ഡിവോഴ്സ് കിട്ടിയപ്പോൾ സാനിയയ്ക്ക് പാനിക് അറ്റാക്ക് വന്നെന്ന് ഫറ ഖാൻ; 'അവരൊരു നല്ല സിംഗിൾ മദറാണ്'
ഇന്ത്യൻ ടെന്നീസ് ഇതിഹാസം സാനിയ മിർസ, മുൻ പാകിസ്ഥാൻ ക്രിക്കറ്റ് താരം ശുഐബ് മാലിക്കുമായുള്ള വിവാഹമോചനത്തിനുശേഷം കടുത്ത മാനസിക സമ്മർദ്ദത്തിലൂടെയാണ് കടന്നുപോയതെന്ന് തുറന്നുപറഞ്ഞ് സുഹൃത്തും പ്രമുഖ ബോളിവുഡ് ചലച്ചിത്ര നിർമ്മാതാവും നൃത്തസംവിധായികയുമായ ഫറാ ഖാൻ. സാനിയയുടെ 'സെർവിങ് ഇറ്റ് അപ് വിത്ത് സാനിയ' എന്ന പോഡ്കാസ്റ്റിൽ സംസാരിക്കവെയാണ് ഈ വെളിപ്പെടുത്തൽ.
ജീവിതത്തെക്കുറിച്ചും ഏക രക്ഷാകർതൃത്വത്തെക്കുറിച്ചും വ്യക്തിപരമായ വെല്ലുവിളികളെക്കുറിച്ചും ഇരുവരും പോഡ്കാസ്റ്റിൽ സംസാരിച്ചു. 2024 ജനുവരിയിൽ 14 വർഷത്തെ ദാമ്പത്യം വേർപെടുത്തിയ ശേഷമാണ് സാനിയ മാനസിക സമ്മർദ്ദവും പാനിക് അറ്റാക്കും അനുഭവപ്പെട്ടത്. വിവാഹമോചനത്തിന് ശേഷം ഏക മാതാവായി ജീവിതം മുന്നോട്ട് കൊണ്ടുപോകുന്ന സാനിയയെ ഫറാ ഖാൻ പ്രശംസിച്ചു. വിവാഹമോചനം കുട്ടികളെ എങ്ങനെ ബാധിക്കുന്നുവെന്നും ഇരുവരും സംസാരിച്ചു.
അഭിമുഖത്തിനിടയിൽ സാനിയയുടെ ജീവിതത്തിലെ ഏറ്റവും വിഷമകരമായ നിമിഷങ്ങളിലൊന്നിന് താൻ സാക്ഷ്യം വഹിച്ചതിനെക്കുറിച്ച് ഫറാ ഖാൻ ഓർത്തു. മുൻപ് ഒരിക്കലും അത്തരത്തിൽ സാനിയക്ക് മാനസിക സമ്മർദ്ദം അനുഭവപ്പെടുന്നത് താൻ കണ്ടിട്ടില്ലെന്നാണ് ഫറ ഖാൻ പറയുന്നത്. മറുവശത്ത് ഫറയുടെ സാന്നിധ്യം മാത്രമാണ് അന്ന് പൊതുജനങ്ങളെ അഭിമുഖീകരിക്കാൻ തന്നെ സഹായിച്ചതെന്ന് സാനിയ മിർസയും സമ്മതിച്ചു.
'എന്റെ സെറ്റിൽ നിങ്ങൾ വന്നത് എന്റെ ജീവിതത്തിലെ ഏറ്റവും വിഷമകരമായ നിമിഷങ്ങളിൽ ഒന്നായിരുന്നു. അതിനുശേഷം എനിക്ക് ഒരു തത്സമയ ഷോയിൽ പങ്കെടുക്കേണ്ടിയിരുന്നു. ഞാൻ വിറയ്ക്കുകയായിരുന്നു. നിങ്ങൾ അവിടെ എത്തിയിരുന്നില്ലെങ്കിൽ ഞാൻ ആ ഷോ ചെയ്യില്ലായിരുന്നു. 'എന്തുവന്നാലും നീ ഈ ഷോ ചെയ്യണം' എന്ന് നിങ്ങൾ എന്നോട് പറഞ്ഞു' സാനിയ അന്നത്തെ സംഭവം ഓർത്തെടുത്തു.
സാനിയയുടെ ധൈര്യത്തെയും ഏക മാതാവായി കരിയർ മുന്നോട്ട് കൊണ്ടുപോകാനുള്ള കഴിവിനെയും ഫറാ ഖാൻ പ്രശംസിച്ചു. ഇത് ഏറ്റവും ബുദ്ധിമുട്ടുള്ള വെല്ലുവിളിയാണെന്നും ഫറാ ചൂണ്ടിക്കാട്ടി. 'നീ ഇപ്പോൾ ഒരു സിംഗിൾ മദറാണ്. അത് പോലെ ബുദ്ധിമുട്ടുള്ള മറ്റൊന്നുമില്ലെന്ന് ഞാൻ കരുതുന്നു... നിന്റെ ഏറ്റവും മോശം അവസ്ഥയിലൂടെ നീ കടന്നുപോകുന്നത് ഞാൻ കണ്ടിട്ടുണ്ട്. നിന്നെ അറിയുന്ന കാലം മുതൽ നിന്റെ ഏറ്റവും വലിയ വിജയങ്ങളും ഏറ്റവും വലിയ താഴ്ച്ചകളും ഞാൻ കണ്ടിട്ടുണ്ട്, രണ്ടും നീ ഒരുപോലെ കൈകാര്യം ചെയ്തെന്ന് ഞാൻ കരുതുന്നു' ഫറ ഖാൻ പറയുന്നു.
മാസങ്ങളോളം നീണ്ട അഭ്യൂഹങ്ങൾക്കൊടുവിൽ, സാനിയ മിർസയും ശുഐബ് മാലിക്കും തമ്മിലുള്ള 14 വർഷത്തെ വിവാഹബന്ധം 2024 ജനുവരിയിലാണ് അവസാനിച്ചത്. മിർസയുടെ സഹോദരി അനം പുറത്തുവിട്ട പ്രസ്താവനയിൽ, അവർ മാസങ്ങളായി വേർപിരിഞ്ഞാണ് താമസിക്കുന്നതെന്നും വിവാഹമോചനം കുറച്ചുകാലം മുൻപേ തീരുമാനിച്ചതാണെന്നും അറിയിച്ചിരുന്നു.
എന്നാൽ ഈ പ്രഖ്യാപനത്തിനുപിന്നാലെ മറ്റൊരു പ്രധാന വാർത്തയും കൂടി പുറത്തുവന്നിരുന്നു. ശുഐബ് മാലിക് മറ്റൊരു വിവാഹം കഴിച്ചുവെന്നതായിരുന്നു ഇത്. പാകിസ്ഥാൻ നടി സനാ ജാവേദിനെയാണ് കഴിഞ്ഞ വർഷം ജനുവരി 19-ന് ഒരു സ്വകാര്യ നിക്കാഹ് ചടങ്ങിൽ വിവാഹം ചെയ്തത്. അവരുടെ മുൻ വിവാഹം ഔദ്യോഗികമായി വേർപെടുത്തിയതിന് പിന്നാലെയായിരുന്നു ഇത്.
Click it and Unblock the Notifications
Sign in with Google