ഗുവാഹത്തി വിമാനത്താവളത്തിലെ പുതിയ ടെർമിനൽ വാണിജ്യാടിസ്ഥാനത്തിൽ പ്രവർത്തനം തുടങ്ങി; കണക്റ്റിവിറ്റി ശക്തിപ്പെടും

വടക്കുകിഴക്കൻ ഇന്ത്യയുടെ വ്യോമയാന മേഖലയ്ക്ക് ഉണർവേകി, ഗുവാഹത്തിയിലെ ലോക്പ്രിയ ഗോപിനാഥ് ബർദോളോയ് അന്താരാഷ്ട്ര വിമാനത്താവളത്തിലെ പുതിയ ടെർമിനൽ വാണിജ്യാടിസ്ഥാനത്തിലുള്ള പ്രവർത്തനങ്ങൾ ആരംഭിച്ചു. അസമിന്റെ വ്യോമയാന ശേഷി ഗണ്യമായി വർധിപ്പിക്കുന്ന ഈ സൗകര്യം, പ്രാദേശികവും അന്താരാഷ്ട്ര തലത്തിലുമുള്ള ലക്ഷ്യസ്ഥാനങ്ങളിലേക്കുള്ള കണക്റ്റിവിറ്റി ശക്തിപ്പെടുത്തും.

ഫെബ്രുവരി 22 ഞായറാഴ്‌ച പ്രവർത്തനം ആരംഭിച്ച പുതിയ ടെർമിനൽ, ഗുവാഹത്തി ലോക്പ്രിയ ഗോപിനാഥ് ബർദോളോയ് അന്താരാഷ്ട്ര വിമാനത്താവളത്തിന്റെ വാർഷിക ശേഷി 1.31 കോടി യാത്രക്കാരായി ഉയർത്തുന്നതാണ്. തന്ത്രപ്രധാനമായ വടക്കുകിഴക്കൻ മേഖലയുടെ പ്രധാന വ്യോമയാന കവാടമായി ഇത് ഗുവാഹത്തിയുടെ സ്ഥാനം ഉറപ്പിക്കുന്നു.

ചെക്ക്-ഇൻ, ലഗേജ് കൈകാര്യം ചെയ്യൽ, സുരക്ഷാ പരിശോധനകൾ, വിമാന പ്രവർത്തനങ്ങൾ എന്നിവയുടെ തത്സമയ പരീക്ഷണങ്ങൾ ഉൾപ്പെടെ വിപുലമായ സിസ്‌റ്റം മൂല്യനിർണ്ണയങ്ങൾ പൂർത്തിയാക്കിയ ശേഷമാണ് ടെർമിനൽ പ്രവർത്തനസജ്ജമായത്. 2025 ഡിസംബർ 20-ന് പ്രധാനമന്ത്രി നരേന്ദ്ര മോദിയാണ് ഇത് ഉദ്ഘാടനം ചെയ്‌തത്‌.

ടെർമിനലിന്റെ പ്രവർത്തനാരംഭ ചടങ്ങിൽ അസം മുഖ്യമന്ത്രി ഹിമന്ത ബിശ്വ ശർമ്മയും അദാനി എയർപോർട്ട് ഹോൾഡിംഗ്സ് ലിമിറ്റഡിന്റെ ഡയറക്‌ടർ ജീത് അദാനിയും പങ്കെടുത്തു. വിമാനത്താവളത്തിലെ ഉദ്യോഗസ്ഥരും ജീവനക്കാരും പ്രാദേശിക സമൂഹങ്ങളിലെ അംഗങ്ങളും ചടങ്ങിന് സാക്ഷ്യം വഹിച്ചു.
പുതിയ ടെർമിനലിൽ നിന്ന് ആദ്യ യാത്രക്കാരന് ഒരു പ്രത്യേക ബോർഡിംഗ് പാസ് നൽകിയതും, മുംബൈയിൽ നിന്ന് എത്തിയ അകാസ എയർ വിമാനം ഇവിടെയിറങ്ങിയതുമാണ് പ്രവർത്തനങ്ങൾക്ക് തുടക്കം കുറിച്ചത്.

അസമിന്റെ പാരമ്പര്യവും സമൂഹത്തിന്റെ പങ്കാളിത്തവും പ്രതിഫലിക്കുന്ന സാംസ്‌കാരിക പരിപാടികളും പരമ്പരാഗത ചടങ്ങുകളും ഒരുക്കി. അസമിന്റെ അടിസ്ഥാന സൗകര്യവും ടൂറിസം സാധ്യതകളും വർധിപ്പിക്കാൻ പുതിയ ടെർമിനൽ ഒരു പ്രധാന ചുവടുവെപ്പാണെന്ന് മുഖ്യമന്ത്രി ഹിമന്ത ബിശ്വ ശർമ്മ അഭിപ്രായപ്പെട്ടു. സംസ്ഥാനത്ത് 50,000 കോടി രൂപ നിക്ഷേപം നടത്താനുള്ള അദാനി ഗ്രൂപ്പിന്റെ പ്രതിബദ്ധതയെ അദ്ദേഹം അഭിനന്ദിച്ചു.

നവീകരിച്ച ഈ സൗകര്യം സാമ്പത്തിക വളർച്ചയ്ക്കും മേഖലയിലെ കണക്റ്റിവിറ്റി മെച്ചപ്പെടുത്തുന്നതിനും മുഖ്യ പങ്ക് വഹിക്കുമെന്നും അദ്ദേഹം ചൂണ്ടിക്കാട്ടി. മേഖലയിൽ വ്യോമയാത്രയ്ക്കുള്ള വർധിച്ചുവരുന്ന ആവശ്യം ടെർമിനൽ വിപുലീകരണം വ്യക്തമാക്കുന്നു, ഭാവിക്ക് അനുയോജ്യമായ അടിസ്ഥാന സൗകര്യങ്ങൾ ഒരുക്കാനുള്ള കാഴ്‌ചപ്പാടിന് ഇത് അനുസൃതമാണെന്ന് ജീത് അദാനി പറഞ്ഞു. അസമിനും വടക്കുകിഴക്കൻ മേഖലയ്ക്കും ഇത് ഒരു പ്രധാന നാഴികക്കല്ലാണെന്നും, കണക്റ്റിവിറ്റിയും പ്രാദേശിക വികസനവും മെച്ചപ്പെടുത്താൻ സഹായിക്കുമെന്നും അദ്ദേഹം കൂട്ടിച്ചേർത്തു.

സമീപ വർഷങ്ങളിൽ, ഇന്ത്യയിലെ മെട്രോ ഇതര വിമാനത്താവളങ്ങളിൽ അതിവേഗം വളരുന്ന ഒന്നായി ഗുവാഹത്തി വിമാനത്താവളം മാറി. ഇവിടെ വർഷംതോറും 90 ലക്ഷത്തിലധികം യാത്രക്കാരെയാണ് കൈകാര്യം ചെയ്യുന്നത്. നിലവിൽ 21 ആഭ്യന്തര ലക്ഷ്യസ്ഥാനങ്ങളിലേക്കും ബാങ്കോക്ക്, പാരോ, സിംഗപ്പൂർ ഉൾപ്പെടെ മൂന്ന് അന്താരാഷ്ട്ര നഗരങ്ങളിലേക്കും സർവീസുകളുണ്ട്. ദിവസവും 130-ൽ അധികം വിമാന നീക്കങ്ങൾ ഇവിടെ നടക്കുന്നു.

വർധിപ്പിച്ച ശേഷി, കൂടുതൽ റൂട്ടുകളെയും വിമാന സർവീസുകളെയും പിന്തുണയ്ക്കുമെന്ന് പ്രതീക്ഷിക്കുന്നു. വടക്കുകിഴക്കൻ മേഖലയെ ഇന്ത്യൻ പ്രധാന ഭൂപ്രദേശവുമായും തെക്കുകിഴക്കൻ ഏഷ്യയുമായും ബന്ധിപ്പിക്കുന്ന ഒരു പ്രാദേശിക വ്യോമയാന കേന്ദ്രമെന്ന നിലയിൽ ഗുവാഹത്തിയുടെ സ്ഥാനം ഇത് ശക്തിപ്പെടുത്തും.

പുതിയ ടെർമിനലിൽ ഡിജി യാത്ര സാങ്കേതികവിദ്യ ഉപയോഗിച്ചുള്ള യാത്രക്കാരുടെ നടപടിക്രമങ്ങൾ, കേന്ദ്രീകൃത ആശയവിനിമയ സംവിധാനങ്ങൾ, സംയോജിത വേഫൈൻഡിംഗ് സൊല്യൂഷനുകൾ എന്നിവയുൾപ്പെടെയുള്ള ഡിജിറ്റൽ സാങ്കേതികവിദ്യകളും ഉൾപ്പെടുത്തിയിട്ടുണ്ട്. ഇത് യാത്രക്കാരുടെ സൗകര്യം വർധിപ്പിക്കും. റീട്ടെയിൽ കടകളും ഭക്ഷണശാലകളും ഘട്ടംഘട്ടമായി അവതരിപ്പിക്കും.

അസമിന്റെ കൊപൗ ഫൂലിൽ നിന്നും പരമ്പരാഗത മുളകൊണ്ടുള്ള കരകൗശലത്തിൽ നിന്നും പ്രചോദനമുൾക്കൊണ്ട്, വടക്കുകിഴക്കൻ മേഖലയുടെ സാംസ്‌കാരിക തന്മക്ക് ഊന്നൽ നൽകി രൂപകൽപ്പന ചെയ്‌തിട്ടുള്ള ടെർമിനലാണിത്. 140 മെട്രിക് ടണ്ണിലധികം മുള ഉപയോഗിച്ച ഈ ഘടനയിൽ, അസം, അയൽ സംസ്ഥാനമായ അരുണാചൽ പ്രദേശ് എന്നിവിടങ്ങളുമായി ബന്ധപ്പെട്ട പ്രാദേശിക രൂപകൽപ്പന ഘടകങ്ങളും സമന്വയിപ്പിച്ചിട്ടുണ്ട്.

അദാനി എയർപോർട്ട് ഹോൾഡിംഗ്സ് ലിമിറ്റഡിന്റെ ഉപസ്ഥാപനമായ ഗുവാഹത്തി ഇന്റർനാഷണൽ എയർപോർട്ട് ലിമിറ്റഡാണ് വിമാനത്താവളത്തിന്റെ നടത്തിപ്പുകാർ. കണക്റ്റിവിറ്റി മെച്ചപ്പെടുത്തുന്നതിനും ടൂറിസം പ്രോത്സാഹിപ്പിക്കുന്നതിനും അസമിലെയും വിശാലമായ വടക്കുകിഴക്കൻ മേഖലയിലെയും സാമ്പത്തിക വികസനത്തെ പിന്തുണയ്ക്കുന്നതിനും വിമാനത്താവളം ഒരു പ്രധാന പങ്ക് വഹിക്കുന്നത് തുടരും.

പുതിയ ടെർമിനലിന്റെ പ്രവർത്തനം, ഇന്ത്യയുടെ വ്യോമയാന അടിസ്ഥാന സൗകര്യ വികസനത്തിലെ ഒരു സുപ്രധാന നാഴികക്കല്ലാണ്. ഇത് വടക്കുകിഴക്കൻ മേഖലയെ ദേശീയവും ആഗോളവുമായ വ്യോമ ശൃംഖലകളുമായി കൂടുതൽ ചേർത്ത് നിർത്തുമെന്ന് പ്രതീക്ഷിക്കുന്നു.

English summary

Guwahati international airport new terminal starts commercial operations; capacity to increase into 13 million.