത്തെ തിരഞ്ഞെടുത്തത്.

2009 മുതല്‍ ആര്‍എസ്എസിന്റെ ജോയിന്റ് ജനറല്‍ സെക്രട്ടറിയാണ് ദത്താത്രേയ ഹൊസബലെ. നിലവില്‍ സുരേഷ് ഭയ്യാജിയാണ് ജനറല്‍ സെക്രട്ടറി. 73കാരായ ഭയ്യാജി ജോഷി നാല് ടേം ആര്‍എസ്എസിന്റെ ജനറല്‍ സെക്രട്ടറിയായിരുന്നു. ഓരോ ടേമും മൂന്ന് വര്‍ഷത്തോളമുണ്ടാവും. കര്‍ണാടകത്തിലെ ശിവമോഗയിലെ സൊറാബ് സ്വദേശിയാണ് ദത്താത്രേയ ഹൊസബലെ. ഇംഗ്ലീഷ് സാഹിത്യത്തില്‍ ബിരുദാനന്തര ബിരുദവും അദ്ദേഹത്തിനുണ്ട്. 1968ലാമ് അദ്ദേഹം ആര്‍എസ്എസില്‍ ചേരുന്നത്. 1972ല്‍ എബിവിപിയുടെ ഭാഗമായി. 1978 മുതല്‍ എബിവിപിയുടെ മുഴുവന്‍ സമയ പ്രവര്‍ത്തകനാണ് അദ്ദേഹം. 15 വര്‍ഷം എബിവിപിയുടെ ജനറല്‍ സെക്രട്ടറിയായിരുന്നു ദത്താത്രേയ.

ജനറല്‍ സെക്രട്ടറി പദവി ആര്‍എസ്എസിലെ നിര്‍ണായകമായ പദവിയാണ്. ആര്‍എസ്എസിലെ രണ്ടാം സ്ഥാനമായിട്ടാണ് ഇതിനെ കാണുന്നത്. ആര്‍എസ്എസ് അധ്യക്ഷന്‍ കഴിഞ്ഞാല്‍ ഏറ്റവും അധികാരം ഉള്ളത് ജനറല്‍ സെക്രട്ടറിക്കാണ്. ഇത്തവണ കൊവിഡിനെ തുടര്‍ന്ന് തിരഞ്ഞെടുപ്പ് ബെംഗളൂരുവിലാണ് നടന്നത്. ആര്‍എസ്എസ് ആസ്ഥാനമായ നാഗ്പൂരിലായിരുന്നു തിരഞ്ഞെടുപ്പ് നടക്കേണ്ടത്. എന്നാല്‍ മഹാരാഷ്ട്രയില്‍ പലയിടത്തും ലോക്ഡൗണും ഒപ്പം കൊവിഡ് കേസുകളും വര്‍ധിച്ചത് വലിയ പ്രതിസന്ധിയായിരുന്നു.

English summary

dattatreya hosable become rss new general secretary, replaces bhaiyyaji joshi