'ആർത്തവം ഒരു വൈകല്യമല്ല..'; ശമ്പളത്തോട് കൂടിയ ആർത്തവ അവധിയെ എതിർത്ത് കേന്ദ്രമന്ത്രി സ്‌മൃതി ഇറാനി

ന്യൂഡൽഹി: വനിതാ ജീവനക്കാർക്ക് നിർബന്ധിത ശമ്പളത്തോടെയുള്ള ആർത്തവ അവധി എന്ന ആശയത്തിനെതിരെ നിലപാട് വ്യക്തമാക്കി കേന്ദ്ര വനിതാ ശിശു വികസന മന്ത്രി സ്‌മൃതി ഇറാനി. രാജ്യസഭയിൽ എംപി മനോജ് കുമാർ ഝായുടെ ചോദ്യത്തിന് മറുപടിയായാണ് വിഷയത്തിൽ സ്‌മൃതി ഇറാനി തന്റെ നിലപാട് വ്യക്തമാക്കിയത്.

ആർത്തവം ജീവിതത്തിന്റെ സ്വാഭാവികമായ ഒരു ഭാഗം മാത്രമാണെന്നും പ്രത്യേക അവധി വ്യവസ്ഥകൾ ആവശ്യമുള്ള ഒരു വൈകല്യമായി കണക്കാക്കരുതെന്നും അവർ പറഞ്ഞു. "ആർത്തവമുള്ള സ്ത്രീയെന്ന നിലയിൽ, ആർത്തവവും ആർത്തവചക്രവും ഒരു വൈകല്യമല്ല, അത് സ്ത്രീകളുടെ ജീവിതയാത്രയുടെ സ്വാഭാവിക ഭാഗമാണ്" സ്‌മൃതി ഇറാനി തന്റെ നിലപാട് വ്യക്തമാക്കി.

ആർത്തവ അവധി തൊഴിൽ മേഖലയിൽ സ്ത്രീകളോടുള്ള വിവേചനത്തിന് കാരണമാകുമെന്ന മുന്നറിയിപ്പും അവർ നൽകി. "ആർത്തവമില്ലാത്ത ഒരാൾക്ക് ആർത്തവത്തെക്കുറിച്ച് പ്രത്യേക കാഴ്‌ചപ്പാട് ഉണ്ടെന്ന് കരുതി സ്ത്രീകൾക്ക് തുല്യ അവസരങ്ങൾ നിഷേധിക്കപ്പെടുന്ന കാര്യങ്ങൾ നമ്മൾ നിർദ്ദേശിക്കരുത്." അവർ കൂട്ടിച്ചേർത്തു.

അതേസമയം, ആർത്തവ ശുചിത്വത്തിന്റെ പ്രാധാന്യം അംഗീകരിച്ചുകൊണ്ട്, ആരോഗ്യ കുടുംബക്ഷേമ മന്ത്രാലയം കരട് ദേശീയ നയത്തിന് രൂപം നൽകിയതായി സ്‌മൃതി ഇറാനി പ്രഖ്യാപിച്ചു. രാജ്യത്തുടനീളമുള്ള ശരിയായ ആർത്തവ ശുചിത്വ പരിപാലന രീതികളിലേക്ക് നയിക്കുന്ന അവബോധം മെച്ചപ്പെടുത്താൻ ലക്ഷ്യമിടുന്ന നയമാണിത്.

അതേസമയം, ആർത്തവ അവധിയുമായി ബന്ധപ്പെട്ട ചർച്ചകൾ രാജ്യത്ത് തുടങ്ങിയിട്ട് വർഷങ്ങൾ ഏറെയായി. അടുത്തിടെ സ്‌പെയിനിൽ ഇതുമായി ബന്ധപ്പെട്ട ഒരു നിയമം പാസാക്കിയിരുന്നു. ആവർത്തവ കാലയളവിൽ ശമ്പളത്തോടുകൂടിയ അവധിക്ക് സാധുതയുള്ളതായാണ് സ്‌പെയിനിൽ പുതിയ നിയമം പാസാക്കിയത്, യൂറോപ്പിൽ ആദ്യമായാണ് ഇത്തരമൊരു നടപടി ഒരു രാജ്യം പ്രഖ്യാപിക്കുന്നത്.

എന്നാൽ ഇന്ത്യയിൽ ഇതുമായി ബന്ധപ്പെട്ട നിയമങ്ങളോ, നയങ്ങളോ തൽക്കാലം സർക്കാർ പരിഗണനയിൽ ഇല്ലെന്നാണ് റിപ്പോർട്ടുകൾ. ശമ്പളത്തോട് കൂടിയ ആർത്തവ അവധിയെ കുറിച്ചുള്ള കോൺഗ്രസ് എംപി ശശി തരൂരിന്റെ ചോദ്യത്തോട് കഴിഞ്ഞയാഴ്‌ച പാർലമെന്റിൽ സ്‌മൃതി ഇറാനി പ്രതികരിച്ചിരുന്നു. ഇത്തരമൊരു നിയമം കൊണ്ട് വരുന്നത് സർക്കാർ പരിഗണനയിൽ ഇല്ലെന്നായിരുന്നു കേന്ദ്ര മന്ത്രിയുടെ മറുപടി.

English summary

'Menstruation Is Not A Disability..'; Smriti Irani Opposes Paid Menstrual Leave