ആദ്യ ശമ്പളം വെറും 500 രൂപ, ജോലി മരത്തില്‍ ചാരി നിന്ന് ചിരിക്കുക, അനുഭവം പറഞ്ഞ് വിദ്യാ ബാലന്‍

ദില്ലി: ബോളിവുഡിലെ മലയാളി മുഖം എന്ന് പറഞ്ഞാല്‍ ആദ്യം മനസ്സില്‍ ഓടിയെത്തുക നടി വിദ്യാ ബാലന്റെ മുഖമായിരിക്കും. എന്നാല്‍ ബോളിവുഡിന്റെ മുന്‍നിര നായികയിലേക്കുള്ള യാത്ര അത്ര എളുപ്പമായിരുന്നില്ലെന്ന് വിദ്യാ ബാലന്‍ പറയുന്നു. ആദ്യ ശമ്പളമായി തനിക്ക് കിട്ടിയത് 500 രൂപയാണെന്ന് ടൈംസ് നൗ ഡിജിറ്റലിന് നല്‍കിയ അഭിമുഖത്തില്‍ നടി വെളിപ്പെടുത്തി. അതേസമയം രസകരമായ ഒരു ജോലിയായിരുന്നു അതെന്നും നടി പറയുന്നു. ഒരു മരത്തില്‍ ചാരി നിന്ന് ചിരിക്കുകയായിരുന്നു തന്റെ ജോലി. ഒരു സംസ്ഥാന ടൂറിസം ക്യാമ്പയിന് വേണ്ടിയുള്ളതായിരുന്നു ആ ചിത്രമെന്നും നടി പറഞ്ഞു.

പത്രത്തിലെ പരസ്യം നല്‍കുന്നതിനായിരുന്നു ആ ചിത്രം. അതിന് 500 രൂപയാണ് ലഭിച്ചത്. ഞാന്‍, എന്റെ സഹോദരി, ബന്ധു, സുഹൃത്ത് എന്നിവരാണ് പരസ്യത്തിനായി പോയത്. നാല് പേര്‍ക്കും 500 രൂപ വീതം കിട്ടി. അതേസമയം അഭിമുഖത്തില്‍ തന്റെ ആദ്യത്തെ ഓഡിഷനെ കുറിച്ചും നടി പറഞ്ഞു. 1995ല്‍ ഹം പാഞ്ച് എന്ന ടെലിവിഷന്‍ ഷോയ്ക്ക് വേണ്ടിയായിരുന്നു ഞാന്‍ ആദ്യമായി ഓഡിഷന് പോയത്. 150ഓളം ആളുകളാണ് ആ ഓഡിഷനായി എത്തിയിരുന്നത്. ആ റോള്‍ അവസാനം തനിക്ക് കിട്ടി. രാധിക എന്ന കൗമാരക്കാരിയുടെ റോളായിരുന്നു അത്.

അമ്മയ്ക്കും സഹോദരിക്കും ഒപ്പം ഫിലിം സിറ്റിയിലായിരുന്നു ഓഡിഷനായി പോയത്. ഒരു ദിവസം മുഴുവന്‍ അവിടെ കാത്തുനില്‍ക്കേണ്ടി വന്നു. അത്രയും പേരുണ്ടായിരുന്നു. ഓഡിഷനൊക്കെ കഴിഞ്ഞപ്പോള്‍ ഇത് എനിക്ക് കിട്ടില്ല, മറന്നേക്കാമെന്നാണ് ഞാന്‍ കരുതിയത്. അങ്ങനെ ഞാന്‍ മനസ്സില്‍ വിചാരിച്ചപ്പോഴേ അവര്‍ എന്നെ ആ ടെലിവിഷന്‍ ഷോയിലേക്ക് വിളിച്ചു. എന്നാല്‍ ആദ്യത്തെ ഷോ, ലാ ബെല്ല, അന്ന് പുറത്തിറങ്ങിയില്ല എന്നും വിദ്യ പറഞ്ഞു.

അതേസമയം തനിക്ക് നേരിടേണ്ടി വന്ന ലിംഗ വിവേചനത്തെ കുറിച്ചും വിദ്യ തുറന്ന് പറഞ്ഞു. തനിക്കും ഭര്‍ത്താവ് സിദ്ധാര്‍ത്ഥ് റോയ് കപൂറിനും പാചകമറിയില്ല. പല ആളുകളും ഭക്ഷണം കഴിക്കുന്നതിനിടെ, ദൈവമേ നിനക്ക് പാചകം ചെയ്യാനറിയില്ലേ എന്ന് ചോദിച്ചിരുന്നു. എനിക്ക് മാത്രമല്ല ഭര്‍ത്താവിനും അറിയില്ലെന്നാണ് മറുപടി നല്‍കിയത്. എന്നാല്‍ നിങ്ങള്‍ അത് പഠിക്കണമെന്നായിരുന്നു ഇവരുടെ ഉപദേശം. ഭര്‍ത്താവിനും തനിക്കും പ്രത്യേകമായ കാര്യങ്ങളാണോ അതോ നിയമമാണോ ഉള്ളതെന്നും വിദ്യ ചോദിച്ചു. ഷേര്‍ണി എന്ന ചിത്രമാണ് വിദ്യയുടേതായി പുറത്തിറങ്ങാനുള്ള ചിത്രം.

English summary

vidya balan opens up about her first salary and first audition, her reply went viral