നന്നായി ഭരിക്കുക, അല്ലെങ്കില് 'തല' കാണില്ല; പഞ്ചാബിലെ എംഎല്എമാരോട് കെജ്രിവാള്
ന്യൂദല്ഹി: ജനഹിതം അനുസരിച്ച് പ്രവര്ത്തിക്കണമെന്ന് പഞ്ചാബിലെ ആം ആദ്മി സര്ക്കാരിനും എം എല് എമാര്ക്കും പാര്ട്ടി ദേശീയ കണ്വീനര് അരവിന്ദ് കെജ്രിവാളിന്റെ നിര്ദേശം. ഞായറാഴ്ച പഞ്ചാബിലെ ആം ആദ്മി പാര്ട്ടി മന്ത്രിമാരോടും എം എല് എമാരോടുമായി സംസാരിക്കുകയായിരുന്നു അദ്ദേഹം. ഒന്നുകില് നന്നായി പ്രവര്ത്തിക്കണമെന്നും അഴിമതിയില് ഏര്പ്പെട്ടാല് തല ഉരുളുമെന്നും അദ്ദേഹം മുന്നറിയിപ്പ് നല്കി.
നിയമസഭാ തെരഞ്ഞെടുപ്പില് 117ല് 92 സീറ്റും നേടിയാണ് ആം ആദ്മി പാര്ട്ടി ഉജ്ജ്വല വിജയം സ്വന്തമാക്കിയത്. ഈ ആഴ്ച ആദ്യം, പാര്ട്ടി നേതാവ് ഭഗവന്ത് മാന് പഞ്ചാബ് മുഖ്യമന്ത്രിയായി സത്യപ്രതിജ്ഞ ചെയ്യുകയും പിന്നീട് 10 എം എല് എമാരെ ശനിയാഴ്ച മന്ത്രിസഭയില് മന്ത്രിമാരായി ഉള്പ്പെടുത്തുകയും ചെയ്തിരുന്നു. എല്ലാവര്ക്കും ചുമതലകള് നല്കുമെന്നും അവര് രാപ്പകലില്ലാതെ പ്രവര്ത്തിക്കണമെന്നും കെജ്രിവാള് നേതാക്കളെ ഓര്മ്മിപ്പിച്ചു.
ലക്ഷ്യങ്ങള് കൈവരിക്കുന്നതില് പരാജയപ്പെടുന്നത് അവരുടെ ഉത്തരവാദിത്തങ്ങള് നഷ്ടപ്പെടാന് ഇടയാക്കുമെന്നും അദ്ദേഹം കൂട്ടിച്ചേര്ത്തു. ഇന്നലെ സത്യപ്രതിജ്ഞ ചെയ്ത മന്ത്രിമാരെ ഞാന് അഭിനന്ദിക്കില്ല. പകരം, ഞാന് അവര്ക്ക് ആശംസകള് നല്കും. ജനങ്ങളുടെ പ്രതീക്ഷകള് നിറവേറ്റാന് ഞാന് ദൈവത്തോട് പ്രാര്ത്ഥിക്കുന്നു. ഭഗവന്ത് മാന് നിങ്ങള്ക്ക് ലക്ഷ്യങ്ങള് നല്കും. ഒരു ദിവസം 24 മണിക്കൂര് മതിയാകില്ല. ദിവസവും 30 മണിക്കൂര് ജോലി ചെയ്യേണ്ടി വരും. ലക്ഷ്യം കണ്ടില്ലെങ്കില് മന്ത്രിയെ മാറ്റുമെന്ന് ജനങ്ങള് പറയും. അപ്പോള് നിങ്ങള്ക്ക് വിഷമം തോന്നും, പക്ഷേ നിങ്ങളെ മാറ്റി സ്ഥാപിക്കുകയല്ലാതെ ഞങ്ങള്ക്ക് മറ്റൊരു മാര്ഗവുമില്ല, കെജ്രിവാള് മുന്നറിയിപ്പ് നല്കി.
എം എല് എമാരോടുള്ള തന്റെ ആദ്യ പ്രസംഗത്തില്, ചണ്ഡീഗഢില് ഇരിക്കരുതെന്ന് ഭാഗവന്ത് മാന് സാഹിബ് നിങ്ങളോട് ആവശ്യപ്പെട്ടിരുന്നു. ഓരോ എം എല് എയും ഓരോ മന്ത്രിയും 24 മണിക്കൂറും ഏഴ് ദിവസവും ജനങ്ങള്ക്കിടയില് ഉണ്ടാകും. ആളുകളെ കാണും, ഓരോ വീട്ടിലും പോയി ആളുകളെ ശ്രദ്ധിക്കും, അദ്ദേഹം കൂട്ടിച്ചേര്ത്തു. മന്ത്രിമാരാകാന് കഴിയാത്ത ചില എം എല് എമാര് അസ്വസ്ഥരാണെന്നാണ് എന്നോട് പറയുന്നത്. ഞങ്ങള്ക്ക് 92 സീറ്റുകള് ലഭിച്ചു. 17 പേര് മാത്രമേ മന്ത്രിമാരാകൂ. മന്ത്രിയാകാന് കഴിയാത്ത എം എല് എമാര്ക്ക് കഴിവ് കുറവാണെന്നല്ല. പഞ്ചാബിലെ ജനങ്ങള് വജ്രങ്ങള് തിരഞ്ഞെടുത്തു. നിങ്ങളെല്ലാവരും വജ്രങ്ങളാണ്. നിങ്ങള് എല്ലാവരും കഴിവുള്ളവരാണ്, പക്ഷേ ഞങ്ങള് 92 പേരും ഒരു ടീമായി കഠിനാധ്വാനം ചെയ്യണം.
Recommended Video
നമ്മള് ഒരു ടീമായി പ്രവര്ത്തിക്കാതെ, ആഗ്രഹങ്ങളും അത്യാഗ്രഹവും മുന്നില് നിര്ത്തിയാല്, പഞ്ചാബ് തോല്ക്കും. നാമെല്ലാവരും ഒരു ടീമായി പ്രവര്ത്തിക്കേണ്ടത് പഞ്ചാബിന് പ്രധാനമാണ്, കെജ്രിവാള് പറഞ്ഞു. വിളനാശത്തിന് നഷ്ടപരിഹാരം നല്കാന് ഉത്തരവിട്ടതിനും അഴിമതി വിരുദ്ധ ഹെല്പ്പ് ലൈന് രൂപീകരിച്ചതിനും യുവാക്കള്ക്ക് 25,000 തൊഴിലവസരങ്ങള് പ്രഖ്യാപിച്ചതിനും ഭാഗവന്ത് മാനിനെ കെജ്രിവാള് അഭിനന്ദിച്ചു. ഇത് ശ്രദ്ധേയമായ പ്രഖ്യാപനങ്ങളാണ്. ജനങ്ങളുടെ പ്രതീക്ഷ ഇപ്പോള് ആത്മവിശ്വാസമായി മാറുകയാണ്. പഞ്ചാബിലെ ജനങ്ങളെ സഹായിക്കാന് ദൈവം നിങ്ങളെ ശക്തി നല്കി അനുഗ്രഹിക്കട്ടെ,' അദ്ദേഹം പറഞ്ഞു. ഞാന് നിങ്ങളുടെ ജ്യേഷ്ഠനെപ്പോലെയാണ്.
ഞാന് എപ്പോഴും അവിടെയുണ്ട്. എന്നാല് നിങ്ങള് ഭഗവന്ത് മാന്റെ ടീമായി പ്രവര്ത്തിക്കണമെന്നും കെജ്രിവാള് പറഞ്ഞു. ജയിച്ചത് നിങ്ങളാണെന്ന് കരുതരുതെന്നും ജനങ്ങളാണ് നമ്മുടെ എതിരാളികളെ തോല്പിച്ചതെന്നും അദ്ദേഹം പറഞ്ഞു. ആളുകള്ക്ക് മറ്റുള്ളവരെ പരാജയപ്പെടുത്താന് കഴിയുമെങ്കില്, അവര്ക്ക് നിങ്ങളെയും പരാജയപ്പെടുത്താന് കഴിയും. നിങ്ങളുടെ പ്രദേശത്ത് ഒരു എം എല് എ എന്ന നിലയില് നിങ്ങള് കഠിനാധ്വാനം ചെയ്യണം. ഒരു നിശ്ചിത തസ്തികയില് തങ്ങള്ക്ക് അവകാശമുണ്ടെന്ന് ചിലര് പറയുന്നു. ആര്ക്കും അവകാശമില്ലെന്ന് ഓര്ക്കുക. ഇത് ജനാധിപത്യമാണെന്ന് ഓര്ക്കുക, കെജ്രിവാള് കൂട്ടിച്ചേര്ത്തു.
Click it and Unblock the Notifications
Sign in with Google