ടെലിഗ്രാം ആപ്പിന് ഇന്ത്യയിൽ നിരോധനം; ജൂൺ 22 വരെ നിയന്ത്രണം തുടരും, നടപടി നീറ്റ് പുനഃപരീക്ഷ കണക്കിലെടുത്ത്
ന്യൂഡൽഹി:ഇന്ത്യയിലെ ജനപ്രിയ ഇൻസ്റ്റന്റ് മെസേജിങ് ആപ്ലിക്കേഷനായ ടെലിഗ്രാമിന് രാജ്യവ്യാപകമായി താൽക്കാലിക വിലക്കേർപ്പെടുത്തി കേന്ദ്ര സർക്കാർ. വരാനിരിക്കുന്ന നീറ്റ് യുജി പുനഃപരീക്ഷയോടനുബന്ധിച്ച് രാജ്യത്തുണ്ടാകാൻ സാധ്യതയുള്ള ക്രമക്കേടുകളും വ്യാജ പ്രചാരണങ്ങളും പൂർണമായി തടയുക എന്ന ലക്ഷ്യത്തോടെയാണ് ഈ ശക്തമായ സുരക്ഷാ നടപടി. വൻതോതിലുള്ള പരീക്ഷാ വിരുദ്ധ സംഘടിത തട്ടിപ്പുകൾക്ക് വിരാമമിടാൻ ദേശീയ പരീക്ഷാ ഏജൻസി നൽകിയ നേരിട്ടുള്ള മാർഗ്ഗനിർദ്ദേശങ്ങൾക്ക് പിന്നാലെയാണ് ഈ അടിയന്തര നടപടി.
കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയമാണ് രാജ്യവ്യാപകമായി ഈ നിരോധനം നേരിട്ട് നടപ്പിലാക്കിയിരിക്കുന്നത്. ഇതിനായി വിവരസാങ്കേതിക നിയമത്തിലെ (ഐടി ആക്റ്റ്, 2000) സെക്ഷൻ 69എ പ്രകാരമുള്ള അടിയന്തര അധികാരങ്ങൾ കേന്ദ്ര സർക്കാർ പ്രയോഗിക്കുകയായിരുന്നു. ഒരു പ്രത്യേക പ്ലാറ്റ്ഫോം പരീക്ഷാ അട്ടിമറികൾക്കായി വലിയ രീതിയിൽ ഉപയോഗിക്കപ്പെടുന്നു എന്ന വ്യക്തമായ തെളിവുകളുടെ അടിസ്ഥാനത്തിലാണ് ഈ കർശനമായ വകുപ്പ് ഇപ്പോൾ ചുമത്തിയിരിക്കുന്നത്.
ഈ വരുന്ന ജൂൺ 21-ാം തീയതി ഞായറാഴ്ചയാണ് നീറ്റ് യുജി പുനഃപരീക്ഷ നിശ്ചയിച്ചിരിക്കുന്നത്. ലക്ഷക്കണക്കിന് മെഡിക്കൽ വിദ്യാർത്ഥികളാണ് ഈ നിർണായക പരീക്ഷയ്ക്കായി കാത്തിരിക്കുന്നത്. അതുകൊണ്ട് തന്നെ പരീക്ഷയുടെ വിശ്വാസ്യതയ്ക്കും സുതാര്യതയ്ക്കും യാതൊരുവിധത്തിലുള്ള കോട്ടങ്ങളും സംഭവിക്കരുത് എന്ന കണിശമായ നിലപാടിലാണ് കേന്ദ്ര സുരക്ഷാ വിഭാഗവും എൻടിഎയും നടപടികളുമായി മുന്നോട്ടുപോകുന്നത്.
തീരുമാനത്തിന് പിന്നാലെ കാരണം?
ടെലഗ്രാം പോലുള്ള ലോകവ്യാപകമായി സുരക്ഷിതമെന്നു കരുതുന്ന ഒരു ആപ്പ് ഇന്ത്യയിൽ താൽക്കാലികമായി നിരോധിക്കാൻ പരീക്ഷാ ഏജൻസിയും സർക്കാരും തയ്യാറായതിന് പിന്നിൽ പ്രായോഗികമായ ചില സാങ്കേതിക കാരണങ്ങളുണ്ട്. അതിൽ ഏറ്റവും പ്രധാനപ്പെട്ടതാണ് ടെലിഗ്രാമിലെ സന്ദേശങ്ങൾ എഡിറ്റ് ചെയ്യാനുള്ള സവിശേഷത. സാധാരണയായി ഉപയോക്താക്കൾ തങ്ങൾ അയക്കുന്ന സന്ദേശങ്ങളിലെ അക്ഷരത്തെറ്റുകൾ വരുമ്പോൾ തിരുത്താനാണ് ഈ എഡിറ്റിങ് ഫീച്ചർ ഉപയോഗിക്കാറുള്ളത് എന്നാൽ ഉദ്യോഗാർത്ഥികളെ കബളിപ്പിക്കാൻ തട്ടിപ്പുകാർ ഇതാണ് പ്രധാന ആയുധമാക്കിയത്.
പരീക്ഷകൾ അവസാനിച്ചയുടൻ തന്നെ ഇത്തരം തട്ടിപ്പ് സംഘങ്ങൾ തങ്ങളുടെ ടെലിഗ്രാം ഗ്രൂപ്പുകളിലും ചാനലുകളിലും മുൻപ് അയച്ച മെസേജുകൾ വ്യാപകമായി എഡിറ്റ് ചെയ്യാൻ ആരംഭിക്കുന്നു. അതായത് പരീക്ഷ ആരംഭിക്കുന്നതിന് മുൻപ് തന്നെ ഇവർ ചാനലുകളിൽ വെറുതെയുള്ള സാങ്കേതിക പദങ്ങളോ അക്കങ്ങളോ ഉൾപ്പെടുത്തി മെസേജുകൾ പോസ്റ്റ് ചെയ്യുന്നു. എന്നാൽ പരീക്ഷ കഴിഞ്ഞ് ശരിയായ ചോദ്യപേപ്പർ പുറത്തുവരുമ്പോൾ തങ്ങളുടെ പഴയ സന്ദേശം എഡിറ്റ് ചെയ്ത് ചോദ്യങ്ങൾ അവിടെ ഉൾപ്പെടുത്തുകയാണ് ഇവരുടെ പ്രധാന രീതി.
ടെലിഗ്രാമിൽ സന്ദേശം പിന്നീട് എഡിറ്റ് ചെയ്യുമ്പോൾ അതിൽ 'എഡിറ്റഡ്' എന്നൊരു ലേബൽ ഉണ്ടാകുമെങ്കിലും, സന്ദേശം ആദ്യം പങ്കുവെച്ച സമയം ഒട്ടും മാറ്റമില്ലാതെ നിലനിൽക്കുന്നു എന്നതാണ് ഇതിലെ പഴുത്. വിവരസാങ്കേതിക രംഗത്തെക്കുറിച്ച് വലിയ അറിവില്ലാത്ത സാധാരണക്കാരായ ഉദ്യോഗാർത്ഥികൾക്കും രക്ഷിതാക്കൾക്കും ഈ സമയത്തിന്റെ കബളിപ്പിക്കൽ പെട്ടെന്ന് മനസ്സിലാക്കാൻ സാധിക്കില്ല. ഇത് പരീക്ഷയ്ക്ക് മുൻപേ തന്നെ ചോദ്യം ചോർന്നു എന്ന വ്യാജ പ്രതീതി സൃഷ്ടിക്കാൻ കാരണമാകുന്നു.
വിദ്യാഭ്യാസ മേഖലയിൽ ഇത്തരം തട്ടിപ്പുകൾ കുട്ടികളിൽ വലിയ രീതിയിലുള്ള മാനസിക സംഘർഷങ്ങൾക്ക് ഇടയാക്കുന്നു എന്ന് സൈബർ നിരീക്ഷകർ മുന്നറിയിപ്പ് നൽകുന്നുണ്ട്. വ്യാജ ചോദ്യപ്പേപ്പർ ചോർച്ചയെക്കുറിച്ചുള്ള വിവരങ്ങൾ ഇത്തരം ഗ്രൂപ്പുകൾ വഴി ദശലക്ഷക്കണക്കിന് ആളുകളിലേക്ക് വാട്സ് ആപ്പും ടെലിഗ്രാമും വഴി അതിവേഗം പടരും. ഇത് വർഷങ്ങളോളം കഷ്ടപെട്ട് പഠിച്ച് പരീക്ഷ എഴുതിയ കഠിനാധ്വാനികളായ കുട്ടികളിൽ കടുത്ത നിരാശ ഉണ്ടാക്കാനും യഥാർത്ഥ പരീക്ഷാ സമ്പ്രദായത്തോടുള്ള അവരുടെ വിശ്വാസ്യത തകർക്കാനും ഇടയാക്കുമെന്നുമാണ് വിലയിരുത്തൽ.
മുൻകാലങ്ങളിൽ ടെലിഗ്രാം ഗ്രൂപ്പുകൾ വഴിയുള്ള ഇത്തരം കപട സന്ദേശങ്ങളുടെ പശ്ചാത്തലത്തിലാണ് ഈ ദ്രുത നടപടിയിലേക്ക് കടക്കാൻ എൻടിഎ നിർബന്ധിതരായത്. സോഷ്യൽ മീഡിയ ചാനലുകൾ വഴി പരീക്ഷാ പ്രക്രിയയെ തകിടം മറിക്കാൻ നോക്കുന്ന സൈബർ മാഫിയകളുടെ പ്രവർത്തനങ്ങളെ സസൂക്ഷ്മം നിരീക്ഷിച്ച ശേഷമാണ് വിവരസാങ്കേതിക മന്ത്രാലയം താൽക്കാലിക നിരോധനം നടപ്പിലാക്കിയത്. പരീക്ഷാ എഴുതുന്ന ദിവസങ്ങളിൽ ഇത്തരത്തിലുള്ള ആശങ്കകൾ ഉണ്ടാകാതിരിക്കാൻ ഇത് വലിയ രീതിയിൽ സഹായിക്കും.
Click it and Unblock the Notifications
Sign in with Google