കർണാടക ബന്ദ് ഓഗസ്‌റ്റ് 13ന്; ബെംഗളൂരു നഗരത്തെയും ബാധിക്കും, മെട്രോ, ബിഎംടിസി സർവീസ് മുടങ്ങുമോ?

ബെംഗളൂരു: കർണാടക-തമിഴ്‌നാട് അതിർത്തിയായ അത്തിബെലെയിൽ കന്നഡ അനുകൂല പ്രവർത്തകൻ വാട്ടാൾ നാഗരാജിന്റെ നേതൃത്വത്തിൽ ഇന്ന് ശക്തമായ പ്രതിഷേധം നടക്കുകയാണ്. കർണാടകയ്ക്കും തമിഴ്‌നാടിനുമിടയിലുള്ള വാഹന ഗതാഗതം തടയാനാണ് പ്രതിഷേധക്കാരുടെ നീക്കം. ഓഗസ്‌റ്റ് 13ന് സംസ്ഥാന വ്യാപകമായി കർണാടക ബന്ദിന് ആഹ്വാനം ചെയ്‌തതിന് മുന്നോടിയായാണ് ഇന്നത്തെ പ്രതിഷേധം സംഘടിപ്പിച്ചിരിക്കുന്നത്.

തമിഴ്‌നാട്ടിൽ നിന്നുള്ള വാഹനങ്ങളെ കർണാടകയിലേക്ക് പ്രവേശിക്കാൻ അനുവദിക്കില്ലെന്നും കർണാടകയിൽ നിന്നുള്ള വാഹനങ്ങളെ തമിഴ്‌നാട്ടിലേക്കും കടത്തിവിടില്ലെന്നും വാട്ടാൾ നാഗരാജ് പറഞ്ഞതായി റിപ്പോർട്ടുകളുണ്ട്. ഓഗസ്‌റ്റ് 13ന് നടക്കാനിരിക്കുന്ന കർണാടക ബന്ദിന് മുമ്പ് ശക്തമായ സന്ദേശം നൽകുകയാണ് പ്രതിഷേധത്തിന്റെ ലക്ഷ്യമെന്നും അദ്ദേഹം വ്യക്തമാക്കി.

അതേസമയം, കാവേരി നദിയിലെ ജലവുമായി ബന്ധപ്പെട്ട വിവിധ വിഷയങ്ങളാണ് ഓഗസ്‌റ്റ് 13ന് നടത്തുന്ന കർണാടക ബന്ദിന്റെ പ്രധാന കാരണം. കർണാടകയും തമിഴ്‌നാടും തമ്മിലുള്ള ജല തർക്കങ്ങൾക്കൊപ്പം മഹാദായി നദിയിലെ ജലവിഹിതവുമായി ബന്ധപ്പെട്ട പ്രശ്‌നങ്ങളും പ്രതിഷേധത്തിന് കാരണമായിട്ടുണ്ട് എന്നാണ് റിപ്പോർട്ടുകൾ.

തമിഴ്‌നാടിന് കാവേരി ജലം വിട്ടുനൽകുന്നതും പ്രതിഷേധത്തിന്റെ മറ്റൊരു പ്രധാന കാരണമാണ്. മഴ കുറവായതിനാൽ കർണാടകയിൽ തന്നെ ജലക്ഷാമം നേരിടുന്നുണ്ടെന്നും കർഷകർക്കും കുടിവെള്ള ആവശ്യങ്ങൾക്കും ആവശ്യമായ വെള്ളം ആദ്യം സംസ്ഥാനത്ത് തന്നെ നിലനിർത്തണമെന്നുമാണ് ചില കർഷക സംഘടനകളും കന്നഡ അനുകൂല സംഘടനകളും ആവശ്യപ്പെടുന്നത്.

വാട്ടാൾ നാഗരാജിന്റെ പ്രഖ്യാപനപ്രകാരം ഓഗസ്‌റ്റ് 13ന് രാവിലെ ആറുമുതൽ വൈകിട്ട് ആറുവരെയാണ് സംസ്ഥാന വ്യാപക ബന്ദ് നടത്തുക. രണ്ടായിരത്തിലധികം കന്നഡ അനുകൂല സംഘടനകൾ ഇതിനകം പിന്തുണ അറിയിച്ചിട്ടുണ്ടെന്നും ബന്ദിന് മുമ്പ് പിന്തുണയ്ക്കുന്ന സംഘടനകളുടെ എണ്ണം മൂവായിരം കവിയുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു.

ബന്ദ് പിൻവലിക്കണമെന്ന് മുഖ്യമന്ത്രി ഡികെ ശിവകുമാർ ആവശ്യപ്പെട്ടിരുന്നുവെന്നും എന്നാൽ ആവശ്യം അംഗീകരിച്ചിട്ടില്ലെന്നും നാഗരാജ് പറഞ്ഞു. പ്രഖ്യാപിച്ച സമയക്രമം അനുസരിച്ച് തന്നെ പ്രതിഷേധം നടക്കുമെന്നും ഒരു കാരണവശാലും ബന്ദ് പിൻവലിക്കില്ലെന്നും അദ്ദേഹം വ്യക്തമാക്കി. ഈ സാഹചര്യത്തിൽ കർണാടക ബന്ദ് ബെംഗളൂരു നഗരത്തെയും സാരമായി ബാധിക്കും.

ഓഗസ്‌റ്റ് 13 കർണാടക ബന്ദ്; കൂടുതലറിയാം

ബന്ദ് പ്രഖ്യാപനം നടപ്പായാൽ സംസ്ഥാനത്തിന്റെ വിവിധ ഭാഗങ്ങളിൽ സാധാരണ ജനജീവിതത്തെ ബാധിക്കുന്ന തരത്തിലുള്ള തടസങ്ങൾ ഉണ്ടായേക്കാമെന്നാണ് വിലയിരുത്തൽ. നിലവിലെ സാഹചര്യത്തിൽ കടകളും മറ്റ് വ്യാപാര സ്ഥാപനങ്ങളും അടഞ്ഞുകിടക്കാൻ സാധ്യതയുണ്ട്. ബന്ദ് നടക്കുന്ന വിഷയത്തിലെ ഗൗരവവും ഇതിന്റെ പ്രാധാന്യം വർധിപ്പിക്കുന്നു.

കർണാടക റോഡ് ഗതാഗത കോർപ്പറേഷന്റെയും ബെംഗളൂരു മഹാനഗര ഗതാഗത കോർപ്പറേഷന്റെയും ബസ് സർവീസുകളെയും ബന്ദ് ബാധിച്ചേക്കാമെന്നാണ് വിവരം. കൂടാതെ ഓട്ടോറിക്ഷ, ടാക്‌സി, മൊബൈൽ ആപ്ലിക്കേഷൻ വഴി ലഭിക്കുന്ന വാഹന സേവനങ്ങൾ എന്നിവയും പൂർണമായോ ഭാഗികമായോ തടസപ്പെടാൻ സാധ്യതയുണ്ട്.

അതേസമയം, ആശുപത്രികൾ, മരുന്നുകടകൾ, ആംബുലൻസ് സേവനങ്ങൾ, പാൽ വിതരണം, പഴം-പച്ചക്കറി വിതരണം തുടങ്ങിയ അവശ്യ സേവനങ്ങൾ സാധാരണ നിലയിൽ തുടരാനാണ് സാധ്യത. ഇവയെ ബന്ദിൽ നിന്ന് ഒഴിവാക്കുമെന്നാണ് സൂചന. സ്‌കൂളുകളും കോളേജുകളും അടഞ്ഞു കിടക്കാനാണ് സാധ്യത. മെട്രോ അടക്കമുള്ള സംവിധാനങ്ങൾ സാധാരണ നിലയിൽ പ്രവർത്തിക്കുമെങ്കിലും യാത്രക്കാരുടെ എണ്ണം കുറവായിരിക്കും.

കർണാടക ഫിലിം ചേംബർ ഓഫ് കൊമേഴ്‌സ് പ്രസിഡന്റ് ജയമാല മാധ്യമങ്ങളോട് സംസാരിക്കവെ കന്നഡ സിനിമാ മേഖല ബന്ദിന് പിന്തുണ നൽകുമെന്ന് അറിയിച്ചു. സിനിമാ മേഖലയുമായി ബന്ധപ്പെട്ട സ്ഥാപനങ്ങളും പ്രവർത്തകരും ബന്ദിൽ സഹകരിക്കുമെന്ന് അവർ വ്യക്തമാക്കി. കർണാടകയിലെ ഇംഗ്ലീഷ് മീഡിയം സ്‌കൂളുകളുടെ മാനേജ്മെന്റുകളുടെ സംഘടനയുടെ ജനറൽ സെക്രട്ടറി ശശികുമാർ, സംഘടനയിൽ അംഗങ്ങളായ സ്‌കൂളുകൾ ബന്ദ് ദിവസം അടച്ചിടുമെന്ന് അറിയിച്ചു.

കർണാടകയിലെ അംഗീകൃത സഹായമില്ലാത്ത സ്വകാര്യ സ്‌കൂൾ മാനേജ്മെന്റുകളുടെ സംഘടനയുടെ പ്രസിഡന്റ് എസ് സത്യ മൂർത്തിയും സംഘടനയ്ക്ക് കീഴിലുള്ള എല്ലാ സ്‌കൂളുകളും ബന്ദിന്റെ ഭാഗമായി അടച്ചിടുമെന്ന് വ്യക്തമാക്കി. ആദർശ ഓട്ടോ ആൻഡ് ടാക്‌സി ഡ്രൈവേഴ്‌സ് യൂണിയനും മറ്റ് ഓട്ടോറിക്ഷാ തൊഴിലാളി സംഘടനകളും ബന്ദിന് പിന്തുണ പ്രഖ്യാപിച്ചിട്ടുണ്ട്.

ബന്ദിന്റെ പ്രധാന കാരണങ്ങൾ

മേക്കേദാട്ടു പദ്ധതി: കാവേരി നദിയിൽ അണക്കെട്ടും ജലസംഭരണിയും നിർമ്മിക്കാനാണ് കർണാടക സർക്കാർ മേക്കേദാട്ടു പദ്ധതിയിലൂടെ ലക്ഷ്യമിടുന്നത്. എന്നാൽ ഈ പദ്ധതിയെ തമിഴ്‌നാട് ശക്തമായി എതിർക്കുന്നു. പദ്ധതി നടപ്പാക്കിയാൽ കാവേരി നദിയിലൂടെ തമിഴ്‌നാട്ടിലേക്ക് ഒഴുകുന്ന ജലത്തിന്റെ അളവ് കുറയാൻ സാധ്യതയുണ്ടെന്നാണ് തമിഴ്‌നാടിന്റെ വാദം.

മഹാദായി ജല തർക്കം: സമാനമായി മഹാദായി നദിയിലെ ജലം പങ്കിടുന്നതുമായി ബന്ധപ്പെട്ട് കർണാടകയും ഗോവയും ഏറെക്കാലമായി തർക്കത്തിലാണ്. നദിയിലെ ജലം കർണാടകയ്ക്ക് ആവശ്യമായ രീതിയിൽ ഉപയോഗിക്കുന്നതുമായി ബന്ധപ്പെട്ടാണ് പ്രധാന തർക്കം.

കലശ-ബണ്ഡൂരി പദ്ധതി: മഹാദായി നദിയിലെ ജലം മലപ്രഭ നദീതടത്തിലേക്ക് തിരിച്ചുവിടുന്നതിനുള്ള പദ്ധതിയാണ് കലശ-ബണ്ഡൂരി പദ്ധതി. എന്നാൽ വിവിധ തർക്കങ്ങളും നിയമനടപടികളും കാരണം പദ്ധതിയുടെ പ്രവർത്തനങ്ങൾ വൈകുകയാണ്. മേൽ പറഞ്ഞ കാരണങ്ങൾ തന്നെയാണ് ഇപ്പോഴത്തെ ബന്ദിലേക്കും നയിച്ചിരിക്കുന്നത്.