മുൻ ഡൽഹി പിസിസി അധ്യക്ഷൻ അരവിന്ദർ സിംഗ് ലവ്‌ലി ബിജെപിയിൽ ചേർന്നു; വെട്ടിലായി കോൺഗ്രസ്‌

Updated: Saturday, May 4, 2024, 18:19 [IST]

ന്യൂഡൽഹി: രാജ്യതലസ്ഥാനത്തെ കോൺഗ്രസിനെ വെട്ടിലാക്കി പാർട്ടി വിട്ട മുൻ പിസിസി അധ്യക്ഷൻ അരവിന്ദർ സിംഗ് ലവ്ലി ബിജെപിയിൽ ചേർന്നു. കേന്ദ്രമന്ത്രി ഹർദീപ് സിംഗ് പുരി, പാർട്ടി ദേശീയ ജനറൽ സെക്രട്ടറി വിനോദ് താവ്‌ഡെ എന്നിവരുടെ സാന്നിധ്യത്തിലാണ് അദ്ദേഹം ബിജെപിയിൽ ചേർന്നത്. ഡൽഹി സർക്കാരിലെ ക്യാബിനറ്റ് മന്ത്രിയായിരുന്ന രാജ് കുമാർ ചൗഹാൻ ഉൾപ്പെടെ ചില കോൺഗ്രസ് നേതാക്കളും ഇന്ന് ബിജെപിയിൽ ചേർന്നു.

ഇതിന് പിന്നാലെ ഹർദീപ് സിംഗ് പുരി ലവ്ലിയെ അഭിനന്ദിച്ചു രംഗത്ത് വന്നു. 'നിങ്ങളുടെ സേവനങ്ങൾ പ്രയോജനപ്പെടുത്തുമെന്നും വളരെ ഫലപ്രദമായി ഉപയോഗിക്കുമെന്നും ഞാൻ നിങ്ങൾക്ക് ഉറപ്പ് നൽകാൻ ആഗ്രഹിക്കുന്നു. നിങ്ങളെപ്പോലുള്ളവരെയാണ് ഞങ്ങളുടെ പാർട്ടിക്ക് ആവശ്യം. നിങ്ങളെ സ്വാഗതം ചെയ്യാനും അഭിനന്ദിക്കാനും ഞാൻ ആഗ്രഹിക്കുന്നു' എന്നായിരുന്നു മന്ത്രിയുടെ പ്രശംസ.

'ഡൽഹി കോൺഗ്രസ് അധ്യക്ഷ സ്ഥാനത്തുനിന്നും ഞാൻ രാജിവെച്ചതിന് ശേഷം ഞാൻ എന്റെ എല്ലാ സഹപ്രവർത്തകരെയും ആയിരക്കണക്കിന് കോൺഗ്രസ് പ്രവർത്തകരെയും കാണുകയുണ്ടായി. നിങ്ങൾ വീട്ടിൽ ഇരിക്കരുതെന്നും ഡൽഹിയിലെ ജനങ്ങൾക്കും രാജ്യത്തിനും വേണ്ടി പോരാടണമെന്നും അവരെല്ലാം പറഞ്ഞു' ബിജെപിയിൽ ചേരാനുള്ള കാരണത്തെ കുറിച്ച് മാധ്യമങ്ങളോട് സംസാരിക്കവെ ലവ്‌ലി പറഞ്ഞു.

നേരത്തെ ഡൽഹിയിൽ ഉൾപ്പെടെ ലോക്‌സഭാ തിരഞ്ഞെടുപ്പിൽ എഎപിയുമായി സഖ്യത്തിൽ ഏർപ്പെടാനുള്ള കോൺഗ്രസ് തീരുമാനത്തിൽ പ്രതിഷേധിച്ചാണ് ലവ്ലി പാർട്ടി അധ്യക്ഷ സ്ഥാനം രാജിവച്ചത്. ഡൽഹിയിലെ കോൺഗ്രസ് പ്രവർത്തകരുടെ താൽപര്യങ്ങൾ സംരക്ഷിക്കാൻ കഴിയാത്തതിനാൽ തൽസ്ഥാനത്ത് തുടരാൻ അർഹത ഇല്ലെന്ന് ചൂണ്ടിക്കാട്ടിയായിരുന്നു അദ്ദേഹം രാജി പ്രഖ്യാപിച്ചത്.

തലസ്ഥാന നഗരി വോട്ടെടുപ്പിന് ഒരുങ്ങുന്നതിനിടെ ലവ്ലിയുടെ ചുവടുമാറ്റം കോൺഗ്രസിന് തിരിച്ചടിയാണ്. മെയ് 25നാണ് ഡൽഹിയിലെ ഏഴ് സീറ്റുകളിലേക്കും കൂടി ഒറ്റഘട്ടമായി വോട്ടെടുപ്പ് നടക്കുന്നത്. തിരഞ്ഞെടുപ്പിൽ എഎപിയുമായി സഖ്യം ചേരാനുള്ള കോൺഗ്രസിന്റെ തീരുമാനമാണ് ഡൽഹി പാർട്ടി ഘടകത്തിൽ ഭിന്നതയ്ക്ക് ഇടയാക്കിയത്.

അതേസമയം, കഴിഞ്ഞ വർഷമാണ് അനിൽ ചൗധരിയെ മാറ്റി കോൺഗ്രസ് ഡൽഹി ഘടകത്തിന്റെ തലവനായി അരവിന്ദർ സിംഗ് ലവ്‌ലിയെ നിയമിച്ചത്. നേരത്തെ 2017ലും അദ്ദേഹം ബിജെപിയിൽ ചേർന്നെങ്കിലും പിന്നീട് കോൺഗ്രസിൽ തിരിച്ചെത്തുകയായിരുന്നു. എന്നാൽ ഇപ്പോൾ വീണ്ടും ബിജെപിയിലേക്ക് തന്നെ മടങ്ങിയത് കോൺഗ്രസിന് വലിയ ക്ഷീണമുണ്ടാക്കും എന്നുറപ്പാണ്.