തിരഞ്ഞെടുപ്പിലെ സൂപ്പർസ്‌റ്റാർ ഡിഎംകെയുടെ പ്രകടന പത്രികയെന്ന് സ്‌റ്റാലിൻ; ഉന്നമിട്ടത് വിജയിയെ തന്നെയോ?

Published: Sunday, April 5, 2026, 13:50 [IST]

ചെന്നൈ: ഡിഎംകെയുടെ തിരഞ്ഞെടുപ്പ് പ്രകടനപത്രികയെ 2026 നിയമസഭാ തിരഞ്ഞെടുപ്പിലെ സൂപ്പർസ്‌റ്റാർ എന്ന് വിശേഷിപ്പിച്ച് തമിഴ്‌നാട് മുഖ്യമന്ത്രി എംകെ സ്‌റ്റാലിൻ. വാഗ്‌ദാനനങ്ങൾ ആർക്കും നൽകാമെന്നും എന്നാൽ പൊതുജനങ്ങൾക്ക് സ്വന്തം പാർട്ടിയുടെ ഉറപ്പുകളിൽ മാത്രമേ വിശ്വാസമുള്ളൂ എന്നും അദ്ദേഹം ഉറപ്പിച്ചു പറഞ്ഞു. നടനും സൂപ്പർതാരവുമായ വിജയ്‌യെ ആണോ സ്‌റ്റാലിൻ ഉദ്ദേശിച്ചത് എന്നാണ് പ്രധാനമായും ഉയരുന്ന ചോദ്യം. ഇക്കുറിയാണ് വിജയ്‌യുടെ ടിവികെ ആദ്യമായി സംസ്ഥാനത്ത് മത്സരിക്കാൻ ഇറങ്ങുന്നത്.

വിരുദുനഗറിൽ നടന്ന വലിയ പൊതുയോഗത്തിൽ, ഡിഎംകെ പ്രസിഡന്റ് കൂടെയായ സ്‌റ്റാലിൻ, എഐഎഡിഎംകെ ജനറൽ സെക്രട്ടറി എടപ്പാടി കെ പളനിസാമിക്കെതിരെ രൂക്ഷമായ വിമർശനം അഴിച്ചുവിട്ടു. അധിക്ഷേപത്തിലും നിലവാരം കുറഞ്ഞ സംസാരത്തിലുമാണ് പളനിസാമിയുടെ പ്രചാരണം മുഴുവൻ ഉള്ളതെന്ന് അദ്ദേഹം ആരോപിച്ചു. പളനിസാമിയെ 'നുണയൻ' എന്നും 'വഞ്ചനയുടെ പ്രതിരൂപം' എന്നും സ്‌റ്റാലിൻ വിശേഷിപ്പിച്ചു.

ഡിഎംകെ പ്രകടനപത്രികയിലെ പ്രധാന സൂപ്പർസ്‌റ്റാർ വാഗ്‌ദാനങ്ങൾ സ്‌റ്റാലിൻ എടുത്തുപറഞ്ഞു. പ്രതിമാസ 'മഹിളർ ഊരിമൈ തോഗൈ' 2000 രൂപയായി ഉയർത്തുന്നതും, വീട്ടമ്മമാർക്ക് ഗൃഹോപകരണങ്ങൾ വാങ്ങുന്നതിനായി 8,000 രൂപയുടെ കൂപ്പണുകൾ നൽകുന്ന 'ഇല്ലാതരാശി' പദ്ധതിയും ഇതിൽ ഉൾപ്പെടുന്നു. അതിനെ കുറിച്ച് സ്‌റ്റാലിൻ വിശദമായി സംസാരിച്ചു.

തന്റെ ദ്രാവിഡ മോഡൽ ഭരണത്തെ പ്രതിപക്ഷവുമായി താരതമ്യം ചെയ്‌തുകൊണ്ട്, ഡിഎംകെയുടെ ക്ഷേമപദ്ധതികളുടെ വിജയകരമായ നടപ്പാക്കൽ ഉൾക്കൊള്ളാൻ കഴിയാത്തതിനാലാണ് പളനിസാമിയുടെ നിലവിലെ സാഹചര്യമെന്നും സ്‌റ്റാലിൻ അവകാശപ്പെട്ടു. ഇതേ തിരഞ്ഞെടുപ്പ് റാലിയിൽ വെച്ച്, കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ, പ്രധാനമന്ത്രി മോദി, അമിത് ഷാ എന്നിവർക്ക് സ്‌റ്റാലിൻ ഒരു വെല്ലുവിളി ഉയർത്തി.

തമിഴ്‌നാട്ടിൽ തങ്ങൾ ത്രിഭാഷാ നയം നടപ്പാക്കുമെന്ന് തിരഞ്ഞെടുപ്പ് പ്രചാരണ വേളയിൽ പ്രഖ്യാപിക്കാൻ എൻഡിഎക്ക് ധൈര്യമുണ്ടോ എന്നായിരുന്നു അദ്ദേഹത്തിന്റെ ചോദ്യം. പത്തുവർഷത്തെ ഭരണകാലയളവിൽ തമിഴ്‌നാടിനെ എല്ലാ മേഖലകളിലും പിന്നോട്ട് തള്ളിയ എഐഎഡിഎംകെയും, രാജ്യത്തെ അഭൂതപൂർവമായ തകർച്ചയിലേക്ക് നയിക്കുന്ന ബിജെപിയും ചേർന്നുള്ള സഖ്യത്തിന് ഈ തിരഞ്ഞെടുപ്പിലും ജനങ്ങൾ കനത്ത തിരിച്ചടി നൽകണമെന്ന് അദ്ദേഹം ആവശ്യപ്പെട്ടു.

എൻഡിഎയുടെ 'ഇരട്ട എഞ്ചിൻ' ഒരു 'പരാജയപ്പെട്ട എഞ്ചിൻ' മാത്രമാണെന്നും, ജനങ്ങളോട് താൽപ്പര്യമില്ലാത്തതിനാൽ തമിഴ്‌നാട്ടിലേക്ക് കടക്കാൻ അനുവദിക്കരുതെന്നും സ്‌റ്റാലിൻ കൂട്ടിച്ചേർത്തു.
മുൻപ് രാജ്യത്ത് വലിയ പ്രകമ്പനം സൃഷ്‌ടിച്ച നോട്ട് നിരോധനം, കോവിഡ് മഹാമാരി കാലത്തെ ഓക്‌സിജൻ ക്ഷാമം തുടങ്ങിയ വിഷയങ്ങളും സ്‌റ്റാലിൻ പരാമർശിച്ചു. കേന്ദ്ര സർക്കാരിന്റെ തെറ്റായ നയങ്ങൾ ജനജീവിതത്തെ എങ്ങനെ ബാധിച്ചുവെന്ന് അദ്ദേഹം ചൂണ്ടിക്കാട്ടി.

പാചക വാതക സിലിണ്ടറുകൾക്കായി പ്രധാനമന്ത്രി ജനങ്ങളെ കാത്തിരിപ്പിക്കുകയാണെന്ന് സ്‌റ്റാലിൻ ആരോപിച്ചു. "മോദിജി, എൽപിജി എവിടെ? പ്രധാനമന്ത്രിക്ക് ഉത്തരമുണ്ടോ?" എന്ന് ജനങ്ങൾ ചോദിക്കുന്നതായി അദ്ദേഹം പറഞ്ഞു. രാജ്യത്ത് പെട്രോളിന്റെയും പാചക വാതക സിലിണ്ടറുകളുടെയും വില ഉയരുന്നതിനെക്കുറിച്ചും അദ്ദേഹം ആശങ്കകളയറിയിച്ചു.

Published On April 5, 2026