പ്രധാനമന്ത്രിയുടെ പ്രസംഗത്തിനിടെ രാജ്യസഭ ബഹിഷ്‌കരിച്ച് പ്രതിപക്ഷം; 'വികസിത ഭാരതത്തിലേക്ക് നീങ്ങുന്നു'

Updated: Thursday, February 5, 2026, 17:56 [IST]

ന്യൂഡൽഹി: കഴിഞ്ഞ ദിവസത്തെ വ്യാപക പ്രതിഷേധത്തിന് ഒടുവിൽ പ്രധാനമന്ത്രി നരേന്ദ്ര മോദി രാജ്യസഭയിൽ പ്രസംഗം തുടങ്ങിയതിന് പിന്നാലെ ഇറങ്ങിപ്പോയി പ്രതിപക്ഷം. പ്രധാനമന്ത്രി പ്രസംഗം തുടങ്ങിയ സമയം മുതൽ മുദ്രാവാക്യം വിളികളുമായി പ്രതിഷേധിക്കുകയായിരുന്നു പ്രതിപക്ഷ എംപിമാർ. പ്രതിപക്ഷ നേതാവ് രാഹുൽ ഗാന്ധിയെ സംസാരിക്കാൻ അനുവദിക്കൂ എന്നാവശ്യപ്പെട്ട് കൊണ്ടാണ് ഇവർ മുദ്രാവാക്യം വിളിച്ചത്.

അതിനിടെ, രാജ്യസഭയിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെയെ പ്രധാനമന്ത്രി മോദി പരിഹസിച്ചു. പ്രായം കണക്കിലെടുത്ത്, അദ്ദേഹത്തിന് ബുദ്ധിമുട്ടില്ലാതെ ഇരുന്നുകൊണ്ട് മുദ്രാവാക്യം വിളിക്കാമെന്ന് പ്രധാനമന്ത്രി പറഞ്ഞു. നിൽക്കാൻ നിരവധി യുവ അംഗങ്ങൾ സഭയിലുണ്ടെന്നും അദ്ദേഹം കൂട്ടിച്ചേർത്തു. ഇത് പ്രതിപക്ഷത്തിനിടയിൽ കടുത്ത പ്രതികരണങ്ങൾക്കിടയാക്കി.

രാജ്യസഭയിലെ പ്രസംഗത്തിൽ പ്രധാനമന്ത്രി നരേന്ദ്ര മോദി, വികസിത ഭാരതമെന്ന ലക്ഷ്യത്തിലേക്ക് ഇന്ത്യ അതിവേഗം നീങ്ങുകയാണെന്ന് പറഞ്ഞു. കഴിഞ്ഞ വർഷങ്ങൾ രാജ്യത്തിന് അതിവേഗ വികസന ഘട്ടമായിരുന്നു. സമൂഹത്തിലും ജീവിതത്തിലും വന്ന മാറ്റങ്ങൾ രാജ്യം ശരിയായ ദിശയിലാണെന്ന് സൂചിപ്പിക്കുന്നുവെന്നും അദ്ദേഹം കൂട്ടിച്ചേർത്തു.

സ്വാതന്ത്ര്യലബ്ധിയുടെ സമയത്ത് ലോകത്തിലെ തന്നെ ഏറ്റവും വലിയ ആറാമത്തെ സമ്പദ്‌വ്യവസ്ഥയായിരുന്ന ഇന്ത്യ, മുൻ സർക്കാരുകളുടെ നയങ്ങൾ കാരണം 2014ഓടെ പതിനൊന്നാം സ്ഥാനത്തേക്ക് പിന്തള്ളപ്പെട്ടെന്ന് മോദി ചൂണ്ടിക്കാട്ടി. 21-ാം നൂറ്റാണ്ടിന്റെ രണ്ടാം പാദം ഒരു വികസിത രാഷ്ട്രമെന്ന നിലയിൽ ഇന്ത്യയുടെ യാത്രയിൽ നിർണായകമാകുമെന്ന് പ്രധാനമന്ത്രി നരേന്ദ്ര മോദി എടുത്തു പറഞ്ഞു.

വളർച്ച ത്വരിതപ്പെടുത്താനും രാജ്യത്തിന്റെ സമഗ്ര വികസനം ശക്തിപ്പെടുത്താനുമുള്ള മികച്ച അവസരമാണ് വരും വർഷങ്ങളെന്നും അദ്ദേഹം രാജ്യസഭയിൽ പ്രസംഗത്തിനിടെ പറഞ്ഞു. ഗ്ലോബൽ സൗത്തിന്റെ മുൻനിര ശബ്‌ദമായി ഇന്ത്യ ഉയർന്നുവന്നെന്നും ഭാവിക്കായുള്ള വ്യാപാര ഉടമ്പടികൾ സജീവമായി പിന്തുടരുകയാണെന്നും പ്രധാനമന്ത്രി മോദി രാഷ്ട്രപതിയുടെ നന്ദി പ്രമേയത്തിനുള്ള മറുപടിയായി പറഞ്ഞു.

മുൻകാലങ്ങളിലെ തെറ്റുകൾ തിരുത്തുന്നതിനും മുൻകാല ഭരണകൂടങ്ങളുടെ കാലത്ത് ആഗോളതലത്തിൽ സൃഷ്‌ടിക്കപ്പെട്ട മോശം പ്രതിച്ഛായ ഇല്ലാതാക്കുന്നതിനുമാണ് സർക്കാരിന്റെ ഊർജ്ജത്തിന്റെ വലിയൊരു ഭാഗം ചെലവഴിക്കുന്നതെന്ന് പ്രധാനമന്ത്രി പറഞ്ഞു. ഭാവിക്ക് അനുയോജ്യമായ നയങ്ങളിൽ ഊന്നൽ നൽകുന്നത് ഇവ പരിഹരിക്കുന്നതിനാണെന്നും വ്യക്തമായ നയത്തിന്റെയും ദീർഘകാല തന്ത്രത്തിന്റെയും അടിസ്ഥാനത്തിലാണ് രാജ്യം ഇപ്പോൾ പ്രവർത്തിക്കുന്നതെന്നും അദ്ദേഹം കൂട്ടിച്ചേർത്തു.

ഇന്ത്യ നിരവധി രാജ്യങ്ങളുമായി ഭാവിക്ക് അനുയോജ്യമായ വ്യാപാര കരാറുകളിൽ ഏർപ്പെടുന്നു, കൂടാതെ ലോകത്തിലെ ഏറ്റവും വികസിത സമ്പദ്‌വ്യവസ്ഥകളിൽ ചിലതുമായി അടുത്തിടെ പ്രധാന കരാറുകളിൽ ഒപ്പുവച്ചുവെന്നും പ്രധാനമന്ത്രി ചൂണ്ടിക്കാട്ടി. 27 രാജ്യങ്ങൾ ഉൾപ്പെടുന്ന യൂറോപ്യൻ യൂണിയനുമായുള്ള വ്യാപാര കരാറിനെ ഒരു സുപ്രധാന നാഴികക്കല്ലായ നേട്ടമായി അദ്ദേഹം വിശേഷിപ്പിച്ചു.

വോട്ട് ബാങ്ക് രാഷ്ട്രീയത്തിൽ മുഴുകുന്നവർ ഒരിക്കലും ഭരണത്തിന്റെ നിർണായക വശങ്ങൾ ശക്തിപ്പെടുത്തില്ലെന്ന് രാജ്യസഭയിൽ സംസാരിക്കവെ പ്രധാനമന്ത്രി നരേന്ദ്ര മോദി പറഞ്ഞു. കോൺഗ്രസ് പാർട്ടിയെ വിമർശിച്ച അദ്ദേഹം, അവർക്ക് വ്യക്തമായ കാഴ്‌ചപ്പാടില്ലെന്നും അതിന്റെ ഫലമായി രാജ്യം വർഷങ്ങളോളം കഷ്‌ടപ്പെടേണ്ടി വന്നെന്നും കൂട്ടിച്ചേർത്തു.