പശുവിനെ കെട്ടിപ്പിടിക്കണം, ബിപി കുറയാന്‍ സഹായിക്കും; വിചിത്ര വാദവുമായി യുപി മന്ത്രി

വാലന്റൈന്‍സ് ഡേ ഇന്ത്യയില്‍ ആഘോഷിക്കരുതെന്നാണ് എനിക്ക് പറയാനുള്ളത്. സമൂഹത്തില്‍ മോശം പ്രവണത കൊണ്ടുവരുന്നതാണ് ഈ ദിനമെന്ന് മന്ത്രി പറഞ്ഞു

Updated: Thursday, February 9, 2023, 16:09 [IST]

ദില്ലി: പശുവിനെ സ്പര്‍ശിക്കുന്നതിലൂടെ നിരവധി നേട്ടങ്ങളാണ് ഒരാള്‍ക്ക് ഉണ്ടാവുകയെന്ന് ഉത്തര്‍പ്രദേശ് മൃഗസംരക്ഷണ വകുപ്പ് മന്ത്രി ധരംപാല്‍ സിംഗ്. പശുവിനെ കെട്ടിപ്പിടിക്കുന്നത് ബിപി കുറയ്ക്കുമെന്നും, അസുഖങ്ങള്‍ തടയുമെന്നും മന്ത്രി പറഞ്ഞു.

പശുവിനെ കെട്ടിപ്പിടിക്കുന്ന ദിനമായി ഫെബ്രുവരി പതിനാലിനെ പ്രഖ്യാപിച്ച കേന്ദ്ര സര്‍ക്കാര്‍ നടപടിയെ മന്ത്രി അഭിനന്ദിക്കുകയും ചെയ്തു. എല്ലാ പൗരന്മാരും ഈ ദിനം ആഘോഷിക്കണമെന്ന് അദ്ദേഹം അഭ്യര്‍ത്ഥിച്ചു.

പശുക്കളെ സ്പര്‍ശിക്കുന്നതിലൂടെ ഒരുപാട് രോഗങ്ങളില്‍ നിന്ന് മുക്തി നേടാന്‍ സാധിക്കുമെന്നും ധരംപാല്‍ സിംഗ് പറഞ്ഞു.

വാലന്റൈന്‍സ് ദിനത്തില്‍ പശുക്കളെ ആലിംഗനം ചെയ്യാനായിരുന്നു കേന്ദ്ര സര്‍ക്കാര്‍ ആഹ്വാനം ചെയ്തത്. പശുക്കളെ കെട്ടിപ്പിടിക്കുന്നത് സമൂഹത്തില്‍ സന്തോഷമുണ്ടാക്കുമെന്നാണ് ആഹ്വാനത്തിന് പിന്നാലെ കേന്ദ്ര മൃഗസംരക്ഷണ ബോര്‍ഡ് വിശദീകരിച്ചത്.

ഇന്ത്യന്‍ സംസ്‌കാരത്തിന്റെയും, പ്രാദേശിക സമ്പദ് വ്യവസ്ഥയുടെയും നട്ടെല്ലാണ് പശു. അത് പ്രതിനിധാനം ചെയ്യുന്ന സമ്പത്തിനെയും ജൈവ വൈവിധ്യത്തേയുമാണെന്ന് കേന്ദ്ര മൃഗസംരക്ഷ ബോര്‍ഡ് വിശദീകരിച്ചിരുന്നു.

അമ്മയെ പോലെ നമ്മള്‍ പശുവിനെ പരിപാലിക്കുന്നുണ്ട്. കാമധേനുവെന്നും, ഗോമാതാവെന്നും അതിനെ വിളിക്കുന്നത് അതുകൊണ്ടെന്നാണെന്നും ബോര്‍ഡ് പറഞ്ഞു. വേദ സംസ്‌കാരം പാശ്ചാത്യ സംസ്‌കാരത്തിന്റെ അതിപ്രസരത്തെ തുടര്‍ന്ന് ഇല്ലാതായി പോകുന്ന അവസ്ഥയിലാണെന്നും ബോര്‍ഡ് പറഞ്ഞു.

യൂറോപ്പ് എന്ത് സുന്ദരം, ഇതൊന്നും കണ്ടില്ലെങ്കില്‍ എന്ത് ജീവിതം; സോളോ ട്രിപ്പിന് ബെസ്റ്റ് ഈ സ്ഥലങ്ങള്‍

ഒരുവശത്ത് ലോകത്തെല്ലായിടത്തും വാലന്റൈന്‍സ് ഡേ ആഘോഷിക്കുന്നു. മറുവശത്ത് മൃഗസംരക്ഷ വകുപ്പ് കൗ ഹഗ്‌സ് ഡേ ആഘോഷിക്കുന്നുണ്ട്. വാലന്റൈന്‍സ് ഡേയോട് എതിര്‍പ്പുള്ളവര്‍ക്ക് അത് ആഘോഷിക്കാവുന്നതാണെന്ന് ധരംസിംഗ് പറഞ്ഞു.

വാലന്റൈസ് ഡേ ആഘോഷിക്കുന്നതില്‍ പ്രശ്‌നമുള്ള നിരവധി പേര്‍ ഇന്ത്യയിലുണ്ട്. അവര്‍ക്ക് വേണ്ടിയാണ് ഈ ദിനം ആചരിക്കുന്നത്. പശു ഈ ലോകത്തിന്റെ അമ്മയാണ്. ഈ ലോകത്ത് ഏതെങ്കിലും മൃഗത്തിന്റെ മൂത്രവും ചാണകവും മരുന്നായി ഉപയോഗിക്കുന്നുണ്ടെങ്കില്‍ അത് പശുവിന്റേത് മാത്രമാണ്. പശുവിനെ ഒന്ന് തൊട്ടാല്‍ നിരവധി രോഗങ്ങള്‍ മാറും. അതുകൊണ്ട് ഇങ്ങനൊരു ദിനം ആഘോഷിക്കണമെന്ന് പറയുന്നത്.

വാലന്റൈന്‍സ് ഡേ ഇന്ത്യയില്‍ ആഘോഷിക്കരുതെന്നാണ് എനിക്ക് പറയാനുള്ളത്. സമൂഹത്തില്‍ മോശം പ്രവണത കൊണ്ടുവരുന്നതാണ് ഈ ദിനം. അതിനെ അകറ്റി നിര്‍ത്തേണ്ടതുണ്ടെന്നും ധരംപാല്‍ സിംഗ് പറഞ്ഞു.