ഇനി ദേശീയപാതയുടെ സുരക്ഷ വർധിക്കും; 40,000 കി.മീയിൽ എഐ ക്യാമറ, റോഡിലെ കുഴികൾ പോലും കണ്ടെത്തും!

ന്യൂഡൽഹി: രാജ്യത്തെ ദേശീയപാതകൾ കൂടുതൽ സ്‌മാർട്ടാക്കുന്നതിനും സാങ്കേതികവിദ്യയുടെ സഹായത്തോടെയുള്ള റോഡ് പരിപാലനം മെച്ചപ്പെടുത്തുന്നതിനുമായി പുതിയൊരു നീക്കത്തിനൊരുങ്ങുകയാണ് നാഷണൽ ഹൈവേ അതോറിറ്റി. ഏകദേശം 40,000 കിലോമീറ്റർ ദേശീയപാതകളിൽ അത്യാധുനികമായ എഐ അധിഷ്‌ഠിത ഡാഷ്‌ക്യാം നിരീക്ഷണ സംവിധാനം എൻഎച്ച്എഐ അവതരിപ്പിക്കാൻ ഒരുങ്ങുകയാണ്.

ഈ പുതിയ സംവിധാനം റോഡുകളുടെ പരിപാലനവും സുരക്ഷാ മാനദണ്ഡങ്ങളും മെച്ചപ്പെടുത്താൻ സഹായിക്കും. പട്രോൾ വാഹനങ്ങളിൽ നിന്നുള്ള എഐ വിശകലനം ഉപയോഗിച്ച്, 30-ലധികം തകരാറുകളും അപകടസാധ്യതകളും തത്സമയം കണ്ടെത്താൻ ഇതിന് കഴിയും. രാജ്യത്തുടനീളം ഓട്ടോമേറ്റഡ് നിരീക്ഷണത്തിലൂടെയും ഡാറ്റാധിഷ്ഠിത വിശകലനത്തിലൂടെയും റോഡുകളുടെ തത്സമയ നിരീക്ഷണം സാധ്യമാക്കുക എന്നതാണ് ഈ സംരംഭത്തിന്റെ പ്രധാന ലക്ഷ്യം.

എന്താണ് ഡാഷ്‌ക്യാം അനലിറ്റിക്‌സ് സർവീസസ്?

പുതിയ സംവിധാനത്തിന് 'ഡാഷ്‌ക്യാം അനലിറ്റിക്‌സ് സർവീസസ്' എന്നാണ് പേര് നൽകിയിരിക്കുന്നത്. ആർട്ടിഫിഷ്യൽ ഇന്റലിജൻസിന്റെയും മെഷീൻ ലേണിംഗിന്റെയും സഹായത്തോടെയാകും ഇത് ദേശീയപാതകളിലെ അവസ്ഥകൾ നിരീക്ഷിക്കുകയും വിലയിരുത്തുകയും ചെയ്യുക. പദ്ധതിയുടെ ഭാഗമായി, ഹൈ-റെസല്യൂഷൻ ഡാഷ്‌ബോർഡ് ക്യാമറകൾ റൂട്ട് പട്രോൾ വാഹനങ്ങളിൽ സ്ഥാപിക്കും, ഇവ റോഡുകൾ നിരന്തരം സർവേ ചെയ്യും.

ഈ ക്യാമറകൾ തുടർച്ചയായി വീഡിയോയും ചിത്രങ്ങളും പകർത്തുകയും, അവ പിന്നീട് എഐ അധിഷ്‌ഠിത മോഡലുകൾ ഉപയോഗിച്ച് വിശകലനം ചെയ്യുകയും ചെയ്യും. 30-ൽ അധികം തരം റോഡ് തകരാറുകളും അപാകതകളും സ്വയമേവ കണ്ടെത്താൻ ഈ സംവിധാനം രൂപകൽപ്പന ചെയ്‌തിട്ടുള്ളതിനാൽ, മാനുവൽ പരിശോധനകളെ ആശ്രയിക്കുന്നത് കുറയ്ക്കാനും പ്രശ്‌നങ്ങൾ വേഗത്തിൽ തിരിച്ചറിയാനും അധികാരികളെ സഹായിക്കും.

കുഴികൾ കണ്ടെത്താനും സഹായിക്കും

ഈ എഐ നിരീക്ഷണ സംവിധാനം പ്രധാനമായും റോഡിന്റെ ഉപരിതല നിലവാരത്തിൽ ശ്രദ്ധ കേന്ദ്രീകരിക്കും. കുഴികൾ, വിള്ളലുകൾ, തേയ്‌മാനം എന്നിവ ഉൾപ്പെടെയുള്ള പ്രശ്‌നങ്ങൾ ഇതിൽപ്പെടും. കൂടാതെ ലെയിൻ അടയാളങ്ങൾ, ക്രാഷ് ബാരിയറുകൾ, തെരുവ് വിളക്കുകൾ, റോഡ് അടയാളങ്ങൾ തുടങ്ങിയ നിർണായകമായ അടിസ്ഥാന സൗകര്യങ്ങളും ഇത് നിരീക്ഷിക്കും. അടിസ്ഥാനപരമായ പരിപാലന പരിശോധനകൾക്കപ്പുറം ഇതിന്റെ നിരീക്ഷണം വികസിക്കുന്നു.

അനധികൃത മീഡിയൻ ഓപ്പണിംഗുകൾ, അംഗീകാരമില്ലാത്ത പരസ്യബോർഡുകൾ, റോഡരികിലെ തടസങ്ങൾ, തെറ്റായ പാർക്കിംഗ് എന്നിവ പോലുള്ള സുരക്ഷാ സംബന്ധമായ അപകടസാധ്യതകളും കയ്യേറ്റങ്ങളും കണ്ടെത്താനും ഈ സംവിധാനം ഉപയോഗിക്കും. വെള്ളക്കെട്ട്, അമിതമായ സസ്യവളർച്ച, തടസപ്പെട്ട ഡ്രെയിനേജ് സംവിധാനങ്ങൾ, ബസ് ബേകളുടെ അവസ്ഥ എന്നിവയും ഇത് നിരീക്ഷിക്കും. ഇത് സുരക്ഷയും പരിപാലനവുമായുള്ള പ്രശ്‌നങ്ങൾ കാര്യക്ഷമമായി തിരിച്ചറിയാൻ ഉദ്യോഗസ്ഥരെ സഹായിക്കും.

നിരീക്ഷണ പ്രക്രിയ കൂടുതൽ സമഗ്രമാക്കുന്നതിനായി, എൻഎച്ച്എഐ രാത്രികാല സർവേകളും നടത്തും. റോഡ് അടയാളങ്ങൾ, റിഫ്ലക്‌ടറുകൾ, ഹൈവേ ലൈറ്റിംഗ് സംവിധാനങ്ങൾ എന്നിവയുടെ ദൃശ്യപരതയും കാര്യക്ഷമതയും വിലയിരുത്തുന്നതിലാണ് ഈ പരിശോധനകൾ ശ്രദ്ധ കേന്ദ്രീകരിക്കുക. പകൽ സമയത്ത് കണ്ടെത്താൻ പ്രയാസമുള്ള പ്രശ്‌നങ്ങൾ, പ്രത്യേകിച്ച് രാത്രിയിൽ ഡ്രൈവർമാരുടെ കാഴ്‌ചയെയും റോഡ് സുരക്ഷയെയും ബാധിക്കുന്നവ, ഈ സർവേകളിലൂടെ തിരിച്ചറിയാൻ സാധിക്കുമെന്നാണ് പ്രതീക്ഷ.

നിരീക്ഷണം കേന്ദ്രീകൃത പ്ലാറ്റ്‌ഫോമിൽ

ഡാഷ്‌ക്യാം ശൃംഖല വഴി ശേഖരിക്കുന്ന എല്ലാ വിവരങ്ങളും എഐ വിശകലനവും ഇന്ററാക്‌ടീവ് ഡാഷ്‌ബോർഡുകളുമുള്ള ഒരു കേന്ദ്രീകൃത ഡിജിറ്റൽ പ്ലാറ്റ്‌ഫോമിലേക്ക് അപ്‌ലോഡ് ചെയ്യും. ഉദ്യോഗസ്ഥർക്ക് തത്സമയം റോഡിന്റെ അവസ്ഥ നിരീക്ഷിക്കാനും, കാലക്രമേണ വന്ന മാറ്റങ്ങൾ താരതമ്യം ചെയ്യാനും, പരിപാലന-റിപ്പയർ ജോലികളുടെ പുരോഗതി കൃത്യമായി നിരീക്ഷിക്കാനും ഈ പ്ലാറ്റ്‌ഫോം സഹായിക്കും.

മികച്ച മാനേജ്‌മെന്റിനും മേൽനോട്ടത്തിനുമായി ദേശീയപാത ശൃംഖലയെ ഈ സംവിധാനത്തിന് കീഴിൽ അഞ്ച് സോണുകളായി തിരിക്കും. ഡാറ്റാ കൈകാര്യം ചെയ്യുന്നത് കൂടുതൽ ചിട്ടപ്പെടുത്താനും എഐ മോഡലുകൾ കണ്ടെത്തുകയും അടയാളപ്പെടുത്തുകയും ചെയ്യുന്ന പ്രശ്‌നങ്ങളിൽ വേഗത്തിൽ നടപടിയെടുക്കാനും ഈ ഘടന സഹായിക്കും.

ഈ സംവിധാനം വഴി ലഭിക്കുന്ന വിവരങ്ങൾ എൻഎച്ച്എഐയുടെ കേന്ദ്ര ഡാറ്റാ ഇക്കോസിസ്‌റ്റവുമായി സംയോജിപ്പിക്കും. ഇത് തിരിച്ചറിഞ്ഞ തകരാറുകൾ, സുരക്ഷാ പ്രശ്‌നങ്ങൾ, പരിപാലന ആവശ്യകതകൾ എന്നിവയിൽ കൃത്യസമയത്ത് ഏകോപിപ്പിച്ച നടപടികൾ ഉറപ്പാക്കുമെന്നാണ് കരുതുന്നത്. നിലവിലെ സാഹചര്യത്തിൽ ഇത് യാത്രക്കാരുടെ സുരക്ഷാ വർധിപ്പിക്കുമെന്ന കാര്യത്തിൽ യാതൊരു തർക്കവുമില്ല.