കേന്ദ്ര ബജറ്റ് 2024; ഇസ്രോയ്ക്ക് വമ്പൻ നേട്ടം, ബഹിരാകാശ മേഖലയ്ക്ക് അനുവദിച്ചത് 13,042 കോടി
ന്യൂഡൽഹി: കേന്ദ്ര ബജറ്റിൽ ഇക്കുറി എല്ലാവരും ഒരുപോലെ ഉറ്റുനോക്കിയ മേഖലകളിൽ ഒന്നായിരുന്നു ബഹിരാകാശ മേഖല. കാര്യമായ സാമ്പത്തിക സഹായത്തിനൊപ്പം ഇക്കുറി ചന്ദ്രയാൻ 3 ഉൾപ്പെടെയുള്ള നേട്ടങ്ങൾ എടുത്ത് പറഞ്ഞുകൊണ്ടാണ് സർക്കാർ ഇസ്രോയ്ക്കും ബഹിരാകാശ മേഖലയ്ക്കും പരിഗണന നൽകിയതെന്നത് ശ്രദ്ധേയമാണ്.
2024-25 സാമ്പത്തിക വർഷത്തിൽ 13,042.75 കോടി രൂപ നീക്കിവച്ചുകൊണ്ടാണ് സർക്കാർ ബഹിരാകാശ വകുപ്പിനുള്ള ബജറ്റ് വിഹിതത്തിൽ ഗണ്യമായ വർധനവ് പ്രഖ്യാപിച്ചത്. മുൻവർഷത്തെ ബജറ്റിൽ അനുവദിച്ച 12,543.91 കോടി രൂപയേക്കാൾ 498.84 കോടി രൂപയുടെ വർധനവാണ് ഇതിൽ ഉണ്ടായിരിക്കുന്നത്.
ചന്ദ്രയാൻ-3, ആദിത്യ എൽ1 തുടങ്ങിയ ഉന്നതതല ദൗത്യങ്ങൾ വിജയകരമായി പൂർത്തിയാക്കിയതിനെ തുടർന്നാണ് ധനസഹായം വർധിപ്പിക്കാനുള്ള സർക്കാർ തീരുമാനം ഉണ്ടായിരിക്കുന്നത് എന്നതും ശ്രദ്ധേയമാണ്. ബഹിരാകാശ പര്യവേക്ഷണ ശേഷികൾ മെച്ചപ്പെടുത്തുന്നതിനുള്ള ഇന്ത്യയുടെ പ്രതിബദ്ധത അടിവരയിടുന്നതാണ് ഈ നീക്കം.
ആദ്യമായി രാജ്യത്ത് നിന്ന് തന്നെ മനുഷ്യരെ ബഹിരാകാശത്തേക്ക് അയക്കാനും, 2035ഓടെ ഒരു സമർപ്പിത ബഹിരാകാശ നിലയം നിർമ്മിക്കാനും ലക്ഷ്യമിട്ടുള്ള ഗഗൻയാൻ ദൗത്യത്തിനായി പുതിയ ബജറ്റിലെ പ്രഖ്യാപനങ്ങൾ ഇസ്രോയെ സഹായിക്കും.
2024-25ൽ 16,603.94 കോടി രൂപ സയൻസ് ആൻഡ് ടെക്നോളജി വകുപ്പിന് ലഭിച്ചു എന്നതും പ്രധാനപ്പെട്ട ഒരു കാര്യമാണ്, ഇത് മുൻ വർഷത്തെ വിഹിതമായ 16,361 കോടിയേക്കാൾ 242 കോടി രൂപ കൂടുതലാണ്. വിവിധ ഡൊമെയ്നുകളിലുടനീളമുള്ള ശാസ്ത്രീയ ഗവേഷണവും വികസനവും പ്രോത്സാഹിപ്പിക്കുന്നതിൽ സർക്കാർ പുലർത്തുന്ന ശ്രദ്ധയാണ് ഈ ഫണ്ടുകളിലെ വർധന തെളിയിക്കുന്നത്.
ശാസ്ത്ര സാങ്കേതിക മന്ത്രാലയത്തിന് കീഴിലുള്ള മൂന്ന് പ്രധാന വകുപ്പുകൾക്കിടയിൽ ഈ ഫണ്ട് വിതരണം ചെയ്യും. ശാസ്ത്ര സാങ്കേതിക വകുപ്പിന് 8,029.01 കോടിയും ബയോടെക്നോളജി വകുപ്പിന് 2,251.52 കോടിയും അനുവദിച്ചിട്ടുണ്ട്. കൂടാതെ, ഡിപ്പാർട്ട്മെൻ്റ് ഓഫ് സയൻ്റിഫിക് ആൻഡ് ഇൻഡസ്ട്രിയൽ റിസർച്ചിന് 6,323.41 കോടി രൂപ വകയിരുത്തുകയും ചെയ്തിട്ടുണ്ട്.
Click it and Unblock the Notifications
Sign in with Google