ആകാശത്ത് ചെന്താമര വിരിഞ്ഞത് പോലെ; കോടിക്കണക്കിന് കണ്ണുകൾക്ക് മുന്നിൽ തിളങ്ങി രക്തചന്ദ്രൻ, മനോഹരം!

Updated: Monday, September 8, 2025, 0:46 [IST]

ആകാശത്തിലെ അത്ഭുത കാഴ്‌ചകൾ മനുഷ്യരെ എന്നും ആകർഷിച്ചിട്ടേ ഉള്ളൂ, അത്തരത്തിൽ വളരെ സവിശേഷമായ ചന്ദ്രഗ്രഹണത്തിനാണ് ലോകം ഇന്ന് സാക്ഷ്യം വഹിച്ചത്. പൂർണ ചന്ദ്രഗ്രഹണം അഥവാ ബ്ലഡ് മൂൺ എന്ന അവസ്ഥയിലാണ് ചന്ദ്രനെ ലോകമെമ്പാടുമുള്ള കാഴ്‌ചക്കാർ കണ്ടത്. കേരളത്തിൽ തിരുവനന്തപുരവും കൊച്ചിയും കോഴിക്കോടും ഉൾപ്പെടെ വിവിധ ഇടങ്ങളിൽ ഈ കാഴ്‌ച കാണാൻ കഴിഞ്ഞുവെന്നാണ് റിപ്പോർട്ടുകൾ സൂചിപ്പിക്കുന്നത്.

2022ന് ശേഷമുള്ള ഏറ്റവും ദൈർഘ്യമേറിയതും ഏഷ്യയിലും യൂറോപ്പിലും ആഫ്രിക്കയിലും ഉടനീളം ദൃശ്യമാകുന്നതുമായ ഒരു അപൂർവ പൂർണ്ണ ചന്ദ്രഗ്രഹണത്തിനാണ് ലോകം സാക്ഷിയായത്. സൂര്യനും ഭൂമിയും ചന്ദ്രനും ഒരു വരിയിൽ വരുമ്പോൾ, ഭൂമി അതിന്റെ ഉപഗ്രഹത്തിൽ വീഴ്ത്തുന്ന നിഴൽ, കടും ചുവപ്പ് നിറമായി കാണപ്പെടുന്നു. ഇത് നിരീക്ഷിക്കാൻ ലോകം മുഴുവനായി കോടിക്കണക്കിന് കണ്ണുകൾ ആകാശത്തേക്ക് നോക്കി ഇരുന്നു.

ഭൂമിയുടെ നിഴൽ ചന്ദ്രനു കുറുകെ മനോഹരമായി തെന്നിമാറുന്നത് കാണാനും, അത് തിളങ്ങുന്ന ചെമ്പ്-ചുവപ്പ് ഡിസ്‌ക് പോലെ മാറുന്നതും കാണാൻ ഈ അപൂർവ ആകാശ സംഭവം അത്ഭുതകരമായ അവസരം നൽകുന്നു. ചന്ദ്രഗ്രഹണ സമയത്ത് ചന്ദ്രൻ ചുവപ്പ് നിറത്തിൽ കാണപ്പെടുന്നു, കാരണം അതിൽ എത്തുന്ന സൂര്യപ്രകാശം ഭൂമിയുടെ അന്തരീക്ഷത്തിലൂടെ പ്രതിഫലിക്കുകയും ചിതറിക്കിടക്കുകയും ചെയ്യുന്നു എന്നതാണ്.

ഈ പൂർണ ചന്ദ്രഗ്രഹണം ഏകദേശം 82 മിനിറ്റ് നീണ്ടുനിൽക്കുമെന്നാണ് നേരത്തെ അറിയിച്ചിരുന്നത്, കഴിഞ്ഞ പത്ത് വർഷത്തിനിടയിലെ ഏറ്റവും ദൈർഘ്യമേറിയ ഗ്രഹണങ്ങളിൽ ഒന്നാണിത്. ഇതിന്റെ അപൂർവതയ്‌ക്കൊപ്പം, ലോകമെമ്പാടുമുള്ള കോടിക്കണക്കിന് ആളുകൾക്ക് നഗ്നനേത്രങ്ങൾ കൊണ്ട് ഇത് ദൃശ്യമായി എന്നതാണ്, ടെലിസ്കോപോ മറ്റ് സംവിധാനങ്ങളോ ഉപയോഗിക്കേണ്ടി വന്നില്ല.

ഇന്ത്യൻ സമയം രാത്രി 8:58 ന് ആരംഭിച്ച ഗ്രഹണം പൂർണതയിലെത്തിയ ശേഷം അവസാനിക്കുകയായിരുന്നു. രാത്രി 11:41 ന് ആണ് ഏറ്റവും ഉയർന്ന ഗ്രഹണം സംഭവിച്ചത്, പക്ഷേ പുലർച്ചെ 12:22 വരെ രക്തചന്ദ്രൻ ദൃശ്യമായി. വർഷത്തിൽ ഒരിക്കൽ മാത്രം സംഭവിക്കുന്ന ഈ ആകാശ സംഭവം ഇന്ത്യൻ നഗരങ്ങളിലും ഗ്രാമപ്രദേശങ്ങളിലുമുള്ള ദശലക്ഷക്കണക്കിന് ആളുകൾ തത്സമയം വീക്ഷിച്ചിരുന്നു.

അപൂർവ ചന്ദ്രഗ്രഹണം ഇന്ത്യൻ സമയം പുലർച്ചെ 2:25 വരെ തുടരും, എല്ലാ ഇന്ത്യൻ സംസ്ഥാനങ്ങളിലും ഇത് ദൃശ്യമാകും. ഇന്ന് രാത്രിയിലെ ബ്ലഡ് മൂൺ രാജ്യമെമ്പാടുമുള്ള ജ്യോതിശാസ്ത്ര പ്രേമികൾക്കും അല്ലാത്തവർക്കും ഒരുപോലെ മറക്കാനാവാത്ത അനുഭവമാണ് സൃഷ്‌ടിച്ചത് എന്ന കാര്യം ഉറപ്പാണ്. നിലവിൽ ഗ്രഹണം അതിന്റെ പിൻവാങ്ങൽ ഘട്ടത്തിലാണ്.

സൂര്യനു ചുറ്റുമുള്ള ഭൂമിയുടെ ഭ്രമണപഥത്തിൽ നിന്ന് ചന്ദ്രന്റെ ഭ്രമണപഥം ഏകദേശം 5 ഡിഗ്രി ചരിഞ്ഞിരിക്കുന്നതിനാൽ ഗ്രഹണങ്ങൾ അപൂർവമായാണ് നടക്കാറുള്ളത്, എല്ലാ പൗർണ്ണമിയിലോ അമാവാസിയിലോ അവ സംഭവിക്കുന്നില്ല എന്നർത്ഥം. പി‌ടി‌ഐ പറയുന്നത് അനുസരിച്ച് അടുത്ത പൂർണ്ണ ചന്ദ്രഗ്രഹണം 2028 ഡിസംബർ 31ന് രാജ്യത്ത് നിന്ന് ദൃശ്യമാകും.