വയനാട്, ചേലക്കര, ജാർഖണ്ഡ് തിരഞ്ഞെടുപ്പ് 2024 Live: വയനാട്ടിൽ ഇടിവ്, ജാർഖണ്ഡിൽ ഭേദപ്പെട്ട പോളിംഗ്

കേരളത്തിലെ ചേലക്കര നിയമസഭാ മണ്ഡലത്തിലും, വയനാട് ലോക്‌സഭാ മണ്ഡലത്തിലും വോട്ടെടുപ്പ് അവസാനിച്ചിരിക്കുകയാണ്. വയനാട്ടിൽ രാഹുൽ ഗാന്ധി രാജി വച്ചതോടെയാണ് ആറ് മാസങ്ങൾക്ക് ഇപ്പുറം വീണ്ടും ഒരു തിരഞ്ഞെടുപ്പിന് കളമൊരുങ്ങിയത്. യുഡിഎഫ് സ്ഥാനാർത്ഥിയായി പ്രിയങ്ക ഗാന്ധിയാണ് മത്സരിക്കുന്നത്. മറുവശത്ത് ഇടത് മുന്നണിക്ക് വേണ്ടി സിപിഐയുടെ സത്യൻ മൊകേരിയും ബിജെപിക്ക് വേണ്ടി നവ്യ ഹരിദാസുമാണ് മത്സര രംഗത്തുള്ളത്.

ഇക്കുറി കേരളത്തിൽ നിയമസഭാ ഉപതിരഞ്ഞെടുപ്പ് നടക്കുന്ന മണ്ഡലങ്ങളിൽ ഒന്നായ ചേലക്കരയിൽ കടുത്ത മത്സരമാണ് പ്രതീക്ഷിക്കുന്നത്. മുൻ മന്ത്രിയും ചേലക്കരയിലെ എംഎൽഎയുമായ കെ രാധാകൃഷ്‌ണൻ പാർലമെന്റിലേക്ക് തിരഞ്ഞെടുക്കപ്പെട്ടതോടെയാണ് മണ്ഡലത്തിൽ മത്സരത്തിന് കളമൊരുങ്ങിയത്. ഇടത് മുന്നണിക്ക് വേണ്ടി യുആർ പ്രദീപും യുഡിഎഫ് സ്ഥാനാർത്ഥിയായി രമ്യ ഹരിദാസും എൻഡിഎക്ക് വേണ്ടി സി ബാലകൃഷ്‌ണനും മത്സരിക്കുന്നു.

രാജ്യം ഉറ്റുനോക്കുന്ന ജാർഖണ്ഡിലെ നിയമസഭാ തിരഞ്ഞെടുപ്പിന്റെ ആദ്യഘട്ട വോട്ടെടുപ്പ് നടന്നു കൊണ്ടിരിക്കുകയാണ്. ഇക്കുറി പോളിങ് ഉയരുമോ എന്നാണ് ഏവരും ആകാക്ഷയോടെ നോക്കുന്നത്. ജാർഖണ്ഡിലെ ആകെയുള്ള 81 സീറ്റുകളിൽ 43 മണ്ഡലങ്ങളിലേക്കാണ് ഒന്നാം ഘട്ടത്തിൽ വോട്ടെടുപ്പ് നടക്കുന്നത്. സംസ്ഥാനത്ത് ഇന്ത്യ സഖ്യത്തിന്റെ കീഴിൽ ജെഎംഎം, കോൺഗ്രസ്, ആർജെഡി, ഇടത് പാർട്ടികൾ എന്നിവരും എൻഡിഎയുടെ കീഴിൽ ബിജെപി, എജെഎസ്‌യു, ജെഡിയു, എൽജെപി എന്നീ കക്ഷികളും നേരിട്ട് ഏറ്റുമുട്ടും.