ടിവികെ ബിജെപിയുടെ ബി ടീമോ? ഡിഎംകെയെ ജയിപ്പിക്കാൻ ഇറങ്ങുന്ന രക്ഷകരോ? നിർണായകം വിജയ്‌യുടെ നീക്കങ്ങൾ

Published: Sunday, February 15, 2026, 14:22 [IST]

ചെന്നൈ: തമിഴക രാഷ്ട്രീയത്തിൽ തരംഗമായി മാറുകയാണ് നടൻ വിജയ് സ്ഥാപിച്ച തമിഴക വെട്രി കഴകം. വരുന്ന നിയമസഭാ തിരഞ്ഞെടുപ്പിലേക്ക് കടക്കുമ്പോൾ ഒരു പ്രധാന ചർച്ച ഉയർന്നിരിക്കുകയാണ് എന്നതാണ് ഇപ്പോഴത്തെ കാര്യം. കേന്ദ്രം ഭരിക്കുന്ന ബിജെപിയെക്കാൾ നിശിതമായി വിജയ് ഡിഎംകെ സർക്കാരിനെയാണ് വിമർശിക്കുന്നത് എന്ന നിരീക്ഷണമാണ് ഇതിന് ആധാരം.

ഡിഎംകെയ്ക്ക് എതിരായ വോട്ടുകൾ ഭിന്നിപ്പിച്ച് വിജയം എളുപ്പമാക്കുകയാണോ, അതോ ഇത് ബിജെപിക്ക് ഒരു ഒളിഞ്ഞ സഹായമാണോ എന്ന ചോദ്യമാണ് രാഷ്ട്രീയ നിരീക്ഷകർ ഉന്നയിക്കുന്നത്. അതിന് പ്രധാന കാരണമാവട്ടെ വിജയ്‌യുടെ നിലപാടുകളുമാണ്. കാരണം സിനിമ നിർത്തി രാഷ്ട്രീയത്തിൽ ഇറങ്ങുന്ന വിജയ് പുലർത്തുന്ന നിലപാടുകൾ ആർക്കും പിടികൊടുക്കാത്തതാണ്.

തന്റെ ആദ്യ സമ്മേളനത്തിൽ വിജയ് ഡിഎംകെയെ രാഷ്ട്രീയ ശത്രു" എന്നും ബിജെപിയെ "സൈദ്ധാന്തിക ശത്രു എന്നും വേർതിരിച്ചിരുന്നു. എന്നാൽ പ്രായോഗികമായി അദ്ദേഹത്തിന്റെ എല്ലാ പ്രവർത്തനങ്ങളും വിമർശനങ്ങളും സംസ്ഥാനം ഭരിക്കുന്ന ഡിഎംകെയെ കേന്ദ്രീകരിച്ചാണ് എന്ന് നോക്കിയാൽ വ്യക്തമായി തന്നെ കാണാവുന്നതാണ്.

അഴിമതി, കുടുംബവാഴ്‌ച, ഭരണത്തിലെ വീഴ്‌ചകൾ തുടങ്ങിയ ആരോപണങ്ങളുന്നയിച്ച് ഡിഎംകെയെ കടന്നാക്രമിക്കുമ്പോൾ, ഭരണകക്ഷിയോട് അതൃപ്‌തിയുള്ള ജനങ്ങളുടെ വോട്ടുകൾ നേടാനാണ് അദ്ദേഹം ശ്രമിക്കുന്നതെന്ന് വ്യക്തമാണ്. മാത്രമല്ല ബിജെപിയെക്കുറിച്ച് ചോദിക്കുമ്പോൾ, അവർ ഇവിടെ കളത്തിൽ ഇല്ലെന്ന് പറഞ്ഞ് വിജയ് ഒഴിഞ്ഞുമാറുകയാണ് പതിവ്.

വിജയ് ഡിഎംകെയെ സഹായിക്കുകയാണോ?

സാധാരണയായി, ഒരു ഭരണകക്ഷിക്ക് എതിരായ വോട്ടുകൾ പ്രധാന പ്രതിപക്ഷ പാർട്ടിയായ എഐഎഡിഎംകെയ്‌ക്കോ മറ്റ് ബദൽ പാർട്ടികൾക്കോ ആണ് ലഭിക്കാറുള്ളതെന്നാണ് തമിഴ്‌നാട്ടിലെ ശീലം. വിജയ് കളത്തിലിറങ്ങുന്നത് ഈ വോട്ടുകൾ ഭിന്നിപ്പിക്കുകയും അത് ആത്യന്തികമായി ഡിഎംകെയുടെ വിജയസാധ്യത എളുപ്പമാക്കുകയും ചെയ്യുമെന്നാണ് ഒരു വിഭാഗത്തിന്റെ വാദം.

ബിജെപിയെ "ഫാസിസം" എന്ന് പേരിന് മാത്രം വിശേഷിപ്പിക്കുന്നുണ്ടെങ്കിലും, കേന്ദ്ര സർക്കാരിന്റെ നയങ്ങളെയോ സംസ്ഥാന ബിജെപി നേതൃത്വത്തെയോ വിജയ് കാര്യമായി വിമർശിക്കുന്നില്ലെന്ന ആക്ഷേപവും ഉയരുന്നുണ്ട്. ബജറ്റ് ഉൾപ്പെടെ ഒരു കാര്യവും അദ്ദേഹം വിലയിരുത്തിയിട്ടില്ലെന്ന് മാത്രമല്ല അഭിപ്രായവും പറഞ്ഞിട്ടില്ല.

ടിവികെ ബിജെപിയുടെ ബി ടീമോ?

ഡിഎംകെയെ എതിർക്കുന്ന സമയത്ത് ബിജെപിയോട് അദ്ദേഹത്തിനുള്ള മൃദുവായ നിലപാട് ബിജെപിയുടെ ബി-ടീം എന്ന വിളിപ്പേരിലേക്ക് അദ്ദേഹത്തെയും പാർട്ടിയെയും കൊണ്ട് ചെന്ന് എത്തിച്ചിട്ടുണ്ട്. സാധാരണയായി, ബിജെപി വിരുദ്ധ വോട്ടുകൾ ഡിഎംകെ സഖ്യത്തിന് വലിയ പിന്തുണയാണ് നൽകുന്നത്. വിജയ് ബിജെപിയെ ശക്തമായി എതിർക്കാത്തതിലൂടെ ഈ വോട്ടുകളിൽ മാറ്റമൊന്നും സംഭവിക്കുന്നില്ല.

എന്നാൽ, അദ്ദേഹത്തിന്റെ ഡിഎംകെ വിരുദ്ധ വോട്ടുകൾ ഭിന്നിപ്പിക്കുന്നത് ഒരു ബഹുകോണ മത്സരം ഡിഎംകെയുടെ വിജയത്തിലേക്ക് നയിച്ചേക്കാം. വിജയുടെ വരവ് യുവജനങ്ങളെയും നിഷ്‌പക്ഷരായ വോട്ടർമാരെയും ആകർഷിക്കുമെന്നാണ് പ്രതീക്ഷിക്കുന്നത്. ഇവർ സാധാരണയായി ഡിഎംകെയ്ക്കും എഐഎഡിഎംകെയ്ക്കും ഒരു ബദലിനെ തേടുന്നവരാണ്.

വിജയ് നേടുന്ന ഓരോ വോട്ടും ഡിഎംകെയ്ക്ക് എതിരായ വോട്ടാണെങ്കിൽ, അത് എഐഎഡിഎംകെയുടെ വിജയം തടയും. പ്രതിപക്ഷ പാർട്ടികൾ ഭിന്നിച്ചു നിൽക്കുന്നത് എപ്പോഴും ഭരണകക്ഷിക്ക് ഗുണകരമാകും.
വിജയ് ഒരു ബദൽ ശക്തിയായി സ്വയം ഉയർത്തിക്കാട്ടാൻ ശ്രമിക്കുന്നുണ്ടെങ്കിലും, അദ്ദേഹത്തിന്റെ ഇപ്പോഴത്തെ തന്ത്രം ഡിഎംകെയെ മാത്രം ലക്ഷ്യം വെക്കുന്നതായി തോന്നുന്നുവെന്ന് പറഞ്ഞാൽ ഒരിക്കലും തെറ്റാവില്ല.

ഇത് ബിജെപി വിരുദ്ധ വോട്ടുകളെ ബാധിക്കാതെ, ഡിഎംകെയ്ക്ക് എതിരായ വോട്ടുകളെ മാത്രം ഭിന്നിപ്പിക്കുന്ന ഒരു തന്ത്രപരമായ നീക്കമായി കാണപ്പെടുന്നു. 2026-ൽ ഈ വോട്ട് ഭിന്നിക്കൽ ആർക്ക് ഗുണകരമാകുമെന്ന് കണ്ടറിയേണ്ടിയിരിക്കുന്നു. പ്രത്യേകിച്ച് ഇത്തവണ തമിഴ്‌നാട്ടിൽ സാധാരണയിൽ നിന്ന് വേറിട്ട രാഷ്ട്രീയ പരിതസ്ഥിതി നിലവിലുള്ള സാഹചര്യത്തിൽ.

Published On February 15, 2026