കോൺഗ്രസിന് പിന്തുണ നൽകാൻ ടിവികെ ഒരുക്കമാണെന്ന് എസ്എ ചന്ദ്രശേഖർ; പുതിയ സഖ്യ സാധ്യതയോ?

ചെന്നൈ: തമിഴക വെട്രി കഴകം നേതാവും നടനുമായ വിജയിയുടെ പിതാവ് എസ്എ ചന്ദ്രശേഖർ തമിഴ്‌നാട് രാഷ്ട്രീയത്തിലെ ഒരു സുപ്രധാന നീക്കത്തിന്റെ സൂചന നൽകിയിരിക്കുകയാണ് ഇപ്പോൾ. വരാനിരിക്കുന്ന നിയമസഭാ തിരഞ്ഞെടുപ്പിൽ കോൺഗ്രസിന് പിന്തുണ നൽകാൻ ടിവികെ ആലോചിക്കുന്നതായാണ് അദ്ദേഹം മാധ്യമങ്ങളോട് പറഞ്ഞത്. നേരത്തെ തന്നെ ഇതുമായി ബന്ധപ്പെട്ട ചില അഭ്യൂഹങ്ങൾ പുറത്തുവന്നിരുന്നു.

റിപ്പോർട്ടർമാരുമായി സംസാരിക്കവെ, ടിവികെയും കോൺഗ്രസും തമ്മിൽ ഒരു സഖ്യം സാധ്യമാണെന്ന തരത്തിലാണ് എസ്എ ചന്ദ്രശേഖർ സംസാരിച്ചത്. 'കോൺഗ്രസിന് ഒരു ചരിത്രവും പാരമ്പര്യവുമുണ്ട്. സ്വാതന്ത്ര്യത്തിനുവേണ്ടി പോരാടിയ ഒരു പാർട്ടിയാണത്, എന്നാൽ നിലവിൽ അത് ക്ഷയിച്ചുകൊണ്ടിരിക്കുകയാണ്' എന്നാണ് അദ്ദേഹം നിരീക്ഷിച്ചത്.

മാത്രമല്ല പാർട്ടിക്ക് പഴയ പ്രതാപം വീണ്ടെടുക്കാൻ വിജയ് പിന്തുണ നൽകാൻ ഒരുക്കമാണെന്ന് ചന്ദ്രശേഖർ ചൂണ്ടിക്കാട്ടി. 'മറ്റ് പാർട്ടികൾക്ക് പിന്തുണ നൽകി അനുദിനം ക്ഷയിച്ചുകൊണ്ടിരിക്കുന്ന കോൺഗ്രസിന്റെ പഴയ പ്രതാപം വീണ്ടെടുക്കാൻ വിജയ് പിന്തുണ നൽകാൻ തയ്യാറാണ്. ഈ അവസരം പ്രയോജനപ്പെടുത്തേണ്ടത് കോൺഗ്രസിന്റെ ഉത്തരവാദിത്തമാണ്' എന്നും അദ്ദേഹം കൂട്ടിച്ചേർത്തു.

എങ്കിലും വരാനിരിക്കുന്ന തിരഞ്ഞെടുപ്പിൽ വിജയ് ഒറ്റയ്ക്ക് മത്സരിക്കണമെന്ന് നിരവധി പേർ അദ്ദേഹത്തോട് ആവശ്യപ്പെട്ടതായും ചന്ദ്രശേഖർ വെളിപ്പെടുത്തി. ഒറ്റയ്ക്ക് നിന്നാൽ വിജയം ഉറപ്പാണെന്ന് പലരും വിജയ്‌യെ അറിയിച്ചിട്ടുണ്ട് എന്നും അദ്ദേഹം പറഞ്ഞു. വിജയ് നിർഭയനും തിരഞ്ഞെടുപ്പിൽ തിളക്കമാർന്ന വിജയം നേടാൻ സാധ്യതയുള്ള നേതാവുമാണെന്നും ചന്ദ്രശേഖർ എടുത്തു പറഞ്ഞു.

അതിനിടെ 2026-ലെ നിയമസഭാ തിരഞ്ഞെടുപ്പ് പ്രചാരണം ഫെബ്രുവരിയിൽ ഔദ്യോഗികമായി ആരംഭിക്കാൻ ടിവികെ ഒരുങ്ങുകയാണ്. സംസ്ഥാനത്തിന്റെ വിവിധ ഭാഗങ്ങളിലായി ഒരു മഹാസമ്മേളനവും മൂന്ന് പൊതുയോഗങ്ങളും പാർട്ടി സംഘടിപ്പിക്കും. ഇതിൽ പാർട്ടിയുടെ അനിഷേധ്യ നേതാവ് വിജയ് ജനങ്ങളെ അഭിസംബോധന ചെയ്യും.

സമ്മേളനം നടക്കാതെ വന്നാൽ ബദൽ പദ്ധതിയുണ്ടെന്ന് പാർട്ടിവൃത്തങ്ങൾ സൂചിപ്പിക്കുന്നു. എന്തെങ്കിലും തരത്തിലുള്ള കാരണങ്ങളാൽ ഇത് നടന്നില്ലെങ്കിൽ പാർട്ടി നേതാവ് വിജയ് പങ്കെടുക്കുന്ന അഞ്ച് വലിയ പൊതുയോഗങ്ങൾ സംസ്ഥാനത്തുടനീളമുള്ള അഞ്ച് പ്രദേശങ്ങളിൽ സംഘടിപ്പിക്കാൻ പാർട്ടിയുടെ പക്കൽ ഒരു ബദൽ പദ്ധതിയുണ്ടെന്നാണ് അടുത്ത വൃത്തങ്ങൾ സൂചിപ്പിക്കുന്നത്.

പാർട്ടിയുടെ മുഖ്യ കോർഡിനേറ്റർ കെഎ. സെൻഗോട്ടയ്യൻ തിരഞ്ഞെടുപ്പ് പ്രചാരണ കമ്മിറ്റിയുമായി അടുത്തിടെ വിശദമായ ചർച്ചകൾ നടത്തിയിരുന്നു. ഈ ചർച്ചകളിലൂടെ പ്രചാരണ തന്ത്രങ്ങൾ അന്തിമരൂപത്തിലെത്തിച്ചു. എങ്കിലും ആരുമായും സഖ്യത്തിൽ ഇതുവരെ പാർട്ടി എത്തിയിട്ടില്ല. എസ്എ ചന്ദ്രശേഖറിന്റെ വാക്കുകൾ കോൺഗ്രസുമായി സഖ്യ സാധ്യത തുറക്കുമോ എന്നത് ഇനി കണ്ടറിയണം.